བོད་རིག་པའི་རྩོམ་རྩལ་རྒྱང་སྐྱོད་ཀྱི་༢༡༤༨རྩོམ་རིག་འགྲན་སྡུར།༼༤༽བདམས་ཐོན་བརྩམས་ཆོས་རབ་དགུ།

བོད་ཆོས་རིག་གཉིས་ཀྱི་ཤིང་རྟ་པ་ཆེན་མོ་འཇིག་རྟེན་སྣང་བའི་མིག་གཅིག་

དྲིན་ཆེན་སློབ་དཔོན་ཐུ་མི་རྗེས་སུ་དྲན་པ་གངས་ཀྱི་རྡོ་རིང་ལས་

བཞེངས་པའི་སྤྱན་ཆབ་དཀར་པོ།

ཨང་དང་པོའི་དང་པོ།

རྩོམ་པ་པོ། སྨན། ཆབ་འབྲོང་།

ཀུན་ཤེ༵ས་ཤེ༵ས་རབ་རལ་གྲིའི་འཕྲུལ་འཁོ༵ར་འཁོ༵ར་བའི་དམུ་ཐག་དུམ་བུར་གཅོད་ལ་བསྒྲེངས་སེ་སྒྲེང་། །

ཀུན་རི༵ག་རི༵ག་པའི་གླེགས་བམ་འོད་རླ༵བས་རླ༵བས་ཆེན་རྒྱལ་རྣམས་དགེ་བར་བཀྲི་ལ་ཤིགས་སེ་ཤིག །

ཀུན་ཁྱ༵བ་ཁྱ༵བ་བདག་འཇམ་དཔལ་དབྱངས་ག༵ང་ག༵ང་འདུལ་སྒྱུ་འཕྲུལ་གངས་ཅན་ཞིང་ན་ལྷུམས་སེ་ལྷུམ། །

ཀུན་མཁ༵ས་མཁ༵ས་མཆོག་སློབ་དཔོན་ཐུ་མི༵་མི༵་ཕྱེད་དད་གསུམ་དྲན་པའི་གཙུག་ན་ལྷངས་སེ་ལྷང་། །

དུས་གསུམ་སངས་རྒྱས་སྙིང་རྗེའི་སྤྱི་གཟུགས་དྲག་ཏུ་ཁྲོས་པའི་བཀའ་རྟགས་ཕྱག་རྒྱའི་འཁོར་ལོ་ཆེ༵། །

ཆེ༵་བཙན་ཟླ་བྲལ་མཐའ་དབུས་ཕྱོགས་ཀྱི་གནམ་བསྐོས་གོང་མའི་མི་འཇིགས་གཙུག་ཏུ་བཞེངས་མཛད་པ༵། །

པ༵་ཕ་ཡབ་མེས་འཕྲུལ་གྱི་དབང་ཕྱུག་ཆོས་རྒྱལ་སྲོང་བཙན་ཞི་རྒྱས་དབང་དྲག་མཛད་ཕྲིན་དཔ༵ལ། །

དཔ༵ལ་འབྱོར་རིག་གསུམ་ཕྱོགས་བཅུར་སྐྱེད་མཛད་དྲིན་ཆེན་སློབ་དཔོན་ཐུ་མི་ཀུན་ཏུ་བཟང་པོ་དྲན། །

དགུ་འགྱུར་སྙིང་སྟོབས་རྡོ་རིང་རྟགས་ཀྱིས་སུམ་གཉིས་འཛམ་གླི༵ང་གླི༵ང་བཞིའི་སྲིད་ཁམས་དབང་སྡུད་པ། །

སྟོང་སྡེའི་དྲུག་ཅུའི་རུ་དཔུང་འཛིན་མཁན་འཕྲུལ་གྱི་དགུང་བློ༵ན་བློ༵ན་ཆེན་སྟོང་བཙན་མགར་སོགས་ཀྱང་། །

ཞབས་ཀྱིས་མ་ཆོད་དཔུང་གིས་མ་སླེབས་ལྷོ་ཕྱོགས་རྒྱ་དཀ༵ར་དཀ༵ར་ཆོས་རིག་པའི་ཆུ་འགོ་ལ། །

དཀའ་བ་ཁྱད་བསད་ངལ་བ་དང་བླངས་སྲོག་གིས་རྟོལ་མཁ༵ན་མཁ༵ན་མཆོག་ཐུ་མི་ཀུན་ཏུ་དྲན། །

འཛམ་གླིང་རྒྱལ་སྤྱིའི་སློབ་གྲྭ་ཐོག་མ༵་མ༵་ཡུམ་སློབ་གླིང་ནཱ་ལེཎྜ་ཡི་སྐྱེད་ཚལ་ལས། །

རིག་པའི་སེང་གེ་ལི་བཱི་ཀ་ར༵་ར༵་ཡིག་གཉིས་པ་མཉེས་པ་གསུམ་གྱི་ཟེ་འབྲུར་སྙེན། །

ཕྱི་དང་ནང་གི་ཆོས་རིག་གཙུག་ལ༵ག་ལ༵ག་པར་སྐྱུ་རུ་གཟིགས་པའི་མཁྱེན་རབ་འདབ་ཡངས་གྲོལ། །

བོད་ཡང་དག་པའི་གྲགས་སྙན་དྲི་བཟ༵ང་བཟ༵ང་པོ་དགུ་ཡིས་འཕགས་བོད་ཤིས་མཛད་ཐུ་མི་དྲན། །

ཐུ༵ང་ཐུ༵ང་བགྲང་བྱའི་ཤོག་ལྷེ་རིང་མོ་སྐྱེས་སྦྱངས་རིགས་སྟོབས་རྩལ་བོ་ཆེ་ཡིས་རིངས་པར་རྫོགས། །

