ཨ་མ་དབྱངས་ཅན་ཚང་གི་ཚོར་བའི་ལེའུ་བརྒྱད་པ།

ལས་ཀྱི་ཁྱོད།

དུ་སྤྲིན། ནང་ཆེན།

ཡུལ་འདིའི་ནམ་མཁའ་སྔོ་ཞིང་དྭངས།།

རྒྱུ་སྐར་ཚོགས་ནི་འགུལ་ཙམ་འོག།

མི་རྣམས་གཉིད་ཟིན་ཁུ་སིམ་དུས།།

ང་ནི་དལ་དལ་བཞུར་བའི་མཚོ།།

ཟླ་བ་འདི་ནི་ལས་ཀྱི་མི།།

འཆར་ཞིང་དཔྱངས་པའི་འོད་ཟེར་ནི།།

རིང་དུ་བསྲིངས་བྱས་ལག་པ་ཟུང་།།

གཅེས་པའི་ཚུལ་གྱིས་བྱིལ་བྱིལ་བཏང་།།

སྤྲིན་པ་མཁའ་མཐར་རྒྱུ་བ་འདི།།

དྲན་པ་ཡི་གེར་བྲིས་བྱས་ནས།།

རླུང་གིས་ཡང་ཡང་སྤུར་བ་ཡིན།།

གནས་པའི་ཁ་ཐག་རིང་ན་ཡང་།།

ཁྱོད་རང་སེམས་པའི་རྫིང་བུ་ནང་།།

གཏན་དུ་ཟད་མེད་ཆུ་ཐིགས་བཞིན།།

ལྷུང་ཞིང་འཁྱིལ་བའི་ལས་འདི་ཨང་།།

ཁེར་རྐྱང་གི་ཚོར་སྣང་།

དྷཱ་ཏྲཱི།

མཐོན་པོའི་གོ་སར་འགྱིངས་པའི་ཐོབ་ཐང་མེད།།

མི་ཚོགས་སེམས་འགུལ་ཐེབས་པའི་ཡོན་ཏན་མེད།།

མཛེས་སྡུག་ངུར་སྨྲིག་འོག་གི་ཁེར་རྐྱང་ང་།།

ལྔ་རིག་སློབ་གླིང་འགྲིམ་པའི་ལྡོམ་པོ་ཡིན།།

འཁོར་བའི་བཙོན་རར་འཚོ་བའི་དཀའ་ངལ་མེད།།

ཀུན་གྱི་ཡིད་དབང་འགུག་པའི་འབྱོར་བ་མེད།།

ཐོས་བསམ་ལས་ལ་སེམས་པའི་དབེན་གནས་སུ།།

བག་ཡངས་རྩེད་འཇོ་རོལ་བའི་ཁེར་རྐྱང་ཡིན།།

རྒྱུ་ཆེན་དཔོན་པོ་ཞིག་གི་སྐུ་ཚ་མིན།།

དབུལ་པོ་ཟས་མེད་གཅིག་གི་བུ་ཕྲུག་མིན།།

ཉིད་ཀྱིས་འཚོ་བ་ཙམ་རེ་དོན་གཉེར་བའི།།

བཙུན་རྐྱང་དཀྱུས་མ་ཞིག་གི་མིང་ཅན་ཡིན།།

རྒྱ་སེ་རྐང་གཅིག

གཟུཊ་བརྙན།

དང་ཐོག་ཡིད་སེམས་ཀྱི་ཞེན་ཆགས།།

དྭངས་གཙང་གངས་དཀར་ཀྱི་རི་བོ།།

བཀག་ཀྱང་འགོག་ཐུབ་ཅིག་མེད་པ།།

གཞོན་པའི་བརྩེ་དུང་གི་ལས་དབང་།།

དམར་པོ་མི་སེམས་ཀྱི་མདངས་ལ།།

ལོ་གསུམ་བྱང་གོམས་ཤིག་མེད་ན།།

ཞག་གསུམ་འཛུམ་ཆུང་གི་ངོ་ལ།།

