གུ་རྡོར་གྱི་རང་མོས་སྙན་ངག་བཞི

སྨྱོ་འདུར།

གུ་རྡོར།(མཛོད་དགེ)

རས་ཀྱི་དར་ལྕོག་མེས་ཚིག་ན

ལྕགས་ཀྱི་ལུང་བའི་ནང་དུ་རྒྱུགས་ཕོད་མཁན་དུ་ཡོད

ལྕགས་ཀྱི་ཐོ་ཟོར་ཁྱེར་ནས་མེ་མདའ་འཕངས་ན

འགག་སྒོ་སྲུང་ཕོད་མཁན་དུ་ཡོད

བཙོན་གྱི་ལས་དབང་ལུས་ལ་མདུད་ན

སྐེ་ལ་སྲུང་འཁོར་འདོག་མཁན་དུ་ཡོད

གྲིབ་མ་འཐོར་པོ་གྲོང་ལ་རྒྱུགས་ཀྱང

ཁ་ན་ཆོས་ཤིག་འདོན་མཁན་སུ་ཡོད

ཆིག་ལབ

གུ་རྡོར།(མཛོད་དགེ)

ངག་གི་སྨྲ་ཁ་བཅད་ནས་བསྡམ

ལུས་ཀྱི་རྣག་ཁྲག་བཏོན་ནས་ངུས

སེམས་ཀྱི་ཟུག་རྔུ་གཟེར་ནས་བྲོས

རྨ་ཁ་མེད་པའི་གཅར་རྡུང་ཉོས

རྩམ་ཁུགས་སྤྲུགས་ནས་རྩམ་སྐྱ་འགམ

མི་ཕོའི་གཅིན་པ་ཤག་སེ་འཐུང

ཟླ་ངོགས་ཀྱི་སེམས་པ།

གུ་རྡོར།(མཛོད་དགེ)

སུ་ཞིག་གི་འགྲམ་ལྕག་ལས་ཐར་བའི་བདག་གིས

སེམས་ཆུང་སེམས་ཆུང་གིས

སུ་ཞིག་གི་གཉིད་བཤད་ལ་སྒུག་གིན་སྒུག་གིན

ཆུང་དུས་དེ་ལ་ཕྱི་དྲན་ཞིག་བྱས

རྣམ་སྨིན་གྱི་ལས་འབྲས་དེད་པའི་སྐྱེ་བ་འདིར

བདག་ལོ་ཟླ་དེའི་ནང་གི་ཆུ་མོ་ཞིག་སྟེ

ཉ་མོ་ཞིག་གི་ལོག་ཕེབས་ལ་སྒུག་བཞིན

ཟླ་བའི་འཆར་ནུབ་ཁོ་ན་བདག་སེམས་སུ་ཟེགས

ལས་ཀྱི་མཐུ་སྟོབས་ཀྱིས

བདག་བདག་གི་ཕྱོགས་སུ་རྒྱུགས་ཐག་ཆོད་བྱས་ནས

སང་ཉིན་གྱི་ཉི་མའི་འཆར་ནུབ་ལ་ངང་སྒུག་བྱས་ཏེ

ཟླ་བའི་ངོགས་ཀྱི་ཟླ་འོད་ཀྱི་སེམས་པ་ལ་སེམས་པ་བཏེགས་ནས

འཕུར་ཐག་ཆོད་བྱས་ནས་རྒྱུགས་ཁོ་ཐག་བྱས

རྡོ་བས་གྱེན་ལ་བསླངས་བའི་ཕོ་བྲང་།

གུ་རྡོར།(མཛོད་དགེ)

འདུ་འཛིང་རྒོད་པའི་གྲོང་ཁྱེར་དབུས་ན་འགྱིང་བའི་བདག་གི་ཕོ་བྲང

ལྷིང་འཇགས་ཁྲོད་ནས་གཉིད་དུ་ཡུར་བའི་བླ་མཁར

རྨི་ལམ་ཐུན་གཅིག་ལས་བོར་ཚར་བའི་ཕ་མཁར

བགྲང་ལས་འདས་བའི་ས་སྲོད་རེ་རེ་ལ

ངས་རྨི་ལམ་གྱི་རྟ་ཕོ་བཞོན་ནས

རྨི་ལམ་གྱིས་རྨིས་བའི་རྨི་ལམ་ལྗང་ཁུ་ཡིད་ལ་བསྒོམ་ནས

རྡོ་ཡིས་བརྩིགས་པའི་བརྗིད་ཆགས་ཀྱི་ཕ་མཁར་ལ་ཕྱག་སུམ་འཚལ

མཚན་ལམ་རིང་མོའི་ལྷིང་འཇགས་དབུས་ན

བདག་གི་ཕ་མཁར་གྱིས་སྐྱོ་ལྷང་ལྷང་གིས་སྐར་ལྔ་འཁུར་ནས

བདག་ལ་སྐྱོ་ངལ་གྱི་སེམས་གཞས་བཏང

བདག་གིས་དུར་བདག་བྱས་བའི་བདག་གི་རོ

གུ་རྡོར།(མཛོད་དགེ)

ཉི་ནུབ་དང་ཟླ་འོད་ཀྱི་ངོགསས་སུ

བདག་གི་རྣམ་ཤེས་སུ་འཁོར་བའི་བདག་གི་རོ་དང

བདག་གི་ཞེ་ལ་ཐོགས་པའི་དུར་ས་དེ་ཡོད

སུ་ཞིག་གིས་སུ་ཞིག་ལ་བཤད་པའི་གསང་གཏམ་ནི

བདག་གིས་རྣ་རྩར་གླན་ནས

ཁ་རོག་གེར་ཉན་པའི་བདག་གི་ཁ་ཆེམས་ཡིན

ང་འདི་ལྟར་ཤི་སོང་བ་ཡིན་ན

ངས་དེ་ལྟར་བདག་གི་རོ་ལ་དུར་བདག་བྱ་ངེས

ཆགས་འཇིགས

གུ་རྡོར།(མཛོད་དགེ)

རྔ་ཆེན་བརྡུང་མཚམས་བཞག་ནས་དུང་ཆེན་བུས

དུང་གི་གཟི་ཆེན་གཡས་སུ་འཁྱིལ

གཟི་དུང་བུས་ཏེ་མེ་སྒྱོགས་བཀད

བཀད་མཚམས་བཞག་སྟེ་མི་རོ་དྲུད

མི་རོ་རྟ་རོ་མཉམ་སྤུངས་བྱས

ས་རྡོ་རྡུལ་གྱི་འཁོར་ལོ་བསྐོར

གནམ་སའི་འདྲེས་མཚམས་དམར་པོ་རི

བཤིག་སྟེ་བཅག་སྟེ་བཀད