རི༵ང་རི༵ང་གདོད་མའི་ནང་བསྟན་སྙུག་ཆུ་ཐུན་མོང་རིག་གནས་བུམ་པ་གང་བྱོས་ངོམས་མེད་འཐུང་། །

མ༵ང་མ༵ང་སུམ་བརྒྱ་དྲུག་ཅུའི་སྐད་ཡིག་འཇམ་དཔལ་ཡབ་ཡུམ་སྙིང་ཁར་རྩེན་པའི་རིག་འཕྲུལ་གྱིས། །

ཉུ༵ང་ཉུ༵ང་སོ་བཞིའི་དབྱངས་གསལ་རི་མོ་གསར་དུ་བཞེངས་མཛད་ཤིང་རྟ་ཐོག་མ་ཐུ་མི་དྲན། །

ཐེའུ་རང་མང་སྙ་ཀུ་བེ་ར་ཞབས་བོ༵ད་ཀ་གཡག་དྲུག་གདོང་ལྔའི་ཁྲི་ལ་བཞེངས་པ་ནས། །

གནམ་སའི་ཁམས་ན་འཁོར་ལོས་སྒྱུར་པའི་བོ༵ད་རྒྱལ་སློན་བཙན་མཐའ་བཞིའི་བླ་བདག་འཕགས་པའི་བར། །

སྒྲུང་ལྡེའི་བོན་སོགས་སྲིད་པའི་རིག་གནས་བོ༵ད་ཁམས་སྐྱོང་བའི་ཁྲི་ཕྲག་སྐར་ཆེན་གཙུག་གི་ཏོག །

འཛམ་གླིང་ཤར་ནུབ་གཙུག་ལག་སྙིང་འདུས་བོ༵ད་རིག་པ་ཡི་ཉ་གང་སྐྲུན་མཛད་ཐུ་མི་དྲན། །

གཞན་སྨན་ལྟ་བའི་འོད་དཀར་ཀུ༵ན་རྫོགས་ཀུ༵ན་ཏུ་གསལ་བའི་སྣང་འབར་ཁྲི་གདུགས་ཡེ་ནས་རྒྱས། །

འཚེ་མེད་སྤྱོད་པའི་ཚ་རླབས་ཡོ༵ངས་རྫོགས་ཡོ༵ངས་སུ་དྲོ་བའི་གུར་ཁྱིམ་རྩིབས་སྟོང་གདོད་ནས་འཕེལ། །

བརྟན་གཡོའི་འཇིག་རྟེན་ནམ་མཁའི་ཁ༵མས་ལ་ཁ༵མས་དབང་དང་འཚམས་ཕན་བདེའི་ཟེགས་མ་ཀུན་སྩོལ་པ། །

བོད་བརྒྱུད་ནང་བསྟན་བླ་ནོར་ད༵མ་པ་ད༵མ་ཆོས་ཉིན་བྱེད་ལྗོངས་འདིར་བསུ་མཛད་ཐུ་མི་དྲན། །

ཕྱི་དང་ནང་གི་བསླབ་པ་མ་ལུས་ཆགས་ཐོགས་ཀུ༵ན་བྲལ་ལྟོས་པས་འཛིན་པ་ཁྲོ་ལོ༵་ལོ༵། །

འཇིག་དང་རྟེན་པའི་གཙུག་ལག་མི་ལུས་རྨོངས་འཐོམ་ཀུ༵ན་དག་གཞི་རྩ་སྐྱོང་བ་ཤ་ར༵་ར༵། །

གནས་དང་གནས་མིན་ལུང་དུ་སྟོན་པ་ལུས་མེད་ཀུ༵ན་སྟོན་ལུགས་གཉིས་སྤེལ་བ་ཐུ་ལུ༵་ལུ༵། །

བཀྲ་ཤིས་རྟགས་བརྒྱད་བརྡ་སྤྲོད་གཞུང་ཆེན་བོད་ཁམས་ཀུ༵ན་ཏུ་དགེ་བའི་རྟེན་རྩོམ་ཐུ་མི་དྲན། །

རི་མཐོ༵་ས་གཙང་ཆུ་བོའི་མཛོད་ཆེན་མཐོ༵་སྒང་འཛམ་གླིང་གཙུག་གི་རྒྱ་ཕིབས་གངས་ལྗོངས་སུ། །

ཆོས་རི༵ག་ཟུང་འཇུག་ཉི་ཟླའི་དཀྱིལ་འཁོར་རི༵ག་པའི་ཤིང་རྟས་ཕན་བདེའི་སྒོ་བརྒྱ་ཕྱེ་ཙ་ན། །

སར་གན༵ས་དཀར་ནག་ལི་བལ་འཇང་སོགས་གན༵ས་བཅུའི་ཞིང་གིས་ཆ་ཡི་ཆ་ཙམ་འགྲན་བྲལ་བས། །

སྟེང་ཕྱོ༵གས་བདེ་ལྡན་འོག་མིན་གནས་ཞེས་ཕྱོ༵གས་བཅུའི་གྲགས་པའི་སྙིམ་པར་བཞེངས་མཛད་ཐུ་མི་དྲན། །

ཕོ་བྲང་རླུང་འཚུབ་མ་རུ༵་ཏ་རུ༵་གཙུག་ལག་བདུད་རྩིའི་དགའ་སྟོན་འགྱེད་ཅེས་གཡས་འཁྱིལ་དུང་། །

