༢༠༢༡ལོ་ནི་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་༡༠༠འཁོར་བ་དང་། ལོ་ལྔའི་འཆར་གཞི་ཨང་བཅུ་བཞི་པའི་འཆར་འགོད་ལས་འགོ་ཚུགས་པའི་ལོ་ཞིག་ཡིན་ལ། སྡེ་རོང་རྫོང་གིས་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པའི་དགོངས་དོན་དོན་འཁྱོལ་དང་གྲོང་གསེབ་དར་རྒྱས་གཏོང་བའི་འཐབ་ཇུས་ལག་བསྟར་བྱེད་པའི་འགག་རྩའི་ལོ་ཞིག་དེ་བས་ཡིན། རྒྱལ་ཁབ་ཀྱིས་གྲོང་གསེབ་དར་རྒྱས་གཏོང་བའི་འཐབ་ཇུས་ལག་ལེན་བསྟར་བའི་རྒྱབ་ལྗོངས་འོག སྡེ་རོང་གི་དམངས་ཁྲོད་རིག་གནས་སྔོག་འདོན་གཏིང་ཟབ་དང་། མི་རིགས་ཁག་འགྲོ་འོང་དང་། སྤེལ་རེས། མཉམ་འདྲེས་བཅས་ཀྱི་ཁྲོད་ཕུལ་བྱུང་རིག་གནས་ཀྱི་ཉིང་བཅུད་བསྡུ་ལེན་བྱས་ནས་ཀྲུང་ཧྭ་མི་རིགས་ཀྱི་ཐུན་མོང་འདུ་ཤེས་བརྟན་པོ་བཙུགས་ཏེ་ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་ལ་སྐུལ་འདེད་གཏོང་བ་དང་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་༡༠༠འཁོར་བར་བསུ་བ་ཞུ་ཆེད། ཟླ་༤ཚེས་༡༦ཉིན་ནས་ཚེས་༡༨ཉིན་བར་ཀྲུང་གུང་སྡེ་རོང་རྫོང་ཏང་ཨུའི་དྲིལ་བསྒྲགས་པུའུ་དང་རྫོང་འཕྲིན་སྦྱོར་ཀུན་འདུས་ལྟེ་གནས་ཀྱིས་གཙོ་སྒྲུབ་དང་། རྫོང་རྩོམ་རིག་སྒྱུ་རྩལ་དང་སྤྱི་ཚོགས་ཚན་རིག་ལས་རིགས་མཉམ་འབྲེལ་ལྷན་ཚོགས། རྫོང་རིག་གནས་རླུང་འཕྲིན་བརྙན་འཕྲིན་དང་ཡུལ་སྐོར་ཅུས། རྫོང་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས། རྫོང་གི་རྩོམ་རིག་དགའ་ཞེན་མཁན་དང་དམངས་ཁྲོད་རིག་གནས་སྲུང་སྐྱོང་མཐུན་ཚོགས་བཅས་ཀྱིས་འགན་སྒྲུབ་གནང་བའི་སྡེ་རོང་རྫོང་གི་དམངས་སྲོལ་བགྲོ་གླེང་ཚོགས་འདུ་སྐབས་གཉིས་པ་དེ་སྡེ་རོང་རྫོང་མཁར་ནས་བདེ་བླག་ངང་འཚོགས།
