གཏམ་བཤད་གནང་བཞིན་པ།
ཁོང་ནི་༡༩༣༡ལོར་ཁམས་འབའ་ཐང་ས་ཁུལ་དུ་སྐྱེས། དཀར་མཛེས་ཁུལ་མི་རིགས་ལས་བྱེད་སློབ་གྲྭའི་སློབ་སྤྱི་དང་དེའི་ཏང་སྤྱི་ཀྲི་པུ་ཧྲུའུ་ཅིའི་འགན་བཞེས། དེ་ནས་རྔ་བ་བོད་རིགས་རང་སྐྱོང་ཁུལ་ཁུལ་ཨུའི་ཧྲུའུ་ཅི་དང་པོའི་འགན་བཞེས་པ་དང་། ཞོར་དུ་ཁུལ་གསར་བརྗེ་ཨུ་ཡོན་ལྷན་ཚོགས་ཀྱི་ཀྲུའུ་རེན་དང་ཁུལ་སྲིད་གྲོས་ཀྱི་ཀྲུའུ་ཞི། ཡན་ལག་དམག་ཁུལ་གྱི་ཆབ་སྲིད་ཨུ་ཡོན་དང་པོ་བཅས་ཀྱི་འགན་བཞེས། ཀྲུང་གུང་བོད་རང་སྐྱོང་ལྗོངས་ཨུ་ཡོན་ལྷན་ཚོགས་ཀྱི་ཧྲུའུ་ཅི་དང་། ཞོར་དུ་བོད་རང་སྐྱོང་ལྗོངས་མི་དམངས་སྲིད་གཞུང་གི་ཀྲུའུ་ཞི་གཞོན་པ། བོད་རང་སྐྱོང་ལྗོངས་སྲིད་གྲོས་ཀྲུའུ་ཞི་བཅས་ཀྱི་འགན་བཞེས། ཀྲུང་གུང་བོད་རང་སྐྱོང་ལྗོངས་ཨུ་ཡོན་ལྷན་ཚོགས་ཏང་གི་ལོ་རྒྱུས་ཡིག་ཆ་འཚོལ་སྡུད་ཨུ་ཡོན་ལྷན་ཚོགས་ཀྱི་ཀྲུའུ་རེན། ཀྲུང་གུང་ཀྲུང་དབྱང་ས་གནས་ནད་སྣ་འགོག་བཅོས་དབུ་ཁྲིད་ཚོ་ཆུང་ཁོངས་མི་སོགས་ཀྱི་འགན་བཞེས་མྱོང་། ལས་གནས་སི་ཁྲོན་ཞིང་ཆེན་དུ་ཚུར་སྤོས་རྗེས། སི་ཁྲོན་ཞིང་ཆེན་གྱི་སྲིད་གྲོས་ཀྲུའུ་ཞི་གཞོན་པ་དང་། ཀྲུང་གུང་སྐབས་བཞི་པའི་སི་ཁྲོན་ཞིང་ཆེན་ཨུ་ཡོན་ལྷན་ཁང་གི་ཨུ་ཡོན། གཞན་ཡང་གུང་གཞོན་ཚོགས་པ་རྫོང་ཨུ་ཧྲུའུ་ཅི་དང་ཁུལ་ཨུ་ཧྲུའུ་ཅི། གུང་གཞོན་ཚོགས་པ་སི་ཁྲོན་ཞིང་ཆེན་ཨུ་ཡོན་ལྷན་ཁང་གི་ཧྲུའུ་ཅི་གཞོན་པ། ཞིང་ཆེན་གཞོན་ནུ་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་གཞོན་པ། གུང་གཞོན་ཚོགས་པ་རྒྱལ་ཡོངས་སྐབས་གསུམ་པ་དང་བཞི་པའི་ཀྲུང་དབྱང་གསབ་སྒུག་ཨུ་ཡོན་བཅས་ཀྱི་འགན་བཞེས་མྱོང་། ༡༩༩༨ལོར་སྤྱི་ཟླ་༡༢པའི་ནང་ལས་འཁྱུར་ངལ་གསོ་གནང་། དེ་ནས་སི་ཁྲོན་ཞིང་ཆེན་ཕྱི་རབས་པ་སེམས་འཁུར་ལས་དོན་ཨུ་ཡོན་ལྷན་ཁང་གི་བློ་འདོན་པ་དང་། ཀྲུང་གུང་རྒྱལ་ཡོངས་སྐབས་བཅུ་གཅིག་པ། སྐབས་བཅུ་གཉིས་པ། སྐབས་བཅུ་གསུམ་པ་བཅས་ཀྱི་འཐུས་མི། སྐབས་བཅུ་གཉིས་པའི་ཀྲུང་གུང་ཀྲུང་དབྱང་གསབ་སྒུག་ཨུ་ཡོན། སྐབས་བདུན་པའི་རྒྱལ་ཡོངས་དམངས་ཆེན་འཐུས་མི་བཅས་ཀྱི་འགན་བཞེས།
