༄༅། །དག་གཙང་ཡིད་འོང་གི་ཕ་ཡུལ་རྫ་ཆུ་ཁ།

༑དག་གཙང་ཡིད་འོང་གི་ཕ་ཡུལ་རྫ་ཆུ་ཁ།

ཁམས་མེ་ཞགས།

གནམ་སྔོན་པོ་གོས་ཀྱིས་བཀླུབས་པའི་ཐུ་འོག་ན།
ས་དོག་མོ་གདན་དུ་བཏིངས་པའི་ཡང་སྟེང་ན།
ངའི་ཚེ་སྲོག་གི་ལྟེ་ཁྲག་ཐོག་མར་འཕོ་ས།
ངས་ངུ་ངག་གི་དབྱངས་རྟ་ཐོག་མར་འཐེན་ས།
ངའི་མི་ཡུལ་གྱི་འཇིག་རྟེན་ལ་ཁ་དོག་བཀྲ་ས།
ངས་མི་ཚེ་ཡི་མདུན་ལམ་ལ་དབུ་ཁྱུད་འབྲི་ས།
གནས་འདི་ན་སངས་རྒྱས་ཀྱི་བསྟན་པ་དར་ཡོད།
ཡུལ་འདི་ན་རྒྱུ་འབྲས་ཀྱི་བློ་མིག་འཛོམས་ཡོད།
སྡེ་འདི་ན་ཡ་རབས་ཀྱི་སྲོལ་བཟང་གོམས་ཡོད།
གྲོང་འདི་ན་དུས་རབས་ཀྱི་གོམ་འགྲོས་མྱུར་ཡཱ།
ཕ་ཡུལ་ལགས། ཕ་ཡུལ་ཨ། རྫ་ཆུ་ཁ།
ངའི་དག་གཙང་ཡིད་འོང་གི་ཕ་ཡུལ།
རྫུ་ཆུ་ཁ། རྫ་ཆུ་ཁ། རྫ་ཆུ་ཁ།
རྫ་ཆུ་ཁ།
གངས་ལྷུན་པོའི་དབུ་རྩེ་དགུང་ལ་ཟུག་ཡོད།
སྤྲིན་དཀར་པོའི་དབུ་ཞྭ་རྒྱན་དུ་མནབས་ཡོད།
ཆུ་གཙང་བོའི་རླབས་རྒྱུན་མཚོ་མོར་འདྲེས་ཡོད།
ཉ་གསེར་མིག་ཁྱུ་ཚོགས་གར་གྱིས་འཁྱུག་ཡོད།

གྲོགས་པོ་ལགས། ཁྱོད་ཀྱིས་གཟིགས་དང་།
མཐིང་སྨུག་སྦྲ་ནག་གི་ཁ་འཚུབ་ནས་མཆེད་པའི་དུད་སྤྲིན་དེས།
རྒྱང་རིང་གི་ཕྱོགས་མཚམས་ཀུན་ནས་ཕེབས་པའི་
སྐུ་མགྲོན་ཡོངས་ལ།
ལྷ་བསང་གཏོང་གིན་བསུ་མ་བྱེད།
རི་བོ་མཐོན་པོའི་དབུ་རྩེ་ན་སྐྱོད་པའི་དར་ལྕོག་དེས།
སྐྱབས་འཇུག་དང་རེ་སྨོན་ཞུ་བཞིན།
ཁྱོད་ལ་དགའ་བསུ་ཡི་ཐལ་མོ་རྡེབ།
གྲོགས་པོ་ལགས། ཁྱོད་ཀྱིས་གསོན་དང་།
ལྷས་ར་གྲུ་བཞིའི་འགྲམ་ངོགས་ན་བཞུར་བའི་གཙང་ཆབ་སྔོན་མོས།
སྙན་ལྷང་ལྷང་གི་ཤག་སྒྲ་དེ་སྒྲོག་གིན།
སྐྱེ་འགྲོ་ཡོངས་ཀྱི་སྐོམ་པའི་གདུང་བ་སེལ།
ནོར་འཛིན་སྒེག་མོའི་མཛེས་སྡུག་ལ་འཁྲེང་བའི་ཁུ་བྱུག་གིས།
སྙན་འགྱུར་གྱི་གསུང་དབྱངས་སྒྲོག་གིན།
ཁྱོད་ལ་ཕེབས་བསུ་ཡི་གཞས་ཆུང་ལེན།
གྲོགས་པོ་ལགས། དགའ་བསུ་ཞུ།
ཁྱེད་རང་ངའི་ཕ་ཡུལ་དུ་ཕེབས་པར་དགའ་བསུ་ཞུ།
ངའི་དག་གཙང་ཡིད་འོང་གི་ཕ་ཡུལ་དུ་ཕེབས་པར་
དགའ་བསུ་ཞུ་ལགས།
རྫ་ཆུ་ཁ། མཛེས་སྡུག་གི་ཕ་ཡུལ།
བདེ་སྐྱིད་ཀྱི་ཞིང་མཆོག
རྫ་ཆུ་ཁ།
རྫ་ཆུ་ཁ།
ངའི་རྣམ་ཤེས་ཀྱི་གནས་མལ་དྲོན་མོ།
ངའི་རྟག་བརྟན་གྱི་ཕ་ས་ཕ་ཡུལ།
ཁྱེད་ནི་ནམ་ཡང་ནུབ་པ་མེད་པའི་སེམས་ཁོང་གི་ཉི་མ་སེར་པོ།
ཁྱེད་ནི་ནམ་ཡང་གཟིམ་པ་མེད་པའི་འོད་སྣང་གི་མར་མེ་ཚེ་འབར།