ཆེན་པོ་བོད་ཁམས་ཕྱོགས་སུ༵་ཡོངས་སུ༵་གྲགས་པ་ཆེམས་པས་བླ་འབངས་སྤྲུལ་པའི་མི་ཚོགས་རྣམས། །

དད་གསུམ་ལྕེ་བརྒྱ་ཐབས་ཅི༵ག་ལྷན་ཅི༵ག་འདུས་ཤིང་བསྡོངས་ཏེ་སློབ་འབངས་འདུ་བ་ཆེར་རྒྱས་པ། །

མ་རིག་སྨག་གི་ཁམས་ན༵ས་སྐྱོབ་ན༵ས་དོན་རབ་རྣམ་འབྱེད་འོད་དཀར་སྟེར་མཛད་ཐུ་མི་དྲན། །

ལྷ་གཅི༵ག་གྲུ་འཛིན་བདག་པོའི་ཕྱག་རྒྱས་སྲིད་ན་ཆེ་བའི་བཀྲ༵་ཤི༵ས་ལྷ་རེག་གུས་པས་བཏེག །

དོན་གཉི༵ས་དབང་འབྱོར་ཕྱག་ན་རྡོ་རྗེ་དགུང་བློན་མགར་གྱིས་བདེ༵་ལེ༵གས་གཙུག་ཏུ་རངས་པས་བཀུར། །

རིགས་གསུ༵མ་སེམས་དཔའི་ལྷ་འབངས་དག་གིས་ཕུ༵ན་ཚོ༵གས་བླ་ན་ཕན་བདེའི་ཐར་སྟོན་དད་པས་བསྙེན། །

སྡེ་བཞི༵་དབང་ཕྱུག་འཇམ་དཔལ་དབྱངས་དངོས་བོད་ཁམས་མཁས་པའི་སློབ་དཔོན་དང་པོ་ཐུ་མི་དྲན། །

བླ་བྲང་མཛོད་ཆེ༵ན་བྱུར་བུར་གཏམས་པའི་གཉན་པོའི་གསང་བ་ངོ་མཚར་རྨད་བྱུང་གཏེར་གྱི་སྒྲོམ། །

རྒྱལ་ཁམས་དགེ་བའི་དཔལ་ཡོན་དྭངས་མ་སྤྱན་གཟིགས་ཆེ༵ན་མོའི་ཉེེར་གཅིག་མདོ་རྒྱུད་ནོར་གྱི་སྒམ། །

ཤར་ནུབ་སྐད་རིགས་ཆེ༵ན་པོའི་ལྡེ་མིག་རིགས་སྟོབས་ཕྱག་སོར་རྩལ་གྱིས་ཉེར་འདྲེན་སྒོ་བརྒྱ་འབྱེད། །

རབ་འབྱམས་སྡེ་སྣོད་བསྒྱུར་ཞུས་ཕབ་བསྒྲིགས་གངས་ཅན་མཁས་མཆོག་འཇིག་རྟེན་མིག་ཆེ༵ན་ཐུ་མི་དྲན། །

ཕྱི་དགྲ་གཉི༵ས་གཉི༵ས་མཐའ་ཡི་དམག་ཚོགས་ཕྱེ་མར་འཐག་པའི་མི་ཤིགས་རྡོ་རྗེའི་ལྕགས་ནག་རྫོང་། །

ནང་གཉེན་གསུ༵མ་གསུ༵མ་སྒོ་ཕུག་བར་གྱི་བཀའ་འབངས་མངའ་རིས་དགེ་བར་སྐྱོང་བའི་གཏེར་གྱི་སྒྲོམ། །

ཁོད་སོ་དྲུ༵ག་དྲུ༵ག་ལུགས་གཉིས་ཁྲིམས་བཟང་རང་གཞན་སྲུང་བའི་གནམ་ལྕགས་རྡོ་རྗེའི་གོ་ཁྲབ་དངོས། །

གངས་རི་སྟོ༵ང་སྟོ༵ང་ར་བར་བརྗིད་པའི་བོད་ཁམས་དཔལ་དུ་རྣམ་པར་གཏོད་མཛད་ཐུ་མི་དྲན། །

ན༵ང་གི་དུག་གསུམ་ན༵ང་ནས་འཆོས་པའི་ན༵ང་བསྟ༵ན་བསྟ༵ན་གཉིས་བཤད་སྒྲུབ་ཀྱིས་འཛིན་ཆོས་པའི་དཔུང་། །

ཕྱི༵་ཡི་སྡེ་བཞི་ཕྱི༵་ནས་སྐྱོབ་པའི་ཕྱི༵་མི༵་མི༵་ཆོས་ཐབས་ཤེས་ཀྱིས་སྐྱོང་ཁྱིམ་པའི་ཚོགས། །

བ༵ར་གྱི་རུ་ལྔ་བ༵ར་ནས་སྐྱེད་པའི་དབུས་བ༷ར་བ༵ར་མཐའ་མཁས་མཛངས་ཀྱིས་སྤེལ་བར་བའི་སྡེ། །

ཀུ༵ན་གྱི་སློབ་དཔོན་ཀུ༵ན་ཏུ་བཟང་པོ་རྣམ་ཀུ༵ན་ཀུ༵ན་ཏུ་མི་བརྗེད་རྡོ་རིང་གཏིང་ནས་དྲན། །

