རྗེ་བཙུན་སྒྲོལ་མ་ལ་རྩེ་གཅིག་གསོལ་བ་འདེབས་པ་དད་པའི་ཆུན་པོ།

སྐར་མ་ཨ་བརྟན།

རྒྱལ་ཀུན་འཕྲིན་ལས་གཅིག་ཏུ་བསྡུས་པའི་དཔྱིད།།

འགྲོ་ལ་མ་ལྟར་བརྩེ་བའི་ཏཱ་རེ་མ།།

སྐད་ཅིག་དྲན་པས་འདོད་དོན་སྩོལ་མཛད་པ།།

འཕགས་མ་མྱུར་མ་དཔའ་མོས་བདག་སྐྱོངས་ཤིག།

ཉིན་རེ་བཞིན་དུ་ཁྱོད་བསྟོད་ལན་གསུམ་རེ།།

ཆགས་མེད་ཞེ་དམ་མཛད་དེ་བགྲངས་ན་ཡང་།།

བྱིན་རླབས་ག་བུར་ཟེགས་མའི་ཆ་རྡུལ་ཙམ།།

བདག་གི་རྒྱུད་ལ་མ་འཕོས་རབ་ཏུ་སྐྱོ།།

སྔོན་ཚེ་སྦྲུལ་གྱིས་གནོད་པ་སོགས།

འཇིགས་པ་བརྒྱད་ཀྱིས་མནར་བ་དག།

གང་གི་བརྩེ་བ་ཆེན་པོ་ཡིས།།

སྐྱབས་པའི་གཏམ་རྒྱུད་མང་བོ་ཐོས།།

སྔ་དྲོ་སེམས་ཅན་བྱེ་བ་བརྒྱ་སྟོང་ཕྲག།

ཕྱི་དྲོའི་ཆར་ཡང་དེ་སྙེད་ངན་འགྲོ་ལས།།

སྒྲོལ་བར་མཛད་པས་རྗེ་བཙུན་སྒྲོལ་མ་ཞེས།།

མཚན་གྱི་ཅོད་པན་ཕྱོགས་དང་ཕྱོགས་སུ་ཁྱབ།།

ལྷ་ཆོས་གཡུ་ལོ་བཀོད་པ་ལས།།

ཁྱེད་ཀྱི་མཚན་ཙམ་བརྗོད་པས་ཀྱང་།།

མི་མཐུན་ཕྱོགས་ནི་མཐར་སྤྲད་དེ།།

རྫོགས་ལྡན་ཉིན་བྱེད་བསུ་ངེས་གསུངས།།

དེའི་ཕྱིར་ཁོ་བོའི་དད་པའི་ཆུ་ཀླུང་འཕྱུར།།

སྔོ་ལྗང་ལོ་འདབ་གྱོན་པའི་སྤྱན་ཡངས་མར།།

འདི་ཕྱིའི་ལེགས་ཚོགས་མཐའ་དག་ཁྱེད་མཁྱེན་ཞེས།།

ཚེ་རབས་གཏན་གྱི་འདུན་མ་བཅོལ་དམ་བྱས།།

དེ་ལྟ་ནའང་འཕགས་མའི་ཞབས་རྡུལ་རིང་ནས་སྤྱི་བོར་ལེན་པ་ངས།།

མི་ཕྱེད་དད་པའི་སོར་མོའི་ཕྲེང་བས་ལན་བརྒྱར་བཏུད་དེ་བསྙེན་ནའང་།།

གང་གི་ཐུགས་ལ་ཉེ་རིང་ཡོད་དམ་བདག་སེམས་འདི་ནི་འཕྱང་མོ་ཉུག།

སྐྱབས་གཅིག་ཨཱརྱ་ཏཱ་རེ་མ་ཞེས་སྙིང་ནས་བོས་ཀྱང་རེ་འབྲས་ཉུང་།།

འོན་ཀྱང་དད་པའི་ཆུན་པོ་ནི།།

ཡང་ཡང་ཁྱེད་ལ་དབུལ་བར་བགྱི།།

གསོལ་བ་དྲག་ཏུ་བཏབ་པ་ན།།

ལྷ་མཆོག་ཁྱེད་ཀྱིས་དགོངས་སམ་ཀྱེ།།

འགྲོ་བའི་སྡུག་བསྔལ་གཟིགས་པའི་མོད།།

ཁྱེད་ཐུགས་སྙིང་རྗེས་དབང་མེད་གཡོ།།

དེས་ན་བརྩེ་བའི་ར་བ་ལས།།

བདག་ཀྱང་མི་འདོར་ཡིད་ནི་འཚེང་།།

སྲེད་ལྡན་ནོར་ཕྱིར་འཇིགས་པར་འཕྲད་པ་ལས།།

ཁྱེད་ཀྱི་འཕྲིན་ལས་གློག་ཞག་འཁྱུག་ཙམ་གྱིས།།

འཇིགས་སྐྲག་ཞི་བར་བྱེད་པའི་ལས་མཛད་ན།།

ཉམ་ཐག་ཁོ་བོར་ཐུགས་རྗེའི་མཐུ་མ་ཆུང་།།

གཏན་གྱི་སྐྱབས་སུ་འཛིན་པའི་འགྲོ་རྣམས་ཀུན།།

དུས་ལས་ཡོལ་མེད་འདོར་བར་མི་འགྱུར་ཞེས།།

ཡང་ཡང་ཐུགས་དམ་མཛད་པའི་སྙིང་སྟོབས་ཅན།།

རྒྱལ་ཡུམ་དཔའ་མོས་རྗེས་སུ་འཛིན་པར་མཛོད།།

བདེ་གཤེགས་རྔ་སྒྲས་ལན་མང་བསྒྲགས་པ་ཡི།།

གང་མཚན་བརྗོད་པས་མི་མཐུན་རྒུད་པ་ཀུན།།

སེལ་ཞིང་རྫོགས་ལྡན་གསར་བའི་ལང་ཚོ་ལ།།

སྤྱོད་པའི་སྐལ་བཟང་བདག་ཅག་རྙེད་གྱུར་ཅིག།

༢༠༡༨ ༡༡ ༢༥ ཉིན།