རྨི་ལམ་གྱི་གས་ཆག

རྩོམ་པ་པོ། སྨོན་དུང་ཁྲག

སློབ་ལ་བརྩོན་པའི་འདུན་པ་ཆད་ཐལ་མ་འོངས་མིག་ཟུང་ལོང་ནས་ཐལ།།

ཕུགས་བསམ་སྙེགས་པའི་སྤོབས་པ་ཉམས་ཐལ་ཕ་མའི་རེ་བ་གཏོར་ནས་ཐལ།།

ཀ་ཁའི་ངག་གི་དབྱངས་འགྱུར་ཡལ་ཐལ་ཁ་བའི་ལ་རྒྱ་ཤོར་ནས་ཐལ།།

མི་ཚེའི་སྟེང་གི་རྨི་ལམ་མཛེས་པོར་གས་ཆག་བཙན་པོ་ཤོར་ནས་སོང་།།

མེས་པོས་གནང་བའི་ནོར་བུ་བོར་སོང་འགྱོད་གདུང་མིག་ཆུའི་ཕྲེང་ཐག་འཐོར།།

རིགས་ལ་བཅང་བའི་སེམས་པ་དཀར་པོ་སྤྱི་ཚོགས་ནག་པོའི་འོག་དུ་ནུབ།།

འགྱུར་བ་མེད་པའི་དད་པ་བརྟན་པོ་ལྟ་ལོག་ཚིག་འབྲུ་བཙན་པོས་བཅོམ།།

རྨད་བྱུང་རྨི་ལམ་སྲོག་ལས་ལྷག་པ་ད་ལྟ་ཉིད་དུ་ཤི་ལ་ཉེ།།

ཕ་སྐད་གཙང་མའི་དབྱངས་རྟ་ཡལ་ཞིང་ཉ་ཉོག་སྐད་རིགས་ཁ་ལ་བྱང་།།

ཕ་གོས་མཛེས་པའི་རང་མདངས་མ་ཤེས་སྤྲང་པོའི་གོས་ལ་ཞེན་པ་ཆགས།།

སྙན་རྩོམ་རིགས་ལ་ཁ་རྒྱབས་གཏད་ཅིང་ལག་འཁྱེར་ཁ་པར་ལུས་ལ་སྦྱར།།

མ་འོངས་ཞིག་ཏུ་ཕྱོགས་པའི་རྨི་ལམ་སེམས་ནས་རླངས་པ་བཞིན་དུ་ཡལ།།

ལོ་རྒྱུས་ཟབ་མོའི་རིན་ཐང་མ་གཏོགས་རང་གི་རིགས་ལ་ཞེན་པ་ཉམས།།

འདས་པའི་གཏམ་རྒྱུད་ཁ་བོ་འགའ་རེར་སྐྱོ་གདུང་མྱ་ངན་གཏིང་ནས་བརྗེད།།

སྔོན་ཐོན་རིག་གནས་སྦྱང་བརྩོན་མེད་པར་སྲོལ་ངན་ལུགས་ལ་ཉིན་རེར་སྡུག།

མི་རིགས་ཞིག་ལ་དབང་བའི་རྨི་ལམ་འདི་ལྟར་ཉིན་ནས་ཉིན་དུ་བརླག།