སྟོན་མཆོག་ཐུབ་པའི་དབང་པོར་ཕུལ་བའི་མཆོད་སྤྲིན་ངག་གི་དྭངས་མ།

ཨང་དང་པོའི་གཉིས་པ།

རྩོམ་པ་པོ། རྣོ་མིག དཔལ་ཡུལ།

འགྲོ་བློའི་ལེགས་བྱས་འོ་མའི་རྫིང་བུའི་ཁར། །

ཚོགས་གཉིས་སྤྲིན་གྱི་ཕོན་པོ་འཁྲིགས་པ་ལས། །

དད་པའི་ཞིང་སར་སྨིན་པའི་མཆོད་སྡོང་ཆེ། །

མ་འདྲིས་འགྲོ་བའི་རྩ་ལག་ཅེས་སུ་གྲགས། །

གང་ཐུགས་ཟག་མེད་དགྱེས་པའི་བང་མཛོད་ལས། །

ཕན་བདེའི་སྦྲང་ཆར་འཇོ་བའི་ཡིད་ཀྱི་དཔལ། །

མྱངས་ན་ཟད་མཐའ་རྫོགས་པའི་སེམས་ཀྱི་སྨན། །

ལེགས་གསུང་མདོ་རྒྱུད་ཁྲོད་ནས་ཁྱེད་ཞལ་མཇལ། །

ཟབ་ཅིང་གཏིང་དཔག་དཀའ་བའི་ཆོས་ཀྱི་ཀླུང་། །

བློ་ཆུང་བློ་ཡི་ཡུར་བར་མི་ཤོང་མོད། །

ཁ་གསལ་ནང་སྙིང་ཟབ་པའི་ཚིག་བཅད་རེས། །

རིང་ནས་དུབ་པའི་ངལ་བ་ལན་གཅིག་གསོས། །

རྨོངས་མུན་གཉིད་ལ་ཡུར་བའི་བྱིས་པའི་ལས། །

གཞན་གནོད་ཆོས་སུ་སྨྲ་བའི་གྲུབ་པའི་མཐའ། །

ཚུལ་མིན་ཐབས་སུ་གཟིགས་པའི་ཤེས་རབ་དེ། །

ས་སྟེང་སྐྱེ་བོར་བཞག་པའི་སྤྱི་ཡི་ནོར། །

འུད་གཏམ་བཙན་གྱིས་བསྒྲིགས་པའི་བྱིས་སྒྲུང་སྟེ། །

བླུན་པོ་མགུ་བའི་མཚར་གཏམ་མ་ཡིན་པའི། །

ངོ་མཚར་རིགས་པའི་རྣམ་གྲངས་རེ་རེ་ཡིས། །

བློ་ལྡན་སྐྱེ་བོའི་ཡིད་སེམས་དབང་མེད་དྲངས། །

རིང་ནས་དོན་དུ་གཉེར་བའི་ཟིང་ཟང་ནོར། །

རྙེད་ཀྱང་ཞེ་བློ་བདེ་བའི་ཐབས་བོར་ཉིན། །

ཚུལ་མཐུན་ཆོས་ཀྱི་ཅུང་བརྡ་ཆུང་ངུ་ཡང་། །

འབུམ་ཕྲག་སྐྱེ་བོའི་རྣ་བའི་དཔལ་དུ་འཇེབ། །

སྒོ་གསུམ་དལ་གྱིས་རྒྱུ་བའི་སྐུ་དངོས་ཀྱིས། །

འགྲོ་བློའི་གདུང་བ་བསལ་བ་ཅི་སྨོས་ཏེ། །

ཧ་ཅང་ཞི་ཉམས་ལྡན་པའི་སྐུ་བརྙན་དེས། །

ནང་གི་སེམས་ཀྱི་རྙོགས་མ་ཞི་བར་བྱས། །

ཁྱེད་ཉིད་ཕེབས་པའི་ཤུལ་ལམ་རེ་རེ་སྟེ། །

ནང་པའི་གནས་སུ་གྲགས་པའི་གྲོང་དུ་ཡང་། །

བྱ་དང་རི་དྭགས་བག་ཡངས་སོས་དལ་ངང་། །

བྱམས་བརྩེའི་མེ་ཏོག་རྐང་རེ་རྒུམ་གྱིམ་ཡོད། །

དམར་ནག་ཁྲག་གི་མཚོ་མོ་སྐྱོམ་པའི་ཐང་། །

འཇིགས་སྣང་ཡ་ངའི་ལས་ཀྱིས་མནར་བའི་གྲོང་། །

ས་ག་ཟླ་བའི་ལྗང་མདོག་གིས་བསླད་པ། །

ཁྱེད་ཀྱི་བྱང་ཆུབ་ཤིང་གི་བསིལ་གྲིབ་ཡིན། །

འབུ་ཕྲན་ཕྲ་མོ་གསོད་པར་མི་ནུས་ཤིང་། །

ལྟོ་སྐྱ་ཆས་གོས་ཧྲལ་བའི་དགེ་སློང་གིས། །

རྒྱ་མཚོའི་ཕ་མཐར་ཁྱེར་བའི་ཞི་བའི་སྨན། །

ཁྱེད་ཀྱི་བྱམས་བརྩེ་ཟེགས་མའི་ཆར་རྒྱུན་ཡིན། །

