ཤེས་རབ་ཀྱི་ཐང་ཆེན་ཡངས་ཤིང་། བརྩོན་འགྲུས་ཀྱི་རྟ་ཕོ་ལ་སྡུག་རུས་ཀྱི་སྐུལ་ལྕག་མངའ་བའི་མི་བུ་ཞིག་གཞི་ནས་མིན་པས། འདས་ཟིན་པའི་དུས་ཚོད་མང་པོ་ཞིག་བྱེ་མའི་འཆང་བུ་ལྟར་ཆོ་མེད་པའི་ཀློང་དུ་ཐིམ་ཟིན་པ་དག ད་ལྟ་ཡིད་ཀྱི་མེ་ལོང་ལས་ཝ་ལེར་ཤར་ན། འགྱོད་གདུང་གི་སྤྲིན་ནག་ལོང་ལོང་འཁྲིགས་པའང་ཐེངས་གཅིག་མིན། ད་ནི་ལང་ཚོའི་འདབ་མ་རྣམས་ཀྱང་དུས་བཞིའི་སོ་མཚམས་ནས་རེ་རེ་བཞིན་འཐོར་ཏེ། དགུ་གསུམ་ཉེར་བདུན་གྱི་ལོ་ཚོད་ལ་སླེབས། མི་ཚེའི་རེ་འདུན་གྱི་རྡོག་ཁྲེས་འདི་ཞེས་དམིགས་གསལ་ཞིག་བསྟན་ཡུལ་དུ་བྲལ་ཡང་། དཔེ་ཆ་ཀློག་རྒྱུ་ནི་ཁྱོད་ཀྱི་བྱ་བ་ཞིག་ཡིན་ཞེས་གསུངས་པ་ལྟར། སློབ་སྦྱོང་ནི་ལུས་དང་གྲིབ་མ་བཞིན་འགྲོགས་དགོས་པའི་དན་རྟགས་ཤིག་རྙེད།
ཕྱི་ལོ་ཉིས་སྟོང་ཉེར་གསུམ་ནི། ངའི་མི་ཚེའི་ཟིན་ཐོའི་སྟེང་བཀོད་ན་འདི་ལྟར་ཏེ། སྤྱིར་ན་རང་ཉིད་འཚོ་སྡོད་བྱེད་སའི་ཁོར་ཡུག་དང་། རང་ཉིད་འཇུག་པར་འདོད་པའི་ལས་གཉིས་ཕན་ཚུན་ལྟག་སྤྲོད་དུ་གྱུར་པས། ལས་གང་ལ་འཇུག་ཀྱང་སྣོད་ཁ་སྦུབས་ལྟ་བུའི་སྐྱོན་རྣམས་འབྱུང་གིན་འདུག བྱ་བ་གང་ཞིག་སྒྲུབ་ཀྱང་ལུས་ངག་ཡིད་གསུམ་གྱི་མདའ་མོ། ལས་ཀྱི་འབེན་མིག་ལ་གཟུར་བ་ནི་གནད་དམ་པ་ཞིག་རེད་མོད། དེང་སང་ཕྱི་རོལ་ཏུ་དབང་ལྔའི་བརྟན་པ་འཕྲོག་པའི་འཕྲུལ་ཆས་ཀྱི་ཡོ་བྱད་ཆར་རྗེས་ཤ་མོང་བརྡོལ་བ་ལྟར་བྱུང་དང་འབྱུང་གིན་འདུག དུས་ཚོད་མང་པོ་ཞིག་དེ་དག་གི་དབང་དུ་ཤོར་ཏེ། ཐ་ན་ཉིན་རེའི་ཟས་ཀྱང་དེས་བཅད་འདུག བར་གསེང་གི་དུས་ཚོད་དག་ཀྱང་དེའི་དབང་དུ་ཤོར། འདི་ནི་དུས་ཚོད་ལ་འཆར་གཞི་མེད་པ། ཉིན་མཚན་རེ་རེའི་འཁོར་སྐྱོད་ཁྲོད། ང་དང་ང་འདྲ་འགན་ལེན་མེད་དོ་ཅོག་གི་དུས་ཚོད་ཀྱི་བཞུར་སྟངས་ཤིག་རེད།
