འཆར་ཡན་པའི་དགུན་ཟླ།

-----ཀ་ར། དྲེའུ་དཀར།

ནམ་མཁའ་ཡངས་བའི་འཇིག་རྟེན་ནས།།

དཀར་ཞིང་སྙི་བའི་ཁ་བ་འཚུབ།།

གྲང་ལ་ངར་བའི་འཁྱག་རོམ་གྱིས།།

འཁྱམ་པོའི་བ་སྤུ་འགུལ་དུ་བཅུག།

སྐྱོ་སྣང་ལེན་པའི་འཁྱམ་པོ་ཡིས།།

འཁྱག་གིས་བསྡམས་པའི་མེ་ལོང་ངོར།།

དགུན་ཟླ་ཞེས་བྱའི་ཐ་སྙད་བྲིས།།

དེ་ནི་དབྱར་ཟླ་དྲན་སྟངས་གཞན།།

གཙང་ལ་གཤེར་བའི་ཆུ་བོ་ཡིས།།

ཆབ་རོམ་གོས་ཀྱི་ཡོལ་བ་འཐེན།།

དེ་རུ་གསལ་བའི་ཟླུམ་པོའི་འོད།།

མ་མཐོང་སྐྱོ་བ་དྲན་པར་ཟུག།

རི་དང་ལུང་བ་རི་སྐེད་དང་།།

གཞུང་དང་དེ་རུ་དངུལ་དཀར་འཕྱོ།།

འཆར་ཡན་འབྲི་བའི་སྙན་ངག་པས།།

ཁོ་མོའི་སྟོང་ཉིད་དེ་རུ་བཏབ།།

སེམས་ཀྱི་མེ་ལོང་ཡངས་པོའི་ངོར།།

དགུན་གྱི་གྲང་བའི་ཁ་ཆུ་འཐོར།།

སྨྲེ་བའི་ངག་གི་འགྲིན་པ་ཡིས།།

འཁྱག་པའི་ན་བུན་གླུ་རུ་བཏང་།།

གླུ་ཡི་ཚིག་ཏུ་མེ་ལོང་བྲིས།།

མེ་ལོང་ནང་གི་དགུན་ཟླ་བྲིས།།

ཞོར་དུ་རྒྱང་གི་མེ་ཏོག་ལ།།

འཕྲིན་གྱི་གཤོག་བྱ་རབ་ཏུ་སྤུར།།

རི་སུལ་འགྲིམ་པའི་རྫི་བོ་ཡིས།།

དགའ་སྐྱོའི་ཤིང་རྟ་ཞོན་པ་ན།།

སྙན་སྙན་ནང་གི་མི་སྙན་པའི།།

སྨྲེ་བའི་ཚིག་དུམ་སེམས་སུ་བྲིས།།

ཚིག་ཏུ་དགུན་ཟླ་འདི་ཡང་བྲིས།།

དགུན་ཟླའི་ཁྱོད་ཀྱི་གྲང་ངར་བྲིས།།

ཞོར་དུ་བས་མཐའི་སྒོམ་ཆེན་པར།།

སྤྱན་གྱི་རྦ་རླབས་རབ་ཏུ་འཕྱུར།།

སྤྲིན་པ་ལྷོ་ཡི་ཚིགས་སུ་འཐེན།།

ཉི་མ་གབ་ཏུ་འགེམས་པ་ཡིས།།

དྲོད་དུ་རྒྱུ་བའི་སྐྱེས་བོའི་ཚོགས།།

སྨྲ་བ་མེད་པར་འདར་གྱིན་དུ།།

དྲན་པ་འཁྱག་དང་འདྲེས་པའི་གཏམ།།

ལེའུར་བྲིས་ཀྱང་མི་ཚར་མོད།།

རེ་ཞིག་འདི་ཡི་སྐབས་རྫོགས་ཏེ།།

ཀློག་པ་པོ་ཡི་སྤྱན་དུ་འབུལ།།

(2020.3.20) མཇུག་གྲུབ།