ཆགས་སྡང་དུད་སྤྲིན་འཁྲིགས་པའི་ཕོན་པོ་སྟེ། །

ཉིད་ཀྱི་སློབ་བུའི་ཡང་ཐ་གུས་ཕྲན་གྱི། །

མ་བོར་ཙམ་གྱི་དགེ་བློའི་སྣང་བ་ཡང་། །

ཁྱེད་ཀྱི་བྱང་ཆུབ་ལོ་མའི་ཆ་ཤས་ཡིན། །

རེ་བ་འདི་གཅིག་མ་གཏོགས་མེད།

ཁུལ་ལས་རིགས་ལག་རྩལ་སློབ་གྲྭའི་བོད་ཕྲུག་གམ་སློབ་གྲོགས་ཡོངས་ལ།

ཨང་གཉིས་པའི་དང་པོ།

རྩོམ་པ་མོ། འབྲོག་གཡུ། གསེར་རྟ།

སྡོང་བོ་སུ་ཞིག་གིས་གཡོ་བཞིན་འདུག སེམས་པ་སུ་ཞིག་གིས་གསོད་གྱིན་འདུག ཉིན་འདི་དག་གམ། ཡང་ན་ཟླ་འདིའི་ནང་དུ་ངས་འུར་ཟང་ཟིང་གི་ཉིན་མོ་ལྟ་ཅི། ཐ་ན་ལྷིང་འཇགས་ཀྱི་མཚན་མོར་ཡང་ནང་སེམས་ཁུ་སིམ་མེར་སྡོད་ཐབས་མི་འདུག རྒྱུ་མཚན། རྒྱུ་སྐར་བྱེ་བས་བཏུམས་པའི་དགུ་ཚིགས་ཀྱི་སྒལ་གཞུང་དུ་མེ་ལོང་འདྲ་བའི་ཤེས་བྱ་ཞིག་ལ་བདག་པོ་བྱེད་མཁན་ཧ་ཅང་ཉུང་། མཚམས་སྤྲིན་གྱི་དམར་མདངས་དང་འོ་དོད་ཀྱི་དགོས་དབང་ལས་བར་སྐོར་དང་སྒེའུ་ཁུང་མང་པོ་ཞིག་ལས། ངས་ནམ་རྒྱུན་ཁྱེད་ཅག་ལ་རེ་བ་གཅིག་མ་གཏོགས་འདོན་གྱིན་མེད། དེ་ནི་ཕ་སྐད་ཉུང་ཤས་རེ་ལབ་རྒྱུ་དང་། མ་ཡིག་ཅུང་ཙམ་རེ་ཀློག་རྒྱུ་དེ་ཡིན། སློབ་གྲྭའི་ཁོར་ཡུག་ཡོད་ཚད་ལས་མི་ཆེས་ཉུང་ས་ནི་དཔེ་མཛོད་ཁང་རེད་འདུག ད་དུང་དེ་ལས་ཀྱང་ཁང་བརྩེགས་གསུམ་པའི་བོད་ཡིག་ཡོད་ས་དེ་རེད། འོན་ཀྱང་། བོད་སྐད་ལབ་མཁན་ཁ་ཤས་ལས་མི་འདུག་པ་འདི་འུ་ཅག་ལ་བཤད་དབང་མེད་པ་ག་ལ་ཡིན། དེ་བས། རང་སྐད་ཅུང་ཙམ་རེ་བཤད་རྒྱུ་དང་བོད་ཡིག་དག་མ་རེ་འབྲི་རྒྱུ་ནི་གུས་མོའི་རེ་བ་ཡིན། རེ་བ་འདི་གཅིག་མ་གཏོགས་མེད།

སློབ་གྲོགས་ཚོ། འུ་ཅག་གཡོ་རྫུ་དང་ཚེར་མས་ཁེངས་པའི་བགྲོད་ལམ་ཕྱོགས་སུ་འགྲོ་བ་མང་དྲགས་འདུག ད་བར་ངའི་བདེན་པ་བདར་བའི་བློ་གྲོས་ཀྱི་གཟི་འོད་མ་རྙེད་པས། ངས་བཤད་འདོད་པ་མང་པོ་ཞིག་ངེས་པར་དུ་ཤོད་དགོས་འདུག ངའི་རེ་བ་དེ་དག་ལ་ཁ་དོག་མེད་པས་ཁྱེད་ཅག་གིས་ཤེས་པ་དཀོན་མོད། ངས་ཐབས་ཅི་འདྲ་ཞིག་བཀོལ་དགོས་རུང་། ཁྱེད་ཅག་ལ་ཤེས་སུ་འཇུག་ན་འདོད། གདོད་མའི་དབྱངས་རྟ་བོར་བའི་མེ་ལྕེ་དེ་བསྐྱར་དུ་སྦར་དགོས་ཞེ་ན་དེ་ནི་ཆིག་ལབ་ཅིག་དུ་འདུག་མོད། ཡིན་ནའང་། རི་མོ་བྲིས་པའི་ངོ་གདོང་འདི་དག་དང་། ལྐོག་ཏུ་ཡིབ་པའི་བདེན་ལུགས་འདི་དག ད་དུང་མང་པོ་མང་པོ་ཞིག་ང་གཅིག་པུས་བཤད་ན་ཆོག་པ་ཞིག་མིན་པས། ཁྱེད་ཅག་གིས་ཅིས་ཀྱང་བོད་ཡིག་མི་དགོས་མ་ཟེར་རོགས།

