ལི་ཐང་རྫོང་གྲོང་རྡལ་ཆ་ཚང་སློབ་ཆུང་གི་ལྟད་མོ་ཡག

ལི་ཐང་རྫོང་གྲོང་རྡལ་ཆ་ཚང་སློབ་ཆུང་བཞི་པའི༢༠༡༨ལོའི་བོད་ཡིག་ཚན་ཁག་གི་ན་གཞོན་དགེ་རྒན་གྱི་ནུས་རྩལ་འགྲེམས་སྟོན༼ལང་ཚོའི་མཆོད་པ་འབུལ།རང་ཉིད་མངོན་འགྱུར་བྱེད།༽ཅེས་པའི་རིག་རྩལ་སྤྲོ་ཚོགས་ཆེན་མོ།

གཅིག ཐོག་མའི་སེམས་འདུན།

ལྔ་བཞི་ན་གཞོན་དུས་ཆེན་ནི་ཀྲུང་གོ་རྒྱལ་ཁབ་ཀྱི1919 ལོའི་བཙན་རྒོལ་རྒྱལ་གཅེས་ཀྱི་ལྔ་བཞིའི་ལས་འགུལ་ལས་བྱུང་བ་ཡིན་པ་དང་། ལྔ་བཞི་རྒྱལ་གཅེས་ལས་འགུལ་ནི་བཙན་རྒྱལ་རིང་ལུགས་དང་བཀས་བཀོད་རྒྱུད་འཛིན་རིང་ལུགས་ལ་ངོ་རྒོལ་བྱས་པའི་རྒྱལ་གཅེས་ལས་འགུལ་ཞིག་ཡིན། ཡང་ན་ཀྲུང་གོའི་དམངས་གཙོ་གསར་པའི་རིང་ལུགས་བཅོས་སྒྱུར་གྱི་མགོ་རྩོམ་ས་ཡང་ཡིན།

1939ལོར། ཧྲན་ཀན་ལིན་མཐའ་ཁུལ་གྱི་ནུབ་བྱང་གཞོན་ནུའི་རྒྱལ་སྐྱོབ་མཉམ་འབྲེལ་ལྷན་ཚོགས་ཀྱིས་ཟླ5པའོ་ཚེས4ཉིན་ཀྲུང་གོའི་ན་གཞོན་དུས་ཆེན་ལ་གཏན་ཁེལ་བྱས་པ་རེད། དེ་བས་ངེད་སློབ་གྲྭས་ལྔ་བཞི་ན་གཞོན་དུས་ཆེན་ལ་རྗེས་དྲན་ཞུ་བའི་ཆེད་དུའམ་དགེ་རྒན་ཕན་ཚུན་བར་གྱི་མཐུན་སྒྲིལ་ཇེ་དམ་དུ་འགྲོ་བའི་ཆེད་དུ། སློབ་མ་རྣམས་ལ་མིག་དཔེ་བཟང་པོ་ཞིག་སྟོན་པའི་ཆེད་དུ་བོད་ཡིག་དགེ་རྒན་ཚོས་གཙོར་བྱས་ཏེ་ལང་ཚོའི་མཆོད་པ་འབུལ་རང་ཉིད་མངོན་འགྱུར་བྱེད་ཅེས་པའི་རིག་རྩལ་སྤྲོ་ཚོགས་ཤིག་གྲ་སྒྲིག་བྱས་པ་ཡིན།

འདི་དམིགས་ཡུལ་གཙོ་བོའམ་ཐོག་མའི་སེམས་འདུན་ནི། སློབ་གྲྭ་ཞིག་ལ་མཚོན་ན་སློབ་གསོ་དང་སློབ་ཁྲིད་གཙོ་བོ་ཡིན་པར་མ་ཟད། དེ་དང་མཉམ་དུ་སློབ་མ་ཚོའི་ཕྱོགས་ཡོངས་ཀྱི་ནུས་པ་གསོ་སྐྱོང་བྱེད་པ་ཡང་དགེ་རྒན་ཞིག་གམ་སློབ་གྲྭ་ཞིག་ལ་མཚོན་ན་གཡོལ་དུ་མེད་པའི་འོས་འགན་ཞིག་ཡིན་པས། སློབ་ཁྲིད་སློབ་གསོ་དང་མཉམ་དུ་བྱ་འགུལ་འདྲ་མིན་སྤེལ་ཏེ་སློབ་མ་ཕྱོགས་ཡོངས་ནས་གསོ་སྐྱོང་བྱེད་པའི་ཆེད་དུ་ཡིན་ནོ།།

