ལོ་གསར་ལ་འཕུལ་བ།

•ར་སེར། འབའ་ར་འབྱུང་ཆོས།

ཨོཾ་བདེ་ལེགས་སུ་གྱུར་ཅིག

ཕ་རྒྱུད་སྤྲེའུ་བྱང་སེམས་དང་།།

མ་རྒྱུད་བྲག་སྲིན་མོ་ལས།།

ཁ་བ་བོད་ཀྱི་མི་ལ།།

ལྕགས་བྱི་ལོ་ལ་རྟེན་འབྲེལ།།

ཟླ་བ་བཅུ་གཉིས་རྫོགས་སོང་།།

ལྕགས་བྱི་ལོ་གསར་སླེབས་བྱུང་།།

ཨ་མས་ཆང་ཞིག་བཙོས་ནས།།

ཁྱེད་རང་བསུ་བ་སྒུག་ཡོད།།

མངར་ཆང་བདུད་རྩི་ཞིམ་པོས།།

བཟི་བའི་དུས་ཞིག་བྱུང་ན།།

རྗེས་ཀྱི་ནད་ངན་ཡོད་རྫོགས།།

མེད་པ་བཟོས་ན་བསམ་བྱུང་།།

སྐྱིད་པའི་ས་གཞི་ཡིད་འོང་།།

འབྲུ་རིགས་ནས་ཀྱིས་རྒྱན་སོང་།།

ནད་ངན་གདུག་རྩུབ་ཁོང་གིས།།

དུས་ཚོད་བར་ཞིག་བཅད་སོང་།།

ལྕང་མ་ཐོག་གི་བྱིའུ་ཆུང་།།

བྱི་བ་སླེབས་པ་མཐོང་ནས།།

ནད་ངན་སླེབས་པའི་དུས་ལ།།

སྙིང་གཏམ་ཚིག་གསུམ་བརླབས་བྱུང་།།

ཨ་རོག་ཨ་རོག་གྲོགས་པོ།།

ལོ་གསར་སླེབས་པའི་དུས་ལ།།

སྐྱིད་པོ་ཁྱིམ་ལ་རོལ་དགོས།།

དོན་མེད་ཕྱི་ལ་མ་རྒྱུགས།།

མ་མཐོང་འགོད་ནད་ངན་པ།།

གང་ནས་འོང་བ་མ་ཤེས།།

ཁྱོད་ཀྱི་ལུས་ལ་འཛུལ་ནས།།

དོན་མེད་ལས་ཀ་མང་ཞིག །

ཨ་རོག་ཨ་ཁུ་ཨ་ནེ།།

མཉམ་པོ་ཚོགས་ཚོགས་མ་བྱས།།

གནའ་གཏམ་རིང་པོ་ཡོད་ན།།

གནས་སྐབས་དུས་ཞིག་སྒུག་རོགས།།

ཧྭ་ཧྭ་རྒོད་སྒྲ་མང་ས།།

སྤོ་ལོ་ར་བའི་ཐོག་རེད།།

ལུས་པོ་བདེ་ཐང་ཆེད་ཀྱང་།།

གནས་སྐབས་མཚམས་ཞིག་བཞག་ཤོག །

ཕ་རྒྱུད་མ་རྒྱུད་འབོད་ནས།།

འཛོམ་འཛོམ་བྱས་པའི་དུས་འདི།།

ཉེ་རིང་ཉེ་རྩ་ཆེ་ན།།

གནས་སྐབས་འཛོམ་འཛོམ་མ་བྱོས།།

བདེ་སྐྱིད་དཔལ་ལ་རོལ་བའི།།

གཟའ་དང་སྐར་མ་མང་པོ།།

གནས་སྐབས་དུས་མཚམས་འདི་ལ།།

རང་རང་ས་ལ་སྡོད་ཅིག །

འགྲོ་འགྲོ་མང་ན་ཁྱི་ཕྲད།།

ཟ་བ་མང་ན་དུག་ཕྲད།།

དུས་མཚམས་ཁྱད་པར་འདི་ལ།།

ཀུན་གྱིས་གཟབ་གཟབ་བྱོས་རོགས།།

ལྕགས་བྱི་ལོ་ལ་ཚང་མ་ལོ་གསར་བཀྲ་ཤིས་བདེ་ལེགས། ཚེ་རིང་ནད་མེད། ཅི་བསམ་དོན་འགྲུབ།

༢༠༢༠.༢.༢༣.ཉིན།