ད་བར། བརྗོད་བྱ་བྲལ་བའི་གཏམ་རྒྱུད་དག་བསྐྱར་ཟློས་བྱས་ནས་ཡུན་རིང་ཞིག་སོང་མཐར། ངས་དགེ་སྡུག་གི་མེ་ཏོག་མང་པོ་ཞིག་ལ་འདས་དོན་གླེང་བ་དང་། སྨུག་ལོང་གི་བདེན་པ་སྒྲོག་པའི་གད་རྒྱངས་མཁའ་མཐར་འདྲེས་འདུག་པར་ལྟ་བ་ལས་ཅི། ང་ཚོའི་དུས་རྒྱུན་པར་འཚོ་བའི་ཁྲོད་ཁ་བརྡ་བྱེད་བཞིན་པ་དག་ནི་རང་ཡུལ་གྱི་སྐད་ཡིན་ནའང་། བོད་ཡིག་ནི་འུ་ཅག་གིས་ཐུན་མོང་དུ་སྤྱོད་ཆོག་པ་ཉག་གཅིག་ཡིན། ཁྱོད་ཀྱིས་ཟེར་ན་ང་ཚོའི་ཕ་ཡུལ་མི་གཅིག་པས་སྐད་རིགས་ཀྱང་ག་ལ་གཅིག་ཅེས་བཤད་པ་བདེན་མོད། སྐད་གདངས་མི་འདྲ་བ་ལས་ཁྱོད་ཀྱིས་བཤད་པ་དེ་སྔར་བཞིན་བོད་སྐད་རེད། དེ་བས་ན། གནམ་གཤིས་དང་མཁའ་དབུགས་མི་འདྲ་བའི་ས་ཁུལ་སོ་སོ་ནས་སློབ་གྲྭ་འདིར་འཛོམས་པ་ནས་ང་ཚོར་འོས་འགན་ཞིག་ཡོད། འོས་འགན་དེ་ནི་མདོར་བསྡུས་ན་ཕ་སྐད་དང་མ་ཡིག་ལ་མཐོང་ཆེན་དང་སྦྱོང་བ་བྱེད་རྒྱུ་དེ་ཙམ་རེད། སློབ་གྲོགས་ཚོ། ངའི་ཁྱེད་ཅག་ལ་མང་པོ་མང་པོ་ཞིག་བཤད་འདོད་རུང་འདི་ལྟ་བུ་ཞིག་ལས་ལབ་མི་ཤེས་ལ། མང་པོ་མང་པོ་ཞིག་འབྲི་འདོད་ནའང་གང་ནས་མགོ་རྩོམ་དགོས་པའང་མི་ཤེས། ངས་གློ་བུར་དུ་ཁྱེད་ཅག་དང་ཁ་བརྡ་ཞིག་བྱེད་ཐུབ་ན་སྙམ། ཡིན་ནའང་། ཁྱེད་ཚོ་དང་ཁ་བརྡ་བྱས་ནས་ཅི་བྱ། ཅི་བྱེད། ཅི་ཞིག་བཤད། དོན་ངོ་མ་ང་ལ་ཁ་བརྡ་ཞིག་བྱེད་པའི་གོ་སྐབས་ཡོད་ཀྱང་ཁྱོད་ཚོས་ངའི་ཁ་བརྩི་སྲིད་དམ། ངའི་སྣང་བ་ཞིག་ལ། ང་རང་ཁེར་རྐྱང་ངང་བགྲང་མི་ཚར་བའི་མི་ཚོགས་ཀྱི་ཁྲོད་དུ་ལངས་ཤིང་། ཉི་ནུབ་ཀྱིས་ངའི་མཐོང་ཚད་ཀྱི་མི་བུ་མཐའ་དག་ལ་སེར་ལམ་ལམ་གྱི་འོད་མདངས་བྱུགས་བཞིན་འདུག འོན་ཏེ། དེ་དག་ནི་ངའི་སྣང་བ་ཙམ་མོ། །