རྫ་རི་མཐོན་པོའི་བྲག་ཐེམ་ན་འཕུར་བའི་ཐང་དཀར་རྒོད་པོ།
རྫ་ཆུ་དྭངས་མོའི་གཏིང་རིམ་ན་འཁྱུག་པའི་གསེར་མིག་ཉ་ཆུང་།
རྩྭ་ཐང་ཡངས་པོའི་བྲང་གཞུང་ན་རྩེན་པའི་རྟ་ནོར་ལུག་གསུམ།
བྱང་ཐང་སྐྱ་མོའི་པང་ཁུག་ན་འཚོ་བའི་རྐྱང་འབྲོང་གཙོད་གསུམ།
འདི་དག་ནི་ཕ་ཡུལ་ཁྱོད་ཀྱི་མཛེས་སྡུག་ལ་ཆཊ་པའི་རྣམ་ཤེས་དང་།
ཕ་ཡུལ་ཁྱོད་ཀྱི་ལོངས་སྤྱོད་ལ་རོལ་བའི་འདྲ་མཉམ་གྱི་ཚེ་སྲོག་དེ་
ཡིན་ཡཱ།

ཡངས་པའི་སྤང་ལྗོངས་ན་ལྷོད་ཀྱིས་འཁྱུད་པའི་འབྲོག་སྡེ་ཕྱུག་མོ།
ལེཊ་པའི་གཤིན་ས་ན་ལྷམ་མེར་ཆཊ་པའི་ཞིང་སྡེ་གྲུ་བཞི།
གནས་འདི་ན་ཞོ་དང་འོ་མའི་རྒྱ་མཚོ་འཁྱིལ་ཡོད།
མར་དང་ཕྱུར་བས་རི་རབ་བརྩིགས་ཡོད།
གནས་འདི་ན་གྲོ་སོ་ཕྱེ་མར་མཆོད་པ་ཕུལ་ཡོད།
ནས་ཆང་བདུད་རྩི་གཙང་བཞེས་གནང་ཡོད།
ད་དུང་ཡང་། གནས་འདི་ན།
དད་གུས་ཀྱི་འདུན་པ་བརྟན་པོ་ཡོད།
གཞན་ཕན་གྱི་ཡ་རབས་གོམས་སྲོལ་ཡོད།
དེ་ལས་ཀྱང་། ད་དུང་།
གནས་འདི་ན།
རྟེན་འབྱུང་གི་ལྟ་གྲུབ་གསོན་པོ་ཡོད།
འཚེ་མེད་ཀྱི་སྤྱོད་པ་རླབས་ཆེན་ཡོད།