ཐེངས་འདིའི་རིག་གཞུང་བགྲོ་གླེང་ཚོགས་འདུའི་ཐོག ཀྲུང་གོའི་སྤྱི་ཚོགས་ཚན་རིག་ཁང་གི་མི་རིགས་རིག་པ་དང་མིའི་རིགས་རིག་པའི་ཞིབ་འཇུག་སའོ་ཡི་དགེ་རྒན་ཆེན་མོ་མོ་ཧྲི་ཧྭ་དང་བོད་ལྗོངས་རྩོམ་རིག་གི་གཙོ་སྒྲིག་པ་དང་བོད་ཀྱི་རྩོམ་པ་པོ་གྲགས་ཅན་ཚེ་རིང་ནོར་བུ། བོད་ཀྱི་རྩོམ་རིག་སྒྱུ་རྩལ་གྱི་གཙོ་སྒྲིག་དང་རྩོམ་པ་པོ་ལྷ་གཡང་ནོར་བུ། མིང་དུ་གྲགས་པའི་སྙན་ངག་པ་ས་དམར་གྲགས་པ་སོགས་པེ་ཅིན་དང་བོད་ལྗོངས། མཚོ་སྔོན། ཀན་སུའུ། སི་ཁྲོན། ཡུན་ནན་སོགས་ནས་ཕེབས་པའི་ཆེད་མཁས་པ་མང་པོ་ཕེབས་འདུག་ལ། དེ་མིན་དཀར་མཛེས་ཁུལ་གྱི་ཕུལ་བྱུང་ཆེད་མཁས་ཤེས་ཡོན་པ་དག་ཕེབས་པ་ཡོད་པ་མ་ཟད། ཁམས་པའི་བརྙན་འཕྲིན་དང་དཀར་མཛེས་ཉིན་རེའི་ཚགས་པར། དཀར་མཛེས་བརྙན་འཕྲིན་ཁང་། བདེ་ཆེན་བརྙན་འཕྲིན་ཁང་། བོད་མིའི་རིག་གནས་དྲ་བ། ཁམས་པའི་དྲ་བ་སོགས་འཕྲིན་སྦྱོར་ལས་ཁུངས་མང་པོ་ཕེབས་འདུག
སྡེ་རོང་རྫོང་གི་ཏང་ཨུའི་ཧྲུའུ་ཅི་གཞོན་པ། རྫོང་དཔོན་ལིའོ་ཏཱ་ཧོང་། ▲
སྡེ་རོང་རྫོང་ཏང་ཨུའི་དྲིལ་བསྒྲགས་པུའུ་ཡི་པུའུ་ཀྲང་། འཕྲིན་ལས་མགོན་པོ། ▲
ལྷོ་ནུབ་མི་རིགས་སློབ་ཆེན་གྱི་དགེ་རྒན་ཆེན་མོ། ཚེ་རིང་འགྱུར་མེད། ▲
བོད་ལྗོངས་རྩོམ་རིག་གི་གཙོ་སྒྲིག་པ་ཚེ་རིང་ནོར་བུ། ▲
བགྲོ་གླེང་ཚོགས་འདུའི་སྟེང་། སྡེ་རོང་གི་དམངས་སྲོལ་རིག་གནས་རྒྱུན་འཛིན་དང་སྲུང་སྐྱོང་ཇི་ལྟར་བྱེད་དགོས་པའི་སྐོར་ནས་སྡེ་རོང་རྫོང་གི་དམངས་སྲོལ་རིག་གནས་འཕེལ་རྒྱས་ཀྱི་ལོ་རྒྱུས་དང་། ཁྱད་ཆོས། སྣ་ཁ། ནུས་པ། སྒྱུ་རྩལ་གྱི་ཁྱད་ཆོས། ད་ཆའི་གནས་ཚུལ། ད་ཡོད་གནད་དོན་སོགས་ལ་དམིགས་ནས་གྲོས་བསྡུར་གཏིང་ཟབ་བྱས་ཤིང་། དེ་དང་ཆབས་ཅིག་སྡེ་རོང་གི་དམངས་སྲོལ་རིག་གནས་ཞིབ་འཇུག་དང་། སྔོག་འདོན། སྲུང་སྐྱོབ། རྒྱུན་འཛིན་བཅས་ཀྱི་ཐད་དཔྱད་བསྡུར་བྱས་ནས་དམངས་སྲོལ་རིག་གནས་སྲུང་སྐྱོང་རྒྱུན་འཛིན་དང་གསར་སྤེལ་བེད་སྤྱོད་ཀྱི་གལ་ཆེའི་རང་བཞིན་ལ་གཞིགས་ཏེ་དམངས་སྲོལ་རིག་གནས་སྲུང་སྐྱོང་རྒྱུན་འཛིན་དང་གསར་སྤེལ་བེད་སྤྱོད་ཀྱི་ཉམས་མྱོང་དང་བྱ་ཐབས་མཉམ་སྤྱོད་བྱས་པ་རེད།