ཤུགས་འབྱུང་སྨྲེང་གླུ་རིང་མོ།

ཨང་གཉིས་པའི་གཉིས་པ།

རྩོམ་པ་པོ། དགུ་མདུད། རྫ་སྟོད།

སྤྲིན་པ་དང་སྤྲིན་དང་འདྲེས་པའི་བས་མཐའ་རུ་ཅེར་ན། །

ལྷོ་སྤྲིན་བྱང་ལ་བགྲོད་པའི་བཞུད་ལམ་ལས་མ་དམིགས། །

དེ་ཡང་དྲན་པ་ཐོགས་པའི་བྲེལ་ཟིང་ལ་ཁེལ་ཤིང་། །

འཇིག་རྟེན་བྱེ་མ་རི་བོའི་པང་ཁུད་དུ་ཉུལ་ཚེ། །

ལས་སྣང་སྨྲེང་བས་མ་བསྐུར་བདེ་སྐྱིད་དུ་འཁུམས་སོ། །

ཆར་འབྲུ་གཅིག་འཐོར་གཉིས་ལྷུང་སེམས་གཏིང་དུ་ཟགས་ཤིང་། །

ཁ་བ་ལེབ་མོ་གཅིག་ལ་ལེབ་མོ་ནས་བསྟིམས་སོང་། །

འཁོར་བ་སྒྱུ་མའི་ཟློས་གར་སྤྱན་ལམ་དུ་གཡོས་ན། །

དྲི་མེད་བདེན་པའི་ངོ་བོ་སེམས་ངོགས་སུ་འཆར་ཡོང་། །

ཡང་ན་ཚེ་འདིའི་སྣང་བའི་དཀར་འོད་དེ་རྙེད་སོང་། །

ཡོད་ཡོད་ཚད་མར་འཛིན་པའི་འཇིག་རྟེན་གྱི་ཕུན་ཚོགས། །

འཚོ་བ་སྐུད་པ་བཤིབས་པའི་སྟར་བུ་ལ་བརྒྱུས་ཤིང་། །

འདིར་སྣང་སྒྱུ་མའི་ཟློས་གར་འཁྲུལ་བ་རུ་མ་ཤེས། །

ག་དུས་བདེན་པའི་རང་བཞིན་རྗེན་གཅེར་དུ་མཐོང་ན། །

གང་ལ་གཏད་སོ་མེད་པའི་གནས་ལུགས་ཤིག་རྟོགས་ངེས། །

ཡུན་རིང་གནས་ན་འདོད་པའི་རྟོག་ཚོགས་ཀྱིས་འཁྱེར་ཏེ། །

འཁོར་བ་ཕ་མཐའ་དབེན་པའི་རི་གྲོང་དུ་བསྙེགས་ཤིང་། །

ག་དུས་ལས་ཀྱི་རླུང་དམར་འུར་འུར་དུ་གཡུགས་ནས། །

སྲིད་པའི་ཕུན་ཚོགས་སྒང་ཁའི་ལས་རླུང་གིས་སྤུར་ན། །

བྲེད་དངངས་ཀུན་རྟོག་འཁྲུག་པའི་སྣོན་མ་ལས་ཅི་ཡོད། །

ཚོར་འདུ་སྡོམ་རྒྱ་འདྲ་བོའི་འཆིང་ཐག་ལས་གྲོལ་ཞིང་། །

འཛིན་སྟངས་འཁྲུལ་བའི་འཁོར་ལོ་ཕྱོགས་མེད་དུ་བསྐོར་དུས། །

རྟོག་ཚོགས་དྲ་བའི་གཟེབ་ལས་རང་བཞིན་དུ་ཐར་བའི། །

འདམ་མྱགས་འཁོར་བའི་རྫིང་ལས་གྲུ་གཟེངས་སུ་ཞུགས་ཏེ། །

ཐར་བའི་མེ་ཏོག་གཏོར་བའི་དམ་པ་དེ་དྲན་སོང་། །

ཟིལ་བ་རླུང་གིས་བརྡབས་པའི་ངང་ཚུལ་དེ་དྲན་ན། །

ཧ་ལོ་ཉི་མས་རྙིད་པའི་རྣམ་པ་དེ་མཐོང་ན། །

སྡོང་ལོ་ས་རུ་ཟགས་པའི་དུས་ཚིགས་དེ་ཚེས་ན། །

བྱས་བྱས་སེམས་པ་འཁྲུལ་བའི་ཆོ་ག་རུ་འཁུམ་ན། །

ཡིད་ཀྱི་དྭངས་མ་འཚོལ་བའི་ཞི་གནས་ལ་ཞུགས་འགྲོ། །

སྲིད་པའི་ལོངས་སྤྱོད་འཁོར་བའི་ཐང་ཆེན་གྱི་ཚེར་མ། །

དེ་ཡང་སེམས་པ་སྨྲེང་བའི་སྐྱོ་གདུང་གི་གཞི་མ། །

གཏོལ་མེད་ཡིད་ཀྱི་ཡུལ་དུ་དུད་སྤྲིན་གྱིས་དཀྲིག་ན། །

ཁྱོད་ཀྱིས་སླར་ཡང་བདེན་པའི་ས་བོན་ཞིག་གདབ་བམ། །

ཡང་ན་རྩེ་གཅིག་ཞི་བའི་ཏིང་འཛིན་དུ་འཁོད་འགྲོ། །

མཚོ་བྱུང་ལྷ་མོར་བསྔགས་པ་ངག་རིག་འཛུམ་པའི་ཟླ་ཟེར།

ཨང་གཉིས་པའི་གསུམ་པ།

རྩོམ་པ་པོ། ལྡེའུ་ནག སྲིབ་མདའ།

མི་འགྱུར་མཛའ་བརྩེའི་དྲོད་ཁོལ་ལྡང་བཞིན་དུ། །

བརྩེ་བའི་ཟུར་མིག་ཡིད་ལ་འཁྱུག་བྱེད་པའི། །

བཅོམ་ལྡན་དཔལ་གྱིས་དུད་པའི་ངག་རིག་ལྷ། །

དེང་འདིར་དགའ་བའི་པིར་གྱིས་ལན་གཅིག་འབྲི། །

མུ་ཏིག་འོད་ལམ་འཚེར་འདྲའི་ཞལ་རས་ངོགས། །

མཚར་སྡུག་ལི་ཁྲིའི་བྱུག་པས་རྒྱན་བྱས་ཅིང་། །

དཀར་དམར་མེ་ཏོག་བཀྲ་བའི་ཡིད་འོང་མ། །