དགའ་བའི་གཏན་ཚིཊ་དེ་མི་འབྲི།།

ལོ་སྒུག་ཟླ་སྒུག་གི་གཏན་ཚིགས།།

ཅུང་ཟད་མངར་ཁ་དང་ལྡན་པ།།

ཞེ་སེམས་ཐོགས་པ་ཡི་ན་ཆུང་།།

འདང་བརྩེ་ཨ་ལོང་དེ་དཀའ་ཁི།།

སྨྲེང་བའི་དྲན་གདུང་གི་མིག་ཆུ།།

འུ་གཉིས་མཛའ་བརྩེ་ཡིས་ལན་སོང་།།

ལས་དབང་འཛུམ་དཀར་གྱི་ཕྲེང་བ།།

དྲན་པའི་སྒལ་གཞུང་དུ་ཉར་རོགས།།

བཅོ་ལྔའི་དུང་ཟླ་ཡི་སྨན་ཆུང་།།

བརྩེ་དུང་འོད་ཟེར་གྱི་ཕུང་པོ།།

འཁོར་བའི་ཉིན་སྲིབ་ཀྱི་བར་ནས།།

སེམས་ཀྱི་ཟབ་ས་རུ་བཙུད་ཡོད།།

དགའ་བའི་མེ་ཏོག་གི་མཆུ་སྒྲོས།།

ཞེ་ནས་གནང་འདོད་དེ་མེད་ན།།

བདག་སེམས་སྙི་མོ་རུ་ཐོག་ཏུ།།

ཀུ་རེའི་ཟུར་མིག་དེ་མ་འཕེན།།

ཤིང་ལོའི་འདབ་མ་ཡི་ངོས་སུ།།

བརྩེ་བའི་རི་མོ་ཞིག་བྲིས་ཡོད།།

དུང་སེམས་ཁ་རྒྱན་གྱི་མེ་ཏོག །

སད་དང་ལྷཊ་རླུང་ལ་མ་སྐུར།།

བརྩེ་བའི་མདུད་པ་དེ་གྲོལ་ན།།

འུ་གཉིས་སོ་སོ་ཡི་ལས་བསྐོས།།

ཕྱི་ཐག་མེད་ཀི་དེ་མ་གསུངས།།

སྡུག་པའི་མིག་ཆུ་དེ་མ་གཞུར།།

དུངས་སེམས་ཧ་ལོ་ཡི་མེ་ཏོག།

སད་དང་དྲག་ཆར་གྱིས་གཏོར་ན།།

སྐྱོ་བ་ང་རང་ལ་ཡོད་ཀྱང་།།

དངན་པ་ཁྱོད་རང་ལ་མི་འཐེན།།

སེམས་ཉིད་ཡི་དམ་གྱི་ལྷ་རུ།།

མཆོད་པའི་སྐེ་རྒྱན་ཞིག་བསླས་ཡོད།།

དུངས་བརྗོད་ཚིག་ཕྲེང་གིས་བརྒྱན་ཏེ།།

ཁྱོང་རང་གཅིག་པུ་ལ་ཕུལ་ཡོད།།

སེམས་ཀྱི་ཚ་དྲོད།

*ཡུལ་ཤུལ་སངས་བསྟན།

ཐ་སྙད་འདི་དག་ཇི་ལྟར་སྒྲིག་ན་ཡང་།།

ནང་སེམས་ཚོར་བའི་རི་མོ་འབྲི་ཐབས་ཅི།།

ཞེ་ཡི་མེ་ལོང་སུ་ལ་གསལ་དེ་ལས།།

ཚང་མར་སྟོན་པའི་ཚུལ་ཡང་གང་དུ་ཡོད།།

རྐྱེན་གྱི་བརྒུལ་ཤུགས་ཇི་ལྟར་ཚ་ན་ཡང་།།

ལས་ཀྱི་ལྕགས་ཐག་གཏོར་བའི་ནུས་པ་ཅི།།

སྔོན་གྱི་ཁ་ཡིག་གང་དུ་བྲིས་དེ་ལས།།

ཁྱོད་ཀྱིས་ཁ་ལོ་བསྒྱུར་དབང་གང་དུ་ཡོད།།