ཕ་ཡུལ་ཡཱ། རྫ་ཆུ་ཁ།
ཁྱོད་ནི་གངས་ལྗོངས་ཀྱི་གཅེས་ཕྲུག
འཛམ་གླིང་གི་ཡང་རྩེ་ཡིན།
མི་ཡུལ་གྱི་དག་ཞིང་ཡིན།
ཁྱོད་ནི་བདེ་སྐྱིད་ཀྱི་གཞི་མ།
བྱམས་སེམས་དང་སྙིང་རྗེ་ཡི་འབྱུང་ཁུངས་ཡིན།
ཞི་བདེ་དང་མིའི་རིགས་ཀྱི་རེ་བ་དེའོ། །
དུས་རབས་ཉེར་གཅིག་པའི་གོམ་འགྲོས་འོག
ཕ་ཡུལ་དེ་མདུན་ནས་མདུན་དུ་སྐྱོད་ཀྱིན་ཡོད།
ཡང་དག་དྲང་བདེན་གྱི་སྲིད་ཇུས་འོག
ཕ་ཡུལ་ནི་གོང་ནས་གོང་དུ་འཕེལ་གྱིན་ཡོད།
དེ་ཡང་ལེ་ལོ་དང་གཡོ་སྒྱུ།
ཧམ་སེམས་དང་ལྐོག་ཟས།
རུལ་སུངས་དང་ཞབས་འདྲེན།
འདི་དག་ཡོད་ཚད་རིང་ནས་རིང་དུ་དོར་ཏེ།
གཞོན་སྐྱེས་ལ་ཤེས་རིག་གི་གཤོག་ཟུང་བསྩལ་ཡོད།
བགྲེས་སོང་ལ་དྲོད་ཁོལ་གྱི་ཁྱིམ་གཞིས་བསྐྲུན་ཡོད།
མི་དམངས་ཀྱི་འཚོ་བ་སྔར་ལས་དར་བཞིན་ཡོད།
དབུལ་ཕོངས་ཀྱི་དཀའ་ངལ་རིམ་བཞིན་བསལ་གྱིན་ཡོད།
དེ་ཡང་ལོས་ཡིན་ཏེ། རྒྱལ་ཁབ་ཀྱི་དབུ་ཆེན་མཆོག་གིས།
འདི་ལྟར་གསུངས་ཡོད་དེ།
དྲང་བདེན་རྒྱལ་གྱུར་ཅིག
ཞི་བདེ་རྒྱལ་གྱུར་ཅིག
མི་དམངས་རྒྱལ་གྱུར་ཅིག
—རླབས་ཆེན་གྱི་གསུངས་བཤད་འདི་བཞིན།
དེ་རིང་ང་ཚོས་ཀྱང་ཕ་ཡུལ་གྱི་འབྱུང་འགྱུར་ཆེད།
ལྷག་བསམ་གཙང་མས་ཁ་གཡང་ཞིག་ཅི་ལ་མི་འབོད།
ང་ཚོས་མཉམ་གཅིག་ཏུ་ཁ་གཡང་འབོད་ཡཱ།
ཕ་ཡུལ་ལགས།
ངའི་དག་གཙང་ཡིད་འོང་གི་ཕ་ཡུལ་ལགས། རྫ་ཆུ་ཁ།
ཁྱེད་ཀྱི་ཤེས་རབ་དང་རྣམ་དཔྱོད་དེ་རྒྱལ་གྱུར་ཅིག
སྟོབས་འབྱོར་དང་ལོངས་སྤྱོད་དེ་རྒྱལ་གྱུར་ཅིག
ཕུགས་བསམ་དང་རེ་བ་དེ་རྒྱལ་གྱུར་ཅིག ཕ་ཡུལ་ལགས།
ཁྱེད་ཀྱི་སྲིད་འབྱོར་རིག་གསུམ་དེ་ཡུན་ནས་ཡུན་དུ་བརྟན་གྱུར་ཅིག
རྣམ་པ་ཀུན་ཏུ་རྒྱལ་གྱུར་ཅིག ། ། །

མ་ཡུམ་སློབ་གླིང་གི་རང་ཤག་ཏུ་སྦྱར།
ཕྱི་ལོ༢༠༡༦། ༠༥། ༢༣། གཟའ་ཟླ་བ།