གཉིས། བྱ་བའི་བརྒྱུད་རིམ།

བྱ་འགུལ་འདི་བོད་ཡིག་ཚན་ཁག་གིས་གཙོ་འགན་བཞེས་ཤིང་བོད་ཡིག་ཚན་ཁག་གིས་བྱ་བའི་ཐོག་མཐའ་བར་གསུམ་དུ་འགན་ཁུར་བྱེད་རྒྱུ་ཡིན་པས། གླུ་དབྱངས་ལེན་མཁན་དང་ཞབས་བྲོ་འཁྲབ་མཁན་ཚང་མ་བོད་ཡིག་ཚན་ཁག་ལས་བདམས་ཤིང་།སྦྱོང་བརྡར་གྱི་གོ་རིམ་ཆ་ཚང་ལ་བོད་ཡིག་ཚན་ཁག་གི་ཚོགས་གཙོས་འགན་བཞེས་ཏེ་བསྒྲུབས་པ་ཡིན། དེ་ལ་ཐོག་མར་བོད་ཡིག་དགེ་རྒན་རྣམས་ལས་གླུ་གར་གཞས་གསུམ་ལ་སྤྲོ་མོས་ཆེ་བའི་དགེ་རྒན་རྣམ་པ་གཙོ་བྱས་པ་དང་། དེའི་ཁར་གླུ་གར་གཞས་གསུམ་གྱི་ཕྲ་ཕུང་ལྡན་པའི་དགེ་རྒན་རྣམས་ཁ་སྣོན་བྱས་ཏེ་མི་སྣ་འདང་བར་བྱས་པ་ཡིན།

གསུམ། མཇུག་གི་རེ་སྨོན།

བྱ་འགུལ་འདི་བརྒྱུད་ནས་དགེ་རྒན་ཕན་ཚུན་བར་གྱི་མཛའ་བརྩེ་དང་མཐུན་སྒྲིལ་ཇེ་བཟང་དུ་འགྲོ་བ་དང་། དགེ་རྒན་ནི་མ་གཞི་ནས་སློབ་མའི་སྣེ་ཁྲིད་པ་ཡིན་པའི་ཆ་ནས་སྔར་ལས་སློབ་མ་ཚོར་མིག་དཔེ་བཟང་པོ་ཞིག་སྟོན་ཐུབ་པའི་རེ་སྨོན་ཡོད་ལ། མ་འོངས་པར་སྔར་ལས་ལྷག་པའི་སྒོ་ནས་སློབ་མ་ཚོར་སེམས་ཁུར་དང་སློབ་གསོ་གནང་བ་དང་།

ཁྱད་པར་དུ་སློབ་མ་ཚོར་མིག་དཔེ་ལེགས་པོ་སྟོན་པའི་ཆེད་དུ་དགེ་རྒན་རྣམ་པས་གཙོ་བྱས་ཏེ་བྱ་འགུལ་འདྲ་མིན་སྤེལ་བའི་རེ་བ་ཆེ ། དེ་ལས་ཀྱང་མི་རིགས་ཀྱི་ཁྱད་ཆོས་ལྡན་ཞིང་གནའ་དེང་གི་ཤེས་བྱ་མཐའ་དག་ཟུང་དུ་འབྲེལ་བའི་སློབ་གསོ་དང་འཁྲབ་སྟོན་འདྲ་མིན་སྤེལ་བའི་རེ་འདུན་ཡོད།