ལོ་ཟླ་བཙན་པོ་ཐོག་དང་འདྲ་ན་ཡང་།།

ཞེན་པའི་འཁྲེང་བ་ལྡོག་པའི་ཐབས་ཅི་ཞིག།

དགའ་དུངས་དངོས་མ་སུ་ལ་ཤོར་དེ་ལས།།

རང་སེམས་རང་གིས་རྙོག་པར་སུ་ཞིག་མོས།།

དུས་ཀྱི་འགྱུར་ལྡོག་སྐུད་པའི་ཁུག་མགོ་ལ།།

ཚེ་ཡི་ཆུ་ཐིག་རེ་རེ་རེ་རེ་བཞིན།།

གནའ་ནས་ཟད་ལ་ད་ཡང་ཟད་བཞིན་པ།།

འདི་དག་འདི་ཡང་འཚོ་བ་བརླག་ཚུལ་ཞིག།

བྱིས་དུས་ལྟེ་ཁྲག་མཐོར་སའི་ཕ་གཞིས་དང་།།

ཆུང་དུས་ཁོ་ལག་རྒྱས་སའི་ཨ་མའི་རུམ།།

དར་དུས་རྩེད་རོགས་དགོད་རོགས་ན་ཟླ་བཅས།།

སུས་ཀྱང་མ་ཐོབ་སུ་ལའང་མ་དབང་བའི།།

ནང་སེམས་རྡོག་རྡོག་གཅིག་གི་ཁོར་ཡུག་དེར།།

སྐྱོ་སྡུག་མཆི་མའི་རྒྱ་མཚོའང་འཁྱིལ་ཏེ་འགྲོ།།

མི་འོས་མི་རུང་མི་མཛའ་མི་དགའ་ཞེས།།

སྙིང་གི་རྩ་ཕྲན་དག་ཀྱང་འདར་བར་བྱེད།།

བལྟས་ན་ཉམས་དགའ་སྲིད་པའི་གྲོང་ཁྱེར་དུ།།

དཔྱད་ན་མི་འདོད་ཇེ་མང་ཇེ་མང་རེད།།

མདོར་ན་འཇིག་རྟེན་འདི་ཡི་གླིང་ག་ནས།།

དོན་དུ་ཅི་ཞིག་འཚོལ་བར་སྙིང་པོ་ཅི།།

ཨེ་མ་ད་ནི་ཡིད་ཐང་ཆད་དེ་ཐལ།།

དྲན་ན་མི་འདོད་དྲན་པའི་གདུང་བ་ལྕི།།

ཚོར་བ་བཟི་བའི་བཟི་ཁ་བཙན་པོ་འདིས།།

ཁྱོད་ལ་འགྲམ་ལྕག་ལན་གཅིག་བཞུ་བར་བྱེད།།

ད་ནི་མུ་མེད་འཇིག་རྟེན་འདི་ཡི་མཐར།།

ཟད་མཐའ་མེད་པའི་མུན་ནག་ཁོ་ནའི་ཁྲོད།།

ཧ་ཅང་ལྷིང་འཇགས་ཡིན་པའི་མཚན་གཞུང་དུ།།

མགྲིན་པ་གནང་བའི་ཚིག་དག་བཤད་པར་བྱེད།།

ཡང་ན་ལག་ཏུ་ཆང་གི་བུམ་པ་ཐོགས།།

ཁ་རུ་བླུགས་བཞིན་གོམ་སྟབས་ཡ་ཡོའི་ངང་།།

མདུན་ལྗོངས་གཡས་གཡོན་ཡོད་དོ་སྐབས་ཤིག་ལ།།

བརྗེད་པའི་གོ་སྐབས་ཤིག་ཀྱང་འཚོལ་བར་བྱེད།།

ཚིག་གསུམ་སྐད་ཀྱིས་ཅི་ཡང་མི་མཚོན་ཡང་།།

བྱང་ཁོག་ཕུ་ཡིས་གང་བའི་ལེ་ལན་དུ།།

འབྲེལ་ན་དཔྱིད་ཉི་གསུམ་ལ་མི་ཚར་བ།།

