ཁ་བ་ཅན་ལ་འཕངས་བའི་ཀ་མེད་སུམ་ཅུའི་མདའ་མོ།

ལྷ་ཐོག་ཕོ་ལྷ།

ཀ་ཁ་བླ་སྲོག་ཡིན་པར་ཤེས་མཁན་ཉུང་། །

ཁ་འདོན་དགེ་སྦྱོར་ཟེར་བ་འདོད་མཁན་ཉུང་། །

ག་སར་འཁྱམ་ནས་མི་ཚེ་གཡེང་མཁན་མང་། །

ང་ལས་སྡུག་པའི་གྲོང་ཆོག་བྱེད་མཁན་མང་། །

ཅ་ག་གཅེས་སྤྲད་དགོས་པའི་སྡོམ་པ་ལ། །

ཆ་ལུགས་ཆོས་ལུགས་མི་འདུག་ངག་ནས་བརྗོད། །

ཇ་ཆང་འདོད་ཡོན་སོགས་ལ་ཞེན་ཆེ་བའི། །

ཉ་མོ་ལས་ཀྱང་དམན་པའི་གྲྭ་ལོག་མང་། །

ཏ་ཐ་ག་ཏའི་བསྟན་ལ་མི་དད་ཟེར། །

ཐ་ཤལ་མི་ཞིག་ཡོད་ན་དེའི་རྗེས་འབྲང་། །

ད་ལྟའི་ན་གཞོན་མང་པོ་འདི་འདྲ་རེད། །

ན་ཆུང་གཞོན་ཆུང་རིགས་གནས་སློབ་མཁན་ཉུང་། །

པ་རི་པི་རི་བྱེད་ནས་མི་ཚེ་སྐྱེལ། །

ཕ་ཆོས་ཟབ་མོ་མི་སློབ་རླབས་ཆེན་བཤད། །

བ་ལང་དུད་འགྲོ་འདྲ་བའི་ཡུལ་འབྲོག་མང་། །

མ་འོངས་བོད་ཀྱི་རིག་གཞུང་འཛིན་མཁན་ཉུང་། །

ཙ་རི་གནས་སྐོར་བྱས་ན་མི་ཕན་བཤད། །

ཚ་དམྱལ་གྲང་དམྱལ་གང་ཡོད་བསྟོན་དགོས་སྨྲ། །

ཛ་དྲག་དཀའ་སྡུག་འཕྲད་ཚེ་བླ་མར་འབོད། །

ཝ་མོ་ཁྱི་མོ་འདྲ་བའི་ལྟ་ལོག་མང་། །

ཞ་བོ་ལོང་བར་མཐོང་ཆུང་བྱེད་མཁན་མང་། །

ཟ་རྒྱུ་རྒྱུ་ནོར་དོན་དུ་འཁྲུག་མཁན་མང་། །

འ་ཅག་གདོང་དམར་ཚང་ལ་ཡ་རབ་ཉུང་། །

ཡ་མཚན་ཅན་གྱི་གླུ་པ་གླུ་མ་ཉུང་། །

ར་མ་ལུག་རུ་གྱུར་པའི་སློབ་གྲྭ་མང་། །

ལ་རྒྱ་ཤེས་རིག་ལྡན་པའི་བོད་ཕྲུག་ཉུང་། །

ཤ་ཟ་ཁྲག་འཐུང་བྱེད་པའི་གྲྭ་བཙུན་མང་། །

ས་གཞིས་སྐྱུར་ནས་གྲོང་ཁྱེར་འགྲིམ་མཁན་མང་། །

ཧ་ཅང་གོ་ཡ་མེད་པའི་ཀ་རྩོམ་ཞིག །

ཨ་མཚར་ཚུལ་དུ་ཕུལ་བས་ཨ་མ་དགོངས། །

ཧ་ལམ་བདེན་པའི་གཏམ་རེ་ཡོད་འདུག་ན། །

ཨ་ཕོ་ཨ་གཞེ་དག་གིས་ཡིད་ལ་ཟུངས། །

༢༠༡༩/༢/༡༧/ཉིན་ཁྲིན་ཏུའུ་ནས་བྲིས་སོ།།