སྙན་ངག་ཚན་པ་གཉིས།

དྭ་ཕྲུག་གི་ལས་དབང་།

སྒ་ལུང་བློ་བཟང་བསྟན་འཛིན་གྱིས།

མི་ཚེ་མི་རྟག་རྫོགས་པའི་ལམ་ཁ་ནས།།

སྐྱིད་སྡུག་མགོ་མཇུག་ནང་གི་མིའི་ཚེ་ཁྲོད།།

སེམས་ཕམ་སྐྱོ་བའི་ཀློང་གི་ན་ཟུག་སྟེ།།

དབང་མེད་དྭ་ཕྲུག་ཅིག་གི་སྙིང་ལ་གནས།།

ཞོགས་པའི་འཚམས་སྤྲིན་ཁྲོད་ཀྱི་མི་བུ་ང་།།

མིག་ཟུང་མཆི་མས་གང་པའི་ལོ་ཟླའི་ཁྲོད།།

སྡུག་གི་ཉི་མ་ཤར་བའི་ཕ་ཡུལ་ལ།།

ཁེར་རྐྱང་ལུས་པའི་ངུ་ངག་རི་ལུང་བཀང་།།

ཕར་བལྟས་ཨ་ཕའི་ངོ་གདོང་སྡུག་གིས་གང་།།

མར་བལྟས་ཕུ་བོ་མིག་ཟུང་མཆི་མས་བཞུར།།

ཡར་བལྟས་ཨ་མའི་མཚམས་ནས་མ་ཎི་འདོན།།

ཁྱིམ་ཚང་ཞིག་གི་འཚོ་བ་འདི་ལྟར་འཐོར།།

ལས་དབང་བསམ་ནག་ཅིག་གིས་ཁྱིམ་ཚང་གཏོར།།

མེ་ལྕེ་དམར་པོ་ཞིག་གིས་སྦྲ་ནག་བསྲེགས།།

ཕ་བུ་སྡུག་གི་མུན་པ་གཉིད་དུ་ཡུལ།།

བྱམས་ལྡན་ཨ་མའི་རྣམ་ཤེས་རླུང་གིས་ཁུར།།

དྭ་ཕྲུག་ཅིག་གི་ལོ་རྒྱུས་འབྱུང་རིམ་ནས།།

གང་སར་སོང་སྟེ་མི་ཚེ་འཚོ་ཐབས་བྱེད།།

ལང་ཚོ་རྒྱས་པའི་འཁོར་བའི་བཙོན་ར་ལས།།

སྙིང་ནས་འབབ་པའི་མིག་ཆུ་བཙན་གྱིས་ཤོར།།

དྭ་ཕྲུག་ཅིག་གི་ལས་དབང་འདི་ལྟར་གྲུབ།།

ཁེར་རྐྱང་ཅིག་གི་མི་ཚེ་འདི་ལྟར་བྱུང་།།

ལོ་རྒྱུས་ནང་གི་སྡུག་བསྔལ་མཚོ་ལས་ཟབ།།

ཕ་བུ་རྣམས་ཀྱི་འཚོ་རྟེན་འདི་ལྟར་ཤོར།།

ཞེས་ཆོས་ཀྱི་གདན་ས་ཆེན་མོ་བྱང་ཉི་མ་བླ་བྲང་བཀྲ་ཤིས་འཁྱིལ་ནས་བྲིས་པས་དགེ་བའི་རྒྱུ་རུ་འགྲོ་བར་སྨོན།

