ཞྭ་ནག་པས་སྙན་རྩོམ་ཚན་པ་གཉིས།
①སྒོ་བརྒྱབ་ཟིན།
མར་ཁུ་རྒྱལ་མཚན།
ལྡེ་མིག་ཅིག་ལག་ཏུ་བཟུང་ནས།
གླུ་དབྱངས་ལེན་བཞིན། ཟྭ་ཡོད་ཚད།
ངས། ལྡེ་མིག་རྐང་གཅིག་གིས་ཕྱེ་ན་བསམ།
ཡང་ན། ལྡེ་མིག་དེའི་མིང་ལ་ལྷག་བསམ་ཟེར།
ཡང་ན། ཟྭ་ཡོད་ཚད་ཀྱི་མིང་ལ་ཚུལ་འཆོས་ཟེར།
ང་ལ་ཅི་ཡང་མ་འདྲི།
ངའི་འོངས་འཕྱི་བའི་ཁེར་རྐྱང་གི་མགྲོན་པོ་ལགས།
སྒོ་མོ་ཡོད་ཚད་སྔར་ནས་བརྒྱབ་འདུག
②ཁྱི།
ཞྭ་ནག་པ།
ཁྱི་ལ་ནང་སེམས་བཅོལ་ཆོག
ཁྱིས་རང་ངོ་དང་གཞན་ངོ་ཤེས
ཁྱི་ནི་གཞན་ཞིག་དང་གཏན་ནས་མི་འདྲ
གྲང་འཁྱག་གོས་སུ་གྱོན་ནས་རང་ཉིད་ངོ་ཤེས་མཁན
ཁྱི་ལས་གཞན་གཅིག་ཀྱང་མེད
རྩྭ་གསེབ་ཏུ་གཅིན་པ་གཏོང་མཁན་ཁྱི་ལས་གཞན་ཧ་ཅང་མང
རེད་དེ རང་ངོ་རང་གིས་ཤེས་མཁན་ཁྱི་ལས་གཞན་གཅིག་ཀྱང་མེད
ཁྱི་ལ་རང་སྲུང་གི་འདི་ཤེས་ཡོད
ཁྱིས་བཟང་ངོ་དང་ངན་ངོ་ཤེས
ཁྱི་ནི་གཞན་ཞིག་དང་གཏན་ནས་མི་འདྲ
བཟོད་པའི་ཕ་རོལ་ཏུ་ཕྱིན་མཁན་ཁྱི་ལས་གཞན་གཅིག་ཀྱང་མེད
ཁོས་གྲང་འཁྱག་ལྟ་བུའི བཀྲེས་སྐོམ་ལྟ་བུའི
སྡུག་བསྔལ་མཐའ་དག་ལ་བཟོད་སྲོན་བྱེད་ཐུབ
2019-6-3