དུས་ཆད།

རྭ་ཅོ་ནག་པོ།

རྒྱང་རིང་གི་གནམ་ནས་རི་སྟེང་དུ་མུན་པ་སྒྲིབ་ཡོང་རྗེས

ངས་བཟོ་ལྟ་བྱེད་མི་དགོས་པར་མུན་རུབ་པ་ཚོར

འཐད་ལ་མི་འཐད་པའི་ངང་མལ་དུ་ཉལ་ནས

རྒྱུས་མེད་ཀྱི་བུ་མོ་ཞིག་ལ་ཁ་པར་བཏང་བ་ཡིན

ངག་ལྡབ་ལྡུབ་གྱིས་མགོ་བོ་མལ་དུ་བརྫངས་ནས

གསལ་ལ་མི་གསལ་བའི་ངང་གཉོག་གཏམ་འགའ་བཤད་རྗེས

ཁོ་མོའི་དོགས་པ་དང་བཅས་མི་མང་པོ་ཞིག་ལ་ང་རིང་འཁྲུལ་སོང

ཡིན་ནའང གཉིང་མི་ཁུག་པའི་དབང་གིས་ངས

ཁོ་མོའི་གསང་བ་ཤེས་ཟིན་ནའང ཡ་མཚན་རྒྱུ་ཅི་ཡང་མེད་པའི་ངས

ཁོ་མོའི་ངག་ལ་ཉན་ཞོར་སྐྱ་རེངས་ཤར་བ་ལ་རེ་སྒུག་བྱེད་པ་ཡིན

སྐྱ་རེངས་ནི་ནམ་རྒྱུན་དང་མི་འདྲ་བར་འཆར་མི་སླ་བར་མ་ཟད

བྱིའུ་ཆུང་འཇོལ་མོའི་སྐད་སྒྲ་ཡང་གྲགས་རྒྱུ་མི་འདུག་པས

རང་ཉིད་ནི འུག་པ་བཞིན་དུ་ཞག་གང་བོ་གཏམ་འཆལ་སྨྲས་ནས་བསྡད་པ་ཙམ་ལས

དོན་ངོས་ཕྲན་བུ་ཞིག་ཀྱང་འགྲུབ་མ་ཐུབ

སྐྱ་རེངས་ཤར་བ་དང་ལྷན་དུ་གཉིད་མ་ལོག་ལོག་གིས

ཁྲོམ་སྲང་དུ་ཉུལ་ནས་མདངས་ནུབ་ཀི་བུ་མོ་དེ་ལ་འཕྲད་རྒྱུ་རེ་བ་བྱེད་པ་ཡིན

ངས་ཁོ་ངོ་མི་ཤེས་མོད ཁ་པར་བཏང་ནས་བཙལ་བ་ལས་ཐབས་གཞན་ངས་མ་ཚོར

འོན་ཏེ

ལུས་བདེ་སེམས་སྐྱིད་ཞིག་ལ་ཁོ་མོའི་དུས་ཆད་ལ་འཐད་པ་བྱུང་ཡོད

ངས་འཐེན་ཐིག་ཕོར་བ་གང་ཟོས་ནས་ཁོ་མོ་བསྒུག་པ་ཡིན

ཉིན་ཕྱེད་ཡོལ་རྗེས་ཁོ་མོ་ད་རུང་སླེབས་མ་བྱུང

ངས་བསྒུག་ཚོད་མེད་པ་ལྟ་བུ་ཞིག་ཆགས་ཁར

ང་ཡོད་སའི་ཟ་ཁང་ཆུང་ཆུང་དེའི་སྒོ་ཁར་དུ་མི་ཚོགས་ཀི་འཚང་ག་བརྒྱབ་ནས

འུར་ཟིང་གིས་ཁེངས་འདུག

སྐབས་ཐོགས་ཏེ་ངས་ཅི་ཡང་མ་ཚོར

མི་ཚོས་བཤར་རྒྱུར་གླ་གཏོང་རླངས་འཁོར་ཞིག་གིས་མི་ཞིག་ལ་བརྒྱབ་བྱུང་ཟེར

ངས་སུ་ཡིན་ནམ་སྙམ་བཞིན་སླར་ཡང་འཐེན་ཐིག་ཁང་ནས་བསྡད་པ་ཡིན

ཡུན་ཙམ་གྱི་རྗེས་སུ། ང་ལ་༡༡༠ཚང་གི་ཁ་པར་ཐོན་ནས

ཁྱོད་རང་འཕྲིན་ལས་མཚོ་མོ་ཚང་གི་ཁྱིམ་བདག་ཨེ་ཡིན་ཞེས་དྲིས་བྱུང

ང་དངངས་འཚབ་དང་བཅས་ཡིན་ཞེས་སྐད་ཆ་ཤོར་སོང

མོ་ད་ལྟ་སྨན་ཁང་དུ་ཡོད་ཁྱོད་རང་མྱུར་མགྱོགས་ངང་ཐོན་དུ་ཆུག་ཟེར

ཨེན་ཙམ་ཞིག་ལ་ང་རང་ཧང་སང་བར་གྱུར་སོང

ངས་དོན་དུ་ཁོ་རང་ངོ་མི་ཤེས

ངོ་མི་ཤེས་རུང་ཤེས་མདོག་གི་བཟོ་ལྟ་སྟོན་གྱིན

སྨན་ཁང་ནང་དུ་ཆས་པ་ཡིན

ཁོ་མོའི་གདོང་ལ་མིག་ཆུ་བཞུར་བཞིན

རྒྱུས་མེད་ཀྱི་ང་ལ་བདེ་འམ་ཞེས་དྲིས་བྱུང

ངས་སིལ་ཏོག་འགའ་ཉོས་ཡོད་པ་དེ

ཁོ་མོའི་སྔས་འགྲམ་དུ་བཞག་སྟེ་བདེ་འོ་ཞེས་སྐད་ཅིག་ཤོར

ཁོ་མོ་ནི་དུས་ཆད་དུ་ཡོང་བའི་གཞོན་ནུ་མ་དེ་ཡིན་ཞིང

མཐོ་སྒང་དུ་སྐྱེས་པའི་འབྲོག་མོ་དེའང་ཡིན་འདུག