གདོང་རིགས་སྙན་ངག་ཞར་བཀོད།

དངོས་མིང་ལ་འཇིགས་མེད་ནོར་བུ་དང་སྨྱུག་མིང་ལ་གདོང་རིགས་ཟེར། ཕ་ཡུལ་དཔལ་ཡུལ་རྫོང་འབའ་རོང་ཡུལ་ཚོ་སྐས་ཐར་སྡེ་བ་ནས་ཡིན། རང་ཉིད་ཀྱི་མི་ཚེའི་ཀློང་གི་དགའ་སྐྱོ་ཆགས་སྡང་གི་ཚོར་འདུ་རེ་རེ་བསྡུ་གསོག་བརྒྱབ་སྟེ་སྙན་ངག་ཅིག་གི་གླུ་རུ་དྲངས་ཤིང་ཡིག་འབྲུ་ཞིག་གི་གཟུགས་སུ་བསྟིམ་ན་འདོད། དེ་བས་ཉེ་བའི་ལོ་འདི་དག་ནང་སློབ་སྦྱོང་གི་ཞོར་དུ་སྙན་ངག་དང་བརྩམས་སྒྲུང་ཐར་ཐོར་རེ་ཨེ་འཁྱོངས་སྙམ་ནས་ཡོད།།

མི་རྟག་པ།

ཚེ་སྲོག་མར་མེ་འདྲ་འོ། །

མི་རྟག་རླུང་གི་སོ་ཁས། །

ནམ་ཞིག་སྔ་ལམ་རྫོངས་ན། །

འགྱོད་མེད་སེམས་ཞིག་དགོས་མོད། །

འཁོར་བའི་གཟེབ་ཀྱི་ནང་དུ། །

དབང་མེད་ངང་གིས་ཚུད་ན་། །

ཚོགས་དྲུག་ཡུལ་གྱི་ཐང་ལ།།

རྣམ་ཤེས་རྟ་ཕོ་ཤོར་བས།།

རི་དྭགས་སྒྲ་ཡིས་བསླུས་བཞིན། །

ཕྱེ་སླེབ་གཟུགས་ལ་ཆགས་འདྲ། །

ཉྭ་མོ་རོ་ལ་སྲེད་ལྟར། །

གླང་པོ་རེག་ལ་ཞེན་འདྲ།

བུང་བ་དྲི་ལ་ཆགས་བཞིན།།

ཐམས་ཅད་བདུད་ཀྱི་ཞགས་པས།

སྐེ་ཐག་བསྒགས་ནས་འཆི་ན། །

འགྱོད་སེམས་རླུང་བུ་ལྡང་ལྡང་། །

༢

སངས་རྒྱས་ཉན་ཐོས་དགྲ་བཅོམ། །

ལྷག་མེད་དབྱིངས་སུ་འདས་པ། །

ད་ལྟའི་ལོ་རྒྱུས་ཙམ་ལས། །

གཞན་ཡང་ཅི་ཞིག་འདུག་གམ།།

རྒྱལ་པོ་མངའ་ཐང་ཅན་རྣམས། །

ད་ཆ་དུར་ཐང་སྒམ་ན། །

རུས་པའི་རྡུལ་གྱི་ཕུང་པོ། །

ཇི་འདྲའི་སྐྱོ་བའི་ངང་ཚུལ། །

འཆི་བདག་བདུད་ཀྱི་ལག་པ། །

སུ་ཡི་སྲོག་ལ་བསྲིངས་ཚེ། །

བཟུར་བའི་ཐབས་ཞིག་མེད་པས། །

རང་དབང་མེད་པར་འགྲོ་དགོས། །

མིག་གིས་རིག་རིག་ཡོད་ཚད། །

རྣ་བས་ཐོས་པ་ཡོངས་རྫོགས། །

མི་རྟག་དྲན་པའི་རྟ་ལྕག །

བསམ་མེད་བདག་ལ་བཞུས་ཀྱང་། །

རང་སེམས་སྤྲིན་པ་འདི་ཀོ།

ཤར་རྒྱུག་བྱང་རྒྱུག་ཡིན་ནོ། །

བྱུང་རྒྱལ་དུ་བྲིས་པའི་ཚན་པ་བཞི།

འགལ་འདུའི་གདུང་བ།

སེམས་ཀྱི་རྩིག་ངོས་སུ་བསྐྱོན་པའི་དྲན་གདུང་ལ་

