༄༅། །ཨ་མ་དྲན་པའི་ཐོལ་བྲིས།

དྲན་པ་སྤྲིན་ལ་འཁྱུད་པའི་སེམས་གཤིས་རྣལ་མ།

ཉི་མའི་གྲིབ་གཟུགས་ཐང་ལ་ཟགས་པའི་ཚུལ།

སྐྱོ་བའི་གཞན་ཡུལ་འདི་ནས་མཐོང་བའི་དུས།

སྙིང་ནས་བརྩེ་བའི་དྲིན་ཆེན་ཨ་མ་དྲན།

ཨ་མ་དྲན་པའི་སེམས་ཀྱི་མིག་ཆུ་དེ།

དཀར་གཙང་ཤོག་བུའི་སྟེང་ལ་བྲིས་པར་ཐལ།

དྲན་པས་མནར་བའི་གདོང་མདོག་སྐྱ་བོ་ལས།

ཐོལ་བའི་མིག་ཆུ་ལག་པས་ཕྱིད་བཞིན་དུ།

ཁྲུང་ཁྲུང་ལྷོ་ལ་འཕུར་བའི་སྟངས་ཀ་ལ།

བུ་ངས་སྐྱིད་སྡུག་བྲིས་པའི་ཡིག་ཆུང་བསྐུར།

ཡིག་ཆུང་འཁོན་འཁོན་ཐོགས་ཐོགས་མེད་པའི་ཐོག

གང་མགྱོགས་ཡུམ་ལ་འབྱོར་བའི་སྨོན་ལམ་འདེབས།

རང་ཁ་རང་གསོའི་ཁེར་རྐྱང་སེམས་གཅོང་ལ།

གཡང་དཀར་མ་མོས་ལུ་གུ་ཁྲིད་པའི་ཚུལ།

སྐྱོ་བའི་གཞན་ཡུལ་འདི་རུ་མཐོང་བའི་སྐབས།

དྲིན་ཅན་ཨ་མའི་བྱམས་བརྩེ་ལྷག་པར་དྲན།

དྲན་སེམས་གཤོག་པར་བརྐྱངས་ནས་ནི།

ཨ་མའི་པང་དུ་ལོག་རྒྱུ་བྱུང་ན་བསམ།

ཨ་མའི་ནུ་ཞོས་ང་ཡི་ཚེ་སྲོག་བསྐྱངས།

བྱམས་པའི་དྲིན་གྱིས་ང་ཡི་ལང་ཚོ་རྒྱས།

བརྩེ་བ་ཆེན་པོས་ང་རང་སློབ་གྲྭར་བསྐྱལ།

ཐུགས་རྗེའི་བཀའ་དྲིན་རི་རབ་ལས་ཀྱང་བརྗིད།

མཚུངས་མེད་དོ་ཟླ་བྲལ་བའི་མ་ཡུམ་མཆོག

སྐུ་ཚེ་སྔོན་མོའི་ཆུ་དང་མཉམ་པར་ཤོག

ཨ་མའི་ཚར་རྒྱུ་མེད་པའི་ཟིན་ཐོའི་ནང་།

བསམ་རྒྱུ་བུ་དང་དྲན་རྒྱུ་བུ་ལས་མེད།

རྒོད་རྒྱུ་བུ་དང་སྦྱིན་རྒྱུ་བུ་ལས་མེད།

གནམ་འོག་ཕ་མའི་ཐུགས་སེམས་ཨེ་མ་རྨད།

ཕ་མའི་ལྷག་བསམ་མཆོད་མེ་འོད་འབར་དེ།

བུ་ཕྲུག་བདེ་བའི་འོད་སྣང་རྒྱས་གྱུར་ཅིག

བུ་ཕྲུག་འཚར་བའི་རྒྱབ་ན་ཨ་མ་རྒས།

དེ་དུས་རྒྱན་དང་ཟས་ཕུད་ཅི་སྟེར་ཡང་།

འདོགས་པའི་ནམ་དུས་དང་ག་ཡོལ་ཟིན་པས།

དྲིན་ལན་རྒྱུན་དུ་འཇལ་དང་ཨ་མའི་བུ།

བསམ་བློ་སྔོན་ལ་བཏང་ན་མཁས་པ་དང་།

འགྱོད་པ་རྗེས་ལ་སྐྱེས་ན་གླེན་པ་ཡིན།

ད་ཆ་བུ་ཆུང་རང་མགོ་ཐོན་པའི་དུས།

ཨ་མའི་གམ་དུ་སྡོད་པའི་སྐལ་བ་ཕྲ།

དེས་ན་ཨ་མའི་སྐྱིད་སྡུག་གང་འདྲ་འདུག

དགུང་གི་ཟླ་བས་དྲང་པོར་གསུངས་རོགས་གནང་།

ཨ་མ་ང་ཡི་གཙུག་གི་ནོར་བུ་ཡིན།

ཨ་མ་ང་ཡི་ཡོད་ཚད་རེ་བ་ཡིན།

ཨ་མའི་མི་ཚེ་ཁ་ཆེ་ཕ་ལུར་གསལ།

ཨ་མའི་བུ་ཆུང་ཁ་ཆེ་ཕ་ལུུ་རེད།

ཨ་མ་གཙུག་ཏུ་བཀུར་ཤོག་ཨ་མའི་བུ།

ཨ་མ་ཡུན་ཏུ་གནས་ན་སྐུ་བསོད་རེད།

གནམ་འོག་ཨ་མའི་ཚོགས་རྣམས་ལ།

བདེ་བསྐྱིད་ཉི་མ་ཀུན་ཏུ་ཤར་གྱུར་ཅིག