གཟུགས་མེད་ཨེ་ཛི་སྲོག་གི་གཤེད་མ་རེད།

࿐གཟུགས་མེད་ཨེ་ཛི་སྲོག་གི་གཤེད་མ་རེད།

གྱིན་འདའ་བ། ཁྲི་འདུ།

གང་གི་མཚན་ཅན་བཟང་པོ་ཐོས་པ་ཡི་སྟོབས་ཀྱིས།།

མི་འདོད་ནད་ཀྱིས་མནར་བའི་འགྲོ་བ་ཡི་སེམས་ཅན།།

ནད་གདོན་བག་ཆགས་ཞགས་ནག་ཐུ་འོག་ནས་བྲལ་ཏེ།།

སྡུག་བསྔལ་ནད་མེད་བདེ་བའི་དཔལ་ཀུན་ལ་རོལ་ཤོག།

ཐོག་མ་གང་ནས་བྱུང་བར་གཏན་འཁེལ་ཞིག་མ་ཡོད།།

བར་དུ་གང་ལ་འགོ་བར་གསལ་རྟོགས་ཤིག་མ་མཆིས།།

ཐ་མ་གང་ལས་ཐར་བའི་ཐར་ལམ་ཞིག་མ་ལོན།།

གཟུགས་མེད་ཨེ་ཛི་སྲོག་གི་གཤེད་མ་དངོས་ཡིན་ནོ།།

ལས་ངན་ལུས་ལ་ནད་རིགས་ཁྲི་འབུམ་ཞིག་ཁྱབ་ཀྱང་།།

རྣམ་རྟོག་སེམས་སུ་གདོན་འདྲེ་བརྒྱ་སྟོང་ཞིག་མཆིས་ཀྱང་།།

བདག་འཛིན་བདག་ལ་གནོད་བྱེད་གྲངས་མེད་ཅིག་ཡོད་རུང་།།

གཟུགས་མེད་ཨེ་ཛི་ནད་ཀྱི་རྒྱལ་པོ་ཞིག་ཡིན་ནོ།།

དཔའ་བོའི་ཚོགས་ཀྱིས་འདི་ཉིད་རྒོལ་ཐབས་ཤིག་མི་འདུག།

དཔའ་མོའི་སྡེ་ཡིས་འདི་ཉིད་གཞོམ་རྒྱུ་ཞིག་མ་ནུས།།

མཐུ་དང་སྔགས་ཀྱིས་འདི་ཉིད་སྒྲོལ་ནུས་ཤིག་མེད་མོད།།

གཟུགས་མེད་ཨེ་ཛི་བཙན་པོའི་གོ་ཁྲབ་ཅིག་ཡིན་ནོ།།

མཐོང་དུ་མེད་པའི་ཨེ་ཛི་ནད་ཡམས་འདི་ཁོག་ཅིག།

ཟློག་ཏུ་མེད་པའི་དུག་ཅན་རིམས་ནད་འདིར་གཟོབས་ཤིག།

ཟིན་དུ་མེད་པའི་ནད་ངན་རེག་དུག་འདི་སྤོངས་ཤིག།

ཨེ་ཛི་སྔོན་འགོག་ཀུན་གྱི་འོས་འགན་ཞིག་ཡིན་ནོ།།

12.1 འཛམ་གླིང་ཨེ་ཛིའི་ཉིན་མོར།

ཚུལ་མཐུན་མིན་པའི་ཕོ་མོའི་ལུས་འབྲེལ་ལས་མཆེད་ཅིང་།།

དུག་སེལ་མེད་པའི་སྨད་དཔྱད་ཡོ་བྱད་ལས་ཁྱབ་སྟེ།།

དུག་ཅན་ཨ་མའི་མངལ་དང་ནུ་བརྒྱུད་ནས་བགོ་བ།།

གཟུགས་མེད་ཨེ་ཛིའི་བརྒྱུད་ལམ་ཆེན་པོ་ནི་གསུམ་མོ།།

རྙེད་དཀའི་དོན་ལྡན་མི་ལུས་རིན་ཆེན་འདིར་ཉག་ན།།

ཟློག་ཏུ་མེད་པའི་ནད་ཡམས་ཆེན་པོ་འདིར་སྐྲག་ན།།

དོན་པོ་དབེན་པའི་སྨད་འཚོང་བྱ་བ་འདི་སྤངས་ཏེ།།

གཟུགས་མེད་ཨེ་ཛིའི་འགོག་པའི་ཐབས་ཤེས་ལ་བརྩོན་དགོས།།

དུག་ཅན་སྦྲུམ་མས་ཕྲུ་གུ་སྔོན་འགོག་ཏུ་བྱ་ཞིང་།།

དུག་ཅན་ཨ་མའི་ནུ་འོ་ལྡུད་མཚམས་སུ་འཇོག་སྟེ།།

དུག་ཅན་མ་ལོས་ཁ་ཡིས་ཟས་སྦྱིན་སོགས་སྤངས་ནས།།

གཟུགས་མེད་ཨེ་ཛི་འགོག་པའི་ཐབས་ལམ་དེ་བསླབ་དགོས།།

ཁྲབ་དང་ཁྲག་ཁབ་དོན་སྣོད་བརྗེ་བ་སོགས་འཛེམ་ཞིང་།།

གཞན་ལ་བཀོལ་པའི་སྨན་དཔྱད་ཡོ་ཆས་དག་གཟབ་ཏེ།།

སྨར་བཞར་སོ་ཕྱེས་སོ་ཐུར་ལ་སོགས་ལ་དོགས་ནས།།

གཟུགས་མེད་ཨེ་ཛི་སྔོན་འགོག་བྱ་བ་ལ་འབད་དགོས།།

མོ་ལུང་རྩིས་གསུམ་ཐུགས་ཀྱིས་མཁྱེན་ན་ཡང་མ་ཕོག།

ཚན་རྩལ་རིག་པའི་བློ་ཡིས་དཔྱད་ན་ཡང་མ་ཟིན།།

ཆེད་མཁས་སྨན་པའི་རྩལ་གྱིས་བརྟགས་པས་ཀྱང་མ་ནུས།།

གཟུགས་མེད་ཨེ་ཛི་གསང་བ་ལྐོག་གྱུར་ཅིག་ཡིན་ནོ།།