སྐོང་གདུང་གི་ཆུ་བོ།

ཨ་མ།

ཁྱེད་ནི་ལྷ་ཡི་བུ་མོ་མ་ཡིན་ལ།།
དྲི་ཟའི་རིགས་ལས་བྱུང་བ་དེ་བས་མིན།།
རླབས་ཆེན་ཨ་མའི་མཚན་འཛིན་སྨིན་ལེགས་མ།།
ཁྱེད་ཀྱི་བྱམས་བརྩེའི་དྲོད་ཁུལ་མྱོང་བར་འདོད།།

ཁྱེད་ནི་ཤེས་བྱའི་མཚོ་ལ་མ་དཔོག་ཀྱང་།།
ལྷག་བསམ་འོ་མའི་མཚོ་ལ་དཔོག་པ་མོ།།
བདག་ནི་མཚོ་མོར་འཁོར་བའི་ཉ་ཕྲུག་བཞིན།།
ཁྱེད་ཀྱི་བསླབ་བྱའི་མཚོ་རུ་འཁྱུག་པར་འདོད།།

ཁྱེད་ཀྱི་ཕྱི་པགས་མཛེས་མ་མ་ཡིན་ཡང་།།
ནང་སེམས་ལྷད་ཀྱིས་མ་སྦག་ཡིད་འཕྲོག་མ།།
བདག་ནི་ཁྱེད་ལ་ཆགས་པའི་འདོད་ལྡན་བཞིན།།
ཁྱེད་ཀྱི་མཛེས་པའི་འཛུམ་གྱིས་བསུ་བར་འདོད།།

ཁྱེད་ནི་གཡུལ་འགྱེད་དཔའ་བོ་མ་ཡིན་ཡང་།།
སྲིད་དུ་གྲགས་པའི་རླབས་ཆེན་དཔའ་མོ་ཞིག།
བདག་ནི་ཁྱེད་ལ་སྨོན་པའི་སྡར་མ་བཞིན།།
ཁྱེད་ཀྱི་རྒྱབ་སྐྱོར་ཀློང་ནས་འགྱིང་བར་འདོད།།

ཁྱེད་ནི་འབྱོར་ལྡན་ཕྱུག་པོ་མ་ཡིན་ཡང་།།
བྱམས་བརྩེའི་གཏིང་མཐའ་མངོན་མེད་རབ་ཕྱུག་མ།།
བདག་ནི་བྱམས་བརྩེ་འདོད་པའི་དབུལ་པོ་བཞིན།།
ཁྱེད་ཀྱི་བྱམས་སྐྱོང་ཁྲོད་ནས་དར་བར་འདོད།།

ཁྱེད་ནི་ངག་གི་ལྷ་མོ་མ་ཡིན་ཡང་།།
སྙན་འགྱུར་དབྱངས་རྟ་མཁས་པའི་དབྱངས་ཅན་མ།།
བདག་ནི་རྣ་དབང་ཞན་པའི་འོན་པ་བཞིན།།
ཁྱེད་ཀྱི་འབོད་སྒྲ་སྙན་མོས་སེལ་བར་འདོད།།

ཁྱེད་ཕང་དབྱར་སྐྱེས་རྫིང་བུ་མ་མིན་ཡང་།།
ལྷིང་འཇགས་དྲོད་ཀྱིས་ཕྱུག་པའི་ཞིང་ས་ཞིག།
བདག་ནི་ལྷིང་འཇགས་འཚོལ་བའི་རི་དྭགས་བཞིན།།
ཁྱེད་ཀྱི་ཕང་བར་ལང་ཚོ་རྫོགས་པར་འདོད།།