སྨུག་གིས་འཐིབས་ནས་རིང་དུ་ལྷག

སྐྱོ་གདུང་སྐྱེས་དགོས་པ་ཞིག

ཡིད་ཀྱི་རླབས་ཕྲེང་རེ་རེས་ཞེད་སྣང་གི་ཟེགས་མ་རེ་བསྣམས་འོང་པས།

སྡོང་རྒན་བཞིན་གང་ཞིག་ན་ཧྲེང་ངེར་འཚོ།

ཆར་རྗེས་ཀྱི་རྩྭ་ཕྲན་དག་ལ་ཉི་འོད་ཀྱི་གཤོག་པ་ཐོགས་ཏེ།

མུན་པའི་ཡ་ཕུགས་ཀྱི་སྒྲོན་འོད་ལྟ་བུར་ཆགས་ཡོད།

འཁྲེང་ཞེན་དེ་མག་མོག་ཏུ་གྱུར་འདུག ཡང་ན།

བྲང་གཞུང་ནས་རྡོལ་བའི་དྲན་པའི་རླབས་དེ།

དྲན་པ་བསྙལ་ཡུན་རིང་སོང་།

གསལ་ལ་མི་གསལ་བའི་གྱ་གྱུར་འཐེན་པའི་རྐང་ལམ་དེར།

རྡུལ་འཚུབ་དང་བཅས་རྐྱང་རྒོད་ཁྱུ་ཚོགས་ཤིག་ཤར་ལེར་གཤར་སོང་།

བཞུད་སོང་བའི་རྐྱང་རྒོད་དེ་ཚོའི་ཤུལ་ལམ་དུ།

ང་རང་ལོ་མ་ཟད་པའི་སྡོང་བོ་དང་འདྲ་བར་ལུས་སོང་།

ལྷ་སྒྲུང་ལྟ་བུའི་གཏམ་རྒྱུད་ཅིག་གིས།

ཡོད་ཚད་འཇུག་རྫོགས་པ་མ་ཡིན་ནམ།

ལོ་ཟླའི་ལྟེབ་ཁུགས་སུ་ཐམས་ཅད་རྒས་སོང་བས།

སྨྲེང་སིང་སིང་གི་སེམས་པ་ཡང་མི་འདུག

ལུས་ཀྱི་གདུང་བ།

སྒྱུ་མའི་ལུས་ཀྱི་ཐོ་ཡོར་ལ་ན་ཟུག་གི་སྨྱུ་གུ་འབུས།

བདག་གིས་སྙན་ངག་ལ་བཅོལ་བའི་སེམས་འདུན་དེ།

གང་ཞིག་ནས་ཟགས་ཀྱིན་ཡོད་པ་མཐོང་མ་སོང་།

དྲན་གདུང་གིས་བརྩེགས་པའི་དུས་ཚོད་གྱི་སོ་ཁ་ནས།

བདག་གི་ཞལ་ངོ་རུ་གཉེར་མ་མང་དུ་བསྡུས་འདུག

མིག་ཟུང་ནས་འགྲིལ་བའི་མཆི་མ་ནི།

མུ་ཏིག་རྡོག་པོ་དང་འདྲ་བར་དཀར་ཆིལ་ཆིལ་ཐུར་དུ་འཐོར་འདུག

མཚན་མོ་སྐར་ཚོགས་ཀྱང་སྐྱོ་བས་མནར་ནས།

འདར་སིག་སིག་འགུལ་གྱིན་འདུག

ཤག་ཏུ་ཁུ་སིམ་པོར་གནས་པ།

སྒེའུ་ཁུང་ཕྱི་རོལ་ན་ཆར་བ་ཤག་ཤག་བབས་ཀྱང་།

བདག་ནི་གྲྭ་ཤག་ནང་དུ་ཁུ་སིམ་པོར།

སྣུམ་ཤིག་ཤིག་གི་ཁ་སྤུ་ལ་བྱིལ་བྱིལ་བྱས་ནས་བསྡད།

འཇིག་རྟེན་ཕྱི་རོལ་དུ།

མངོན་ལྐོག་གང་རུང་ལས་བརྫུས་པའི་འདྲེ་ཚོགས་འཚུབ་ཚུབ་དུ་རུབ་ཀྱང་། བདག་ནི་གྲྭ་ཤག་ནང་དུ། ཁུ་སིམ་པོར་ཞི་བའི་སེམས་ལ་སྦྱར།