ཚོགས་འདུར་ཞུགས་པ།
ཚོགས་འདུར་ཞུགས་པ།
མཛད་འཕྲིན་གཙོ་བོའི་སྐོར་རགས་ཙམ་ཞུས་ན། ཏང་སྲིད་ལས་དོན་དུས་ཡུན་རིང་པོར་སྒྲུབ་ལ། རིག་པའི་གཞུང་ལུགས་ཀྱི་རྨང་གཞི་ཆེས་བཟང་བ་དང་། ལག་ལེན་ཉམས་མྱོང་ཕུན་སུམ་ཚོགས་པོ་ཡོད་པ། སྡེ་དགེ་རྫོང་དང་། རྔ་བ་ཁུལ། སི་ཁྲོན་ཞིང་ཆེན་སྲིད་གྲོས། བོད་རང་སྐྱོང་ལྗོངས་སོགས་སུ་ལས་དོན་སྒྲུབ་རིང་། ཏང་གི་མི་རིགས་སྲིད་ཇུས་སམ་མི་རིགས་ས་ཁུལ་གྱི་རང་སྐྱོང་སྲིད་ཇུས། འཐབ་ཕྱོགས་གཅིག་གྱུར་དང་ཆོས་ལུགས་སྲིད་ཇུས་ནན་ཏན་གྱིས་ལག་ལེན་དོན་འཁྱོལ་གནང་།
རིག་དངོས་རྟོག་ཞིབ་གནང་བཞིན་པ།
གེ་སར་རིག་པའི་ཞིབ་འཇུག་པ་ཆེན་མོ་འཇམ་དཔལ་རྒྱ་མཚོ་སོགས་དང་ལྷན་དུ་རིག་དངོས་རྟོག་ཞིབ་གནང་བཞིན་པ།
ལོ་བཅུའི་རིང་གི་རིག་གནས་གསར་བརྗེ་ཆེན་པོའི་སྐབས། གྱེན་ལོག་ཤོག་ཁག་གིས་རྒྱལ་ཁབ་ཕྱི་ནང་ཀུན་ཏུ་གྲགས་པ་ཆེ་བའི་སྡེ་དགེ་པར་ཁང་གཏོར་བཤིག་གཏོང་གྲབས་ཡོད་པ་རྟོགས་ནས། ཁོང་གིས། རང་ཉིད་ཀྱང་མ་རྩ་རིང་ལུགས་པ་ཟེར་ནས་མནར་གཅོད་ཕོག་བཞིན་པ་ལ་མ་འཛེམ་པར། ཐབས་མཁས་པོས། ཀྲུའུ་ཙུང་ལི་ལ་དངོས་ཡོད་གནས་ཚུལ་ཞུས་ཏེ་སྲུང་སྐྱོབ་གནང་དགོས་པའི་རེ་བ་བཏོན་པ་ལྟར། ཙུང་ལིས་ཀྱིས་སྡེ་དགེ་པར་ཁང་སྲུང་སྐྱོབ་བྱ་དགོས་ཞེས་པའི་བཀའ་གནང་ལ་བརྟེན་ནས་སྡེ་དགེ་པར་ཁང་ལ་གཏོར་བཤིག་ཚབས་ཆེན་བྱུང་མ་ཐུབ། རྗེས་ནས་རྒྱལ་ཡོངས་ཀྱི་གལ་ཆེའི་རིག་དངོས་སྲུང་སྐྱོབ་བྱེད་ཡུལ་དུ་གཏན་འཁེལ་གནང་། བོད་ལྗོངས་དང་རྔ་བ་ཁུལ་སོགས་སུ་བཞུགས་སྐབས། གོང་རིམ་གྱི་རེ་བ་ལྟར། ཕྱོགས་ཡོངས་སུ་ཏང་གི་ལམ་ལུགས། བྱེད་ཕྱོགས་དང་སྲིད་ཇུས་ལག་ལེན་མཐར་ཕྱིན་གནང་བ་དང་། ཕྱོགས་སོ་སོའི་སྲིད་ཇུས་དོན་འཁྱོལ་ཡོང་བ་ལ་དམ་འཛིན་ལྷོད་མེད་གནང་། རྔ་བ་ཁུལ་སྒྲིག་སྒྱུར་ཅུས་དང་། རྔ་བ་ཁུལ་དགེ་འོས་ཆེད་སྦྱོང་སློབ་གྲྭ་དང་འབའ་ཁམས་སློབ་འབྲིང་གི་བོད་ཡིག་འཛིན་གྲྭ། རྔ་བ་ཁུལ་མཛོད་དགེ་བོད་ཡིག་སློབ་འབྲིང་དང་དེའི་ནང་གི་བོད་ལུགས་ཕྱུག་རིགས