ལོ་ངོ་བཅུ་ཕྲག་རིང་གི་ཞེན་པ་ཡིན།།

2020 2 21 ལ་བྲིས།

བརྩེ་བའི་བདག་མོ་དག་གི་ཁྱད་ཆོས།

མཱ་ལ་ཏི།

ཕ་ཁྱིམ་གྲུ་གཞི་ལ་དྲོད་ཁོལ་སྦྱིན་མཁན།།

ལོ་ཆུང་བྱིས་པ་ཚོ་བྱམས་སྐྱོང་གནང་མཁན།།

ཕ་དང་བུ་ཕྲུག་ལ་གུས་བཀུར་ཐུབ་མཁན།།

བརྩེ་བའི་བདག་མོ་ཁྱེད་རིགས་ཀྱི་ཡུམ་ཆེན།།

སྐྱིད་པའི་འཚོ་བ་ལ་སྤྲོ་སྣང་སྩོལ་མཁན།།

སྐྱོ་བའི་ངལ་དུབ་སྐབས་སེམས་གསོ་བྱེད་མཁན།།

སྐྱིད་སྡུག་ལེགས་ཉེས་སོགས་ཅི་བྱུང་ཀུན་དུ།།

ཡལ་མེད་མཛུམ་མདངས་ཀྱི་སྒྲོན་མེ་འོད་ཆེན།།

ལས་འབྲས་བླང་དོར་ལ་སློབ་སྟོན་བྱེད་མཁན།།

ཁྲེལ་གཞུང་ཕྱི་ཐག་གི་ལམ་ལུགས་བཙུགས་མཁན།།

མི་གཞི་ཀུན་སྤྱོད་ཀྱི་བསླབ་བྱ་གནང་མཁན།།

འགྲོ་བའི་མ་མ་ཁྱེད་དགེན་གྱི་ཐོག་མ།།

དྲི་མེད་ལྷག་བསམ་གྱིས་རིགས་རྒྱུད་སྤེལ་མཁན།།

ཞུམ་མེད་སྤོབས་པ་ཡིས་ཁྱིམ་གཞི་སྐྱོང་མཁན།།

སྲིད་པའི་བདག་མོ་ཁྱེད་མི་ཚེའི་ལམ་སྟོན།།

འཇིག་རྟེན་གཙོ་མོ་ཁྱེད་བདེན་པའི་དར་ལྕོག།

༢༠༢༠ ༣ ༨

ཁྱོ་རང་ངུ་བཞིན་ཡོད་པ་ཐོས་མྱོང་།

འཇང་འཛུམ་ཟེར།

ངས་ཁྱོད་རང་ངུ་བཞིན་ཡོད་པ་ཐོས་མྱོང་།

ཁྱོད་ཀྱི་མིག་ཟུང་ལས་མཆི་མ་འཐོར་གྱིན་ཡོད་པ་ཐོས་མྱོང་།

བདག་གི་འཆར་སྣང་ཁྲོད་ནས།

མེ་ཏོག་འདབ་ལོ་ལས་དྭངས་གཙང་གི་ཟིལ་བ་འཐོར་གྱིན་ཡོད་པ་དང་འདྲ།

ངས་ཁྱོད་དགོད་ཀྱིན་པ་ཐོས་མྱོང་།

རྒྱུད་མང་སྟོང་གིས་འགྲན་པར་ག་ལ་བཟོད་དེ།

ཁྱོད་ཀྱི་འཛུམ་མདངས་ཀྱི་དགོད་སྒྲ་ཨང་།

སྐབས་དེར།

འདུན་བགྲོད་ཀྱི་གོམ་ཁ་ལྷོད་དེ།

ང་རང་གཅིག་པུ།

ཀྱག་ཀྱོག་གི་ལམ་ཕྲན་ཞིག་ནས་འགྲོ་སྐབས།

མུན་པ་རུབ་ཅིང་རུབ་ཅིང་སྐར་མ་ཡང་མེད།

ངའི་རེ་བ་ནི།

བསིལ་འོད་ཀྱིས་འཁྱུད་པའི་ཁྱོད་ཀྱི་དགྱེས་ཞལ་དེ་མཐོང་ན་འདོད།