དུས་ཚོད་ལ་འཆར་གཞི་དང་བཀོད་སྒྲིག་ཡོད་ན། དུས་ཚོད་ཆུད་ཟོས་སུ་མི་འགྲོ་བའི་ཐབས་དམ་པ་ཞིག་རེད་སྙམ། གལ་ཏེ་དུས་ཚོད་ལ་འཆར་གཞི་སོགས་མེད་ཚེ། ངས་ཉིན་འདིར་བསྒྲུབ་པར་འདོད་པའི་ལས་ཀ་ལ་འདུན་པ་ཞིག་བདོག་ཀྱང་། འཆར་གཞི་མེད་ཚེ་དེ་རིང་བྱ་བ་འདི་ངེས་པར་དུ་འགྲུབ་དགོས་སྙམ་པའི་བརྩོན་སེམས་མེད་ལ། དེ་རིང་བྱ་བ་འདི་མ་འགྲུབ་སྙམ་པའི་འགྱོད་སེམས་དང་སྣང་དོགས་མེད། དེ་ལྟར་འཆར་གཞི་མེད་པའི་དུས་ཚོད་ཀྱི་ཧྲག་བར་ནས་རྣམ་གཡེང་དང་ལེ་ལོས་མཆེ་སྡེར་གཙིགས་ཤིང་། ལོང་ཡོད་ཀྱི་དུས་ཚོད་མཐའ་དག་ཁྱུར་མིད་དུ་གཏང་སྲིད།
ཉིས་སྟོང་ཉེར་གསུམ་ནི་སྔར་ལོ་ལྟར་རི་ཁྲོད་ཀྱི་འོས་འགན་སྒྲུབ་ཞོར། བར་སྐབས་ཁོམ་ལོང་གི་དུས་ཚོད་ལ། ཐར་ཐོར་གྱི་དུས་ཚོད་ཀྱང་ཟེར་གྱིན་འདུག
ཐར་ཐོར་གྱི་དུས་ཚོད་ཁྲོད་གང་ལ་གང་འཚམ་རེ་དཔེ་ཀློག་བྱས་མོད། ལོ་མཇུག་ཏུ་སླེབས་དུས། གྲུབ་འབྲས་འདི་ཞེས་རྡོག་རྡོག་ཅིག་སྟོན་རྒྱུ་མེད་ཀྱང་། “དཔེར་ན་ད་བར་དུ་རྒྱ་ཟས་དང་བོད་ཟས་གང་མང་ཟོས་མཐར་ལུས་སྟོབས་རྒྱས་པ་ལས། ཟས་རིགས་འདིས་ང་ལ་འདི་ལྟར་ཕན་ཞེས་བཤད་མི་ཐུབ་པའི་དཔེ་བཞིན་དུ།” དཔེ་དེབ་སུམ་ཅུ་ལྷག་ལོ་གཅིག་ལ་བཀླགས་ཟིན་པས། རང་ལ་ཕན་པའི་ཤུགས་རྐྱེན་དང་བག་ཆགས་རེ་ཐེབས་སྲིད་པའོ། ། དེའི་ཕྱིར་དཔེ་ཀློག་ཁྲོད་ཀྱི་དཀའ་ངལ་ནི་གནས་སྐབས་ཙམ་ཡིན་ལ། ཤེས་ཡོན་མེད་པའི་སྡུག་བསྔལ་ནི་ཚེ་གང་གི་སྡུག་བསྔལ་ཡིན་ཞེས་ཀའོ་ཨེར་ཅིས་ཀྱིས་གསུངས་པ་ལྟར། ཕྱིར་ཡོང་མེད་པའི་ལོ་ཟླའི་བཞུར་རྒྱུན་ཁྲོད། ལང་ཚོའི་འདབ་མ་རེ་རེ་བཞིན་ས་རུ་འཐོར་ཡང་། རྒྱུན་འཁྱོངས་དང་། སྡུག་རུས། བརྩོན་འགྲུས་སོགས་ཀྱི་སྲོག་ཤིང་སྔར་ལས་བརྟན་བརླིང་དུ་གནས་པར་འབད་འབུངས་བགྱིས་ཏེ། ཉིས་སྟོང་ཉེར་གཞིའི་ནང་། བརྩོན་སེམས་ཀྱི་དངུལ་ཆུས་རེ་འདུན་གྱི་ཞིང་ས་བརླན་པའི་ལས་ལ་བརྟུན་པར་བྱའོ། །