་སྨན་པའི་འཛིན་གྲྭ། བོད་ལུགས་གསོ་རིག་འཛིན་གྲྭ། གཞན་ཡང་བོད་ཡིག་པར་ཁང་དང་སྐབས་མང་པོའི་བོད་ཡིག་གསོ་སྦྱོང་འཛིན་གྲྭ་སོགས་བཙུགས་པ་དང་བོད་ཡིག་སློབ་དེབ་ཀྱང་རྩོམ་སྒྲིག་གནང་། ༡༩༩༢ལོ་ནས་༡༩༩༤ལོའི་བར། སི་ཁྲོན་སློབ་ཆེན་དུ་རབ་འབྱམས་ཞིབ་འཇུག་སློབ་མའི་འཛིན་གྲྭ་འཛུགས་རྒྱུར་མངགས་བཅོལ་བྱས་ནས། གྲངས་ཉུང་མི་རིགས་ཀྱི་སློབ་མ་༢༢སློབ་ཞུགས་དང་། མཐར་རབ་འབྱམས་ཞིབ་འཇུག་སློབ་མ་༡༧གསོ་སྐྱོང་གནང་བས། ཁུལ་དང་རྫོང་། སྤྱི་ཚོགས་སྟེང་གི་མི་རྣམས་ཀྱིས་གཟེངས་བསྟོད་ཆེན་པོ་ཐོབ་ཡོད།
ཁོང་གིས་གཙོ་སྒྲིག་གནང་བའི་《སི་ཁྲོན་བོད་རིག་པའི་ཞིབ་འཇུག》་གི་དཔེ་ཆ།
བོད་ལྗོངས་སུ་ཕྱག་ལས་གནང་སྐབས། བོད་ཀྱི་སྐད་ཡིག་དང་བོད་ལུགས་གསོ་རིག་ཉམས་པ་སོར་ཆུད་དང་མ་ཉམས་གོང་འཕེལ་གཏོང་ཆེད། ནུས་ཤུགས་ཆེན་པོའི་སྒོས་ཕྱོགས་ཡོངས་ནས་བོད་ཀྱི་སྐད་ཡིག་སློབ་སྦྱོང་དང་བེད་སྤྱོད། སྐད་གཉིས་སློབ་ཁྲིད་འཕེལ་རྒྱས། བོད་ལུགས་རིག་གནས་དར་སྤེལ། སྔོན་ཐོན་ཅན་གྱི་མི་རིགས་རིག་གནས་སློབ་སྦྱོང་བྱེད་པ་སོགས་དར་སྲོལ་བཏོད་ཡོད་དེ། བོད་ལྗོངས་སློབ་གྲྭ་ཆེན་མོ་སྒྲིག་འཛུགས་གནང་བ་དང་། བོད་ལུགས་གསོ་རིག་སློབ་གླིང་དང་། བོད་སྨན་ནད་བཅོས་སྡོད་ཁང་སོགས་འཛུགས་རྒྱུའི་གྲ་སྒྲིག་ཀྱང་གནང་། རྗེས་ནས་བོད་རིག་པའི་ཞིབ་འཇུག་ལས་དོན་འཕེལ་རྒྱས་གཏོང་ཆེད། སི་ཁྲོན་བོད་རིག་པ་ཞིབ་འཇུག་སློབ་གླིང་དང་སི་ཁྲོན་བོད་རིག་པ་ཞིབ་འཇུག་ཁང་གསར་བཙུགས་གནང་ནས་ལས་ཁུངས་དེ་གཉིས་སུ་གླིང་གཙོ་དང་ཚོགས་གཙོའི་འགན་བཞེས། ཞིང་ཆེན་རིམ་པའི་བོད་རིག་པ་ཞིབ་འཇུག་དང་བགྲོ་གླེང་ཚོགས་འདུ་ཐེངས་མང་པོར་འཚོགས་པ་དང་། སི་ཁྲོན་བོད་རིག་པ་ཞིབ་འཇུག་ཅེས་པའི་དཔེ་དེབ་དང་པོ་ནས་བཅུ་དྲུག་པའི་བར་དང་། བོད་རིག་གཏམ་དཔེ་ཕྱོགས་སྒྲིག་བཅས་ཀྱི་གཙོ་སྒྲིག་པའི་འགན་ཁུར་བ་སོགས་མི་རིགས་རིག་གནས་དང་སློབ་གསོ་ལས་དོན་འཕེལ་རྒྱས་འགྲོ་བ་ལ་ཕན་འབྲས་གྲུབ་པའི་ཕྱག་རྗེས་བསམ་གྱིས་མི་ཁྱབ་པ་ཞིག་བཞག་ཡོད་དོ། །
