ཅི་ལྟར་བྱ།

未标题-1.jpg

ཅི་ལྟར་བྱ།

འབའ་ར་འབྱུང་ཆོས་ཀྱིས།

རྒྱང་རིང་ཡོད་པའི་ང་རང་།།

དྲིན་ཆེན་ཕ་མ་གཉིས་ལ།།

དྲན་དུང་སྙིང་གཏམ་བསྐུར་ཀྱང་།།

འཕྲོད་པའི་བརྡ་རྟགས་མི་འདུག །

དུས་རབས་གསར་བའི་ཚན་རིག །

རྒྱལ་ཁམས་ཀུན་ལ་ཁྱབ་ཀྱང་།།

ལུང་པ་ཆུང་ཆུང་ནང་ལ།།

ཁ་པར་ལམ་བུ་མི་འདུག །

དབྱར་གྱི་ལམ་ཆུ་རྒྱུག་དུས།།

ལུང་པ་ཆུ་ཡིས་གང་སོང་།།

ཀྱ་ཀྱོག་ལམ་བུ་ཕྲ་མོར།

འགྲོ་བའི་རང་དབང་མི་འདུག །

ཆ་རྒྱུས་ཆེ་བའི་ལམ་བུ།།

བྲག་རྡོ་ཚོགས་ཀྱིས་གང་སོང་།།

རྒྱུས་མེད་ལམ་བུར་ཆགས་ནས།།

སེམས་ལ་རྨ་ཁ་བཟོས་སོང་།།

ཕ་ཡུལ་ཕྱོགས་ཀྱི་གཙང་ཆུ།།

ལྷུང་ལྷུང་ཐུར་ལ་འབབ་དུས།།

རྙོག་པའི་ལམ་ཆུ་དམར་པོ།།

དཀར་ནག་གོ་ཟློག་འགྱུར་སོང་།།

མཛེས་སྡུག་ཕ་ཡུལ་གྲོང་ལ།།

ལོ་གྲངས་ཟླ་ཚེས་འགོར་ཀྱང་།།

ལམ་ཆུང་ཕྲ་མོ་དྲན་དུས།།

སྐྱོ་གླུ་རྫོགས་མཐའ་མི་འདུག །

ཁང་བའི་ནང་དུ་གློག་མེད།།

ཕྱི་རོལ་མཁའ་ལ་ཟླ་མེད།།

དྲྭ་མེད་གློག་མེད་ཁེར་རྐྱང་།།

བྱམས་ལྡན་ཕ་མ་དྲན་གི །

ས་གནས་ཡུལ་གྱི་མགོ་དཔོན།།

ལྷག་བསམ་གཞན་སེམས་དཀར་པོ།།

ལ་ཁའི་ན་བུན་ནང་བཞིན།།

དགུང་ལ་འཕུར་བ་ཡིན་ནམ།།

ཁྱོད་ཀྱི་སེམས་པ་ནང་ལ།།

དབུལ་ཕོངས་མི་སེར་ཡོད་ན།།

གནས་དོན་འདི་དང་འདི་འདྲར།།

བསམ་པའི་བློ་ཞིག་འཁོར་རོགས།།

བལྟ་བའི་མིག་གི་སྒོ་ནས།།

མ་ལེགས་ལས་ཤིག་རིག་དུས།།

མི་བདེ་སེམས་པ་ན་ནས།།

དགོད་པའི་རང་དབང་མི་འདུག །

རྣ་བའི་སྒོ་ལམ་ནང་དུ།།

མ་སྙན་གཏམ་ཞིག་ཐོས་ནས།།

ངོ་ལ་དགའ་བའི་འཛུམ་མདངས།།

སྐད་ཅིག་དུས་ཀྱང་མ་བྱུང་།།

མི་དཔོན་འགོ་དཔོན་དག་ལ།།

དྲན་པའི་བསམ་ཚུལ་ཞུས་ནས།།

ཕ་ཡུལ་དབུལ་ཕོངས་འདི་ལ།།

ཕན་སེམས་གཏམ་ཞིག་གནང་རོགས།།

འབའ་ར་འབྱུང་ཆོས་ཀྱིས་བྲིས་པ་དགེའོ།