སྙིང་པོའི་ལྷ་ཆོས་བྱེད་པར་གདམས་པ། གང་ལ་བརྟེན་ན་བསླུ་བ་མ་མཆིས་པའི། །སྐྱབས་གནས་རིན་ཆེན་གསུམ་གྱི་ཐུགས་རྗེའི་མཐུས། །དོན་མེད་འཁོར་བའི་འཕྲུལ་སྣང་ཀུན་ཞི་ནས། །བློ་སྣ་ཆོས་ལ་ཕྱོགས་པར་བྱིན་གྱིས་རློབས། །ཅི་ལ་བསམས་ཀྱང་འཇིག་རྟེན་བྱ་གཞག་ལ། །ཡང་སྒོས་སྙིང་པོ་ཏིལ་ཙམ་མི་འདུག་པས། །ཡུན་ཐུང་ཚེ་འདིའི་བློ་སྣ་བསྒྱུར་བྱས་ཏེ། །ད་ནས་སྙིང་པོའི་ལྷ་ཆོས་བྱེད་པར་བྱ། །དར་མའི་ན་ཚོད་དབྱར་གྱི་མེ་ཏོག་ཙམ། །མཛེས་པའི་བཀྲག་མདངས་དགུན་གྱི་འཇའ་ཚོན་ཙམ། །མི་ཡི་ཚེ་ལ་ཡུན་ལོང་མི་འདུག་པས། །ད་ནི་སྙིང་པོའི་ལྷ་ཆོས་བྱེད་པར་བྱ། །སྡུག་བའི་དུས་སུ་སྐྱིད་པའི་ཐབས་ལ་རེ། །སྐྱིད་པའི་དུས་སུ་སྡུག་བསྔལ་ཡོང་གིས་དོགས། །རེ་དོགས་འཕྲང་ལས་ཐར་དུས་མི་འདུག་པས། །ད་ནི་སྙིང་པོའི་ལྷ་ཆོས་བྱེད་པར་བྱ། །གཅེས་པར་བསྐྱངས་ཀྱང་ནད་དང་གཅོང་གི་གཞི། །རྒྱན་གྱིས་མཛེས་ཀྱང་མི་གཙང་རང་བཞིན་ཉིད། །མི་རྟག་ལུས་ལ་སྙིང་པོ་མི་འདུག་པས། །ད་ནི་སྙིང་པོའི་ལྷ་ཆོས་བྱེད་པར་བྱ། །ཕྱུག་པོ་ཕྱུག་པོའི་ས་ནས་སྡུག་གཏམ་བྱེད། །དབུལ་པོ་དབུལ་པོའི་ས་ནས་སྨྲེ་ངག་འདོན། །མི་རེའི་སེམས་ལ་སྡུག་བསྔལ་ཁུར་པོ་རེ། །འཁོར་བའི་གནས་ན་བདེ་བའི་སྐབས་མ་མཆིས། །སྤྱིར་ན་ཕྱི་རོལ་བདེ་སྡུག་སྣང་བ་ཀུན། །རང་གི་སེམས་ཉིད་གཅིག་པོའི་ཆོ་འཕྲུལ་ཏེ། །ནང་གི་གཟུགས་བརྙན་ཕྱི་རུ་འཆར་བ་ལས། །ཕྱི་ཡི་རྣམ་པ་ཚུར་ལ་འོངས་པ་མིན། །དེ་ལྟར་ལེགས་པར་གོ་ནས་དཔྱད་པ་ཡིས། །ཀུན་གཞི་སེམས་ཀྱི་རྩ་བ་ཆོད་པའི་ཚེ། །སྣང་བའི་ན་བུན་འདི་ཡི་ཕ་རོལ་ན། །ཆོས་ཉིད་དོན་གྱི་ནམ་མཁའ་དངོས་སུ་བཞུགས། །ཡོད་ཅེས་བྱ་བ་འདི་ཡང་བཅོས་མ་སྟེ། །མེད་ཅེས་བྱ་བ་འདི་ཡང་བཅོས་མ་ཉིད། །དེ་འདྲའི་བཅོས་མ་ཀུན་གྱིས་མ་བསླད་པ། །སེམས་ཀྱི་རང་བཞིན་རྫོགས་པའི་སངས་རྒྱས་ཡིན། །ཡིན་མིན་རྣམ་རྟོག་ཆུ་ཡི་གཉེར་མ་བཞིན། །གཅིག་རྗེས་གཅིག་གིས་མཐུད་དེ་འགྲོ་བ་འདི། །གཏོད་མེད་ངང་དུ་ལྷོད་ཀྱིས་ཞིགས་པའི་ཚེ། །ཆོས་དབྱིངས་གདོད་མའི་རྒྱ་མཚོར་སླེབས་པ་ལགས། །མདོར་ན་སྣང་བ་སེམས་ཀྱི་ཆོ་འཕྲུལ་ཏེ། །སེམས་ནི་སྟོང་པ་གཞི་མེད་རྩ་བྲལ་ཉིད། །གཞི་མེད་ཆོས་ལ་བདག་ཏུ་བཟུང་བ་ཡིས། །ཁྱོད་དང་ང་ཡང་འཁོར་བའི་གནས་སུ་འཁྱམས། །ད་ནི་སྣང་བའི་རྗེས་སུ་མ་འབྲང་བར། །སྣང་མཁན་ཁོ་ལ་ཅེར་གྱིས་བལྟས་པའི་ཚེ། །བརྗོད་དུ་མེད་པའི་རང་ངོ་མཐོང་འགྱུར་པས། །སངས་རྒྱས་ཐོབ་པའི་ལམ་དེ་ཐག་མི་རིང་། །དེ་ལྟར་རྩ་གསུམ་ལྷ་ཡི་བྱིན་རླབས་ཀྱིས། །མྱུར་དུ་རང་སེམས་སྟོང་བའི་རྩད་ཆོད་དེ། །ཀ་དག་རྫོགས་པ་ཆེན་པོའི་རྒྱལ་ས་ནས། །མཐའ་མེད་འགྲོ་བའི་དོན་ཆེན་བྱེད་པར་ཤོག ། ཅེས་པ་འདི་ཡང་སྙིང་པོའི་ཆོས་ལ་ཕྱོགས་པ་སྒྲོལ་མ་གཡང་འཛོམས་ཀྱི་ངོར་རྒྱལ་ཁམས་པ་དགེ་འདུན་ཆོས་འཕེལ་གྱིས་བྲིས་པའོ།།