བོད་ཁྱིམ་ལོ་རྒྱུས་གསར་བ།

སྒ་ལུང་བློ་བཟང་བསྟན་འཛིན་གྱིས།

མཐོ་པོའི་རི་རྩེར་རྒྱ་མཚོ་འཁྱིལ་མི་སྲིད།།

རྒྱ་མཚོ་གཏིང་དུ་གངས་རི་ཆགས་པ་མེད།།

གངས་རི་སྒང་ལ་ཆོས་སྒྲ་དར་དཀའ་ཞིང་།།

དར་ཡང་ཉན་མཁན་བསོད་ནམས་རི་བོང་རྭ།།

ཕ་ཁྱིམ་སྦྲ་ནག་ལོ་རྒྱུས་རྟོགས་མཁན་ཉུང་།།

འབྲོག་ཕྲུག་རྣལ་མ་རླུང་གིས་པུར་བར་བྲེལ།།

འབྲོག་གི་ནོར་ལུག་ཚང་བས་ལག་ཏུ་གཡུག།

ཚང་བའི་ཁེ་ཕན་ཕལ་ཆེར་འབྲོག་ན་ཡོད།།

བོད་ཡུལ་ལུང་བ་ལུང་སྟོང་རན་པ་དང་།།

བོད་མི་ཕལ་ཆེར་གྲོང་ཉུལ་མི་རྗེས་སྙེག།

བོད་ཕྲུག་མང་ཤོས་བོད་སྐད་བརྗེད་པར་སྤྲོ།།

བོད་ཀྱི་མ་འོངས་མ་རྩ་བརླག་ལ་འཚང་།།

རྒས་པ་ཕལ་ཆེར་གཤིན་རྗེ་ཁྲིམས་ལ་དེད།།

གཞོན་པ་མང་བ་སྤོ་ལོའི་རྩེད་ཆས་རོལ།།

འདི་དག་ཡོད་ཚད་བསམ་བློ་ཞིབ་གཏོང་ན།།

ང་ཚོ་བོད་འདི་ཉམས་པའི་རྒྱུ་རྐྱེན་དངོས།།

ཕ་མའི་བསླབ་བྱ་སྤོ་ལོ་རྩེད་ཚུལ་བརྗོད།།

བུ་ཆུང་ཡོད་ཚད་སྤོ་ལོ་ཕྱོགས་སུ་འབད།།

ལོ་གྲངས་སོང་རྗེས་བསམ་བློ་རེ་གཏོང་ན།།

ད་གཟོད་འགྱོད་པའི་དུ་ནག་སེམས་པ་གང་།།

སྤོ་ལོ་རྩེད་ནས་མིང་གྲགས་བཟང་མི་ཐོབ།།

སྤོ་ལོ་རྩེད་ཀྱང་རང་གི་ཟས་མི་ལོན།།

སྤོ་ལོ་ངན་པས་མི་ཚེ་ཀུན་བརླག་ཅིང་།།

སྤོ་ལོ་འགྲན་མཐའ་འཁྲུགས་རྩོད་གྱོད་ངན་གང་།།

ལ་ལས་སྤོ་ལོའི་ལུས་པོ་ཕན་ཚུལ་བཤད།།

ལ་ལས་སྤོ་ལོའི་ལས་བྱེད་དཔང་ཐོབ་ཟེར།།

གང་ལྟར་ང་ཚོ་བོད་པའི་གཞོན་སྐྱེས་རྣམས།།

སྤོ་ལོའི་མི་ཚེ་རྫོགས་ན་ཡིད་སེམས་འགྱོད།།

སྤོ་ལོ་རྩེད་སར་ཤེས་མེད་མི་སྣས་གང་།།

སྤོ་ལོ་རྩེད་སར་ལས་མེད་བུ་ཆུང་གང་།།

སྤོ་ལོ་རྩེད་སར་བློ་སྟོང་ངན་པ་འདུས།།

ཕལ་ཆེར་དེ་རུ་ཡོད་པ་རིག་པའི་གླེན།།

དུ་ཚང་ལ་ལས་སྤོ་ལོ་རྩེད་ཚུལ་བཤད།།

བུ་ཆུང་ཅིག་ཅིག་ལག་རྩལ་བཟང་རབས་ཟེར།།

དོན་དངོས་བསམ་བློའི་དཔྱད་པ་རེ་གཏོང་ན།།

དེ་ཚོའི་སྤོ་ལོ་མ་གཏོགས་ངོ་མི་ཤེས།།

ཞེས་ཆུ་དམར་ལེབ་རྫོང་འབར་དགོན་ཡུལ་ཚོ་ནས་༢༠༡༨ལོའི་ཟླ་དགུ་བའི་ཟླ་དཀྱིལ་བྲིས།