ཁྱོད་དྲུང་འཁྱོག་ཚིག་གཏམ་ནི་མི་ཆོས་སོ། །

དད་པའི་དགའ་བ་ཁོ་ནའི་མགྲིན་པ་ནས། །

སྙན་ཚིག་དགེ་ལེགས་བྱེ་བ་འབུམ་དུ་གྲོལ། །

ན་ཚོད་བཅུ་དྲུག་རྫོགས་པའི་ཡིད་འོང་མ། །

ད་དུང་གཏམ་གྱི་སྙན་པ་བདག་ལ་སྩོལ། །

རྣམ་དག་དགེ་མཚན་ཉིང་བཅུད་མ་ལུས་ཀུན། །

གཅིག་དུ་སྡོམ་ནས་ཡོངས་སུ་རབ་སྨིན་ཁྱོད། །

སྐལ་ལྡན་ལྗན་ལྗིན་མེད་པའི་སྙིང་ག་རུ། །

བྱིན་རླབས་མཐུ་ནུས་མེ་ཆེན་སྦར་དུ་གསོལ། །

འདི་ལྟར་རིག་བྱེད་ཆོ་ངེའི་བར་སྣང་ལས། །

གློག་ལྟར་འཁྱུག་འདྲའི་སྙིང་གཏམ་འདྲ་མ་འདྲེས། །

སུམ་རྩེན་ལྷ་ཡུལ་དགའ་བའི་སྐྱེད་ཚལ་ན། །

རིང་དུ་བཞུགས་པའི་འཕགས་མ་དེའི་དྲུང་དུ། །

འདོད་ཁམས་ས་ནས་ཕུལ་བའི་ཞུ་འཕྲིན་ཙམ། །

ཅུང་ཟད་ཙམ་ཡང་བཏང་སྙོམས་མི་འཇོག་པར། །

དགྱེས་བརྩེ་དགའ་བའི་ཚེམས་ཕྲེང་མུ་ཏིག་འོད། །

ཕལ་བའི་ཡིད་ཀྱི་མཁའ་རུ་འཚེར་ཐེངས་རེར། །

སྣོད་བཅུད་གཤིས་ཀྱི་མཐོང་སྣང་མང་དུ་བཤད། །

དགེ་ལེགས་འདབ་སྟོང་བཞད་པའི་པད་ཚལ་དུ། །

རྗེས་ཆགས་གསེར་སྦྲང་གཤོག་ཐོགས་འཕུར་ཙ་ན། །

བརྩེ་བའི་བྱིན་རླབས་ཁོ་ནས་སྐྱོང་མཛད་པའི། །

བཅོམ་ལྡན་དབྱངས་ཅན་ལྷ་མོ་སྙིང་ལ་ལྡང་། །

བདག་སེམས་གཡའ་དག་གནམ་སྔོན་ཡིན་གྱུར་། །

ཁྱོད་རང་དེ་གར་འཚེར་བའི་བསིལ་ཟེར་ཡིན། །

བདག་ཉིད་རྒྱུན་འབབ་གཙང་པོ་ཡིན་གྱུར་ན། །

ཁྱོད་རང་དེ་ལ་འཁོར་བའི་ཁྲུང་ཁྲུང་ཡིན། །

རྡུལ་བྲལ་ཁྱོད་ནི་སྙན་པའི་འབབ་སྟེགས་སུ། །

ཀུན་གྱིས་སྒྱུ་མའི་སྤྲུལ་རྒྱུར་ཇི་བཞིན་དུ། །

མི་སེམས་རེ་ལ་ཁྱོད་ཀྱི་གར་སྟབས་རེ། །

བཞུགས་སྟངས་བྱེ་བ་བརྒྱ་ཕྲག་མང་དུ་གྲོལ། །

དེ་ལྟར་ཉམས་དགའ་རྒྱས་པའི་སྡུག་གུ་མ། །

དྲན་པའི་རླབས་རིས་ངོགས་ན་དྲག་ཏུ་འཕྱོ། །

མི་ཟད་ཤུགས་རིང་ནར་གྱིས་གཏོང་བའི་ནང་། །

ཁྱོད་ཀྱི་གཟུགས་སྒྲ་མ་ཚང་བ་ཡང་མེད། །

ཁྱོད་ཀྱི་ལག་གི་དཀྲོལ་དབྱངས་ཇི་བཞིན་དུ། །

བདག་སེམས་སྙན་འཇེབས་ལྡན་པའི་རྒྱུད་སྐུད་ཤོག །

ཁྱོད་ཀྱི་གཟུགས་སྐུའི་མཛེས་པ་ཇི་བཞིན་དུ། །

བདག་གི་རིག་བྱེད་སྒྱུ་མའི་ལང་ཚོར་ཤོག །

ཞེ་ལ་ཐོགས་པའི་རྣ་ལུང་།

ཨང་གསུམ་པའི་དང་པོ།

རྩོམ་པ་པོ། གཙང་བསྟན་འཛིན། སྲིབ་མདའ།

གསེར་འོད་གཟིམས་ཆུང་འགྲམ་གྱི་རི་གྲོང་གི་རྣམ་ཤེས། །

ཞེན་ཆགས་རྨི་ལམ་སྟོང་གི་རྒྱབ་རོལ་ཏུ་གཡོག་ནས། །

སྨྲེང་སེམས་སྐྱོ་བའི་འདབ་མ་ལྷུང་ལྷུང་དུ་བཞུད་ཞོར། །

མི་སེམས་ཉྭ་མོའི་སྲོག་ལ་གས་ཆགས་ཤིག་ཤོར་སོང་། །

སྨུག་སྤྲིན་ལ་བ་གྱོན་པའི་རྒྱང་རིང་སྙིང་ཉེ། །

ལས་མཐུན་རྨི་ལམ་འགྲམ་གྱི་རྟ་ཕོ་དང་འདྲ་བས། །

མི་བརྟན་ཞེ་ལ་སྡུག་པའི་མཛའ་དུང་གི་འཕྲིན་པས། །

སྙན་འཇིབས་གླུ་སྐད་སྟོང་གིས་རོལ་དབྱངས་ཤིག་བརྩམས་སོ། །

ཁ་བ་ལྷབ་ལྷུབ་འབབ་པའི་དགུན་གཞུང་གི་ནམ་ཟླར། །

དུང་སེམས་ཟླ་དཀར་ལྷ་མོའི་བརྩེ་གཞས་ཀྱི་མགུར་གླུ། །

སེམས་སོང་སྨྲེང་བ་སྟོང་གི་ཕྲེང་ཐག་ལ་རྒྱུས་ནས། །

བདེ་སྡུག་ཅི་ཡིན་སྙམ་པའི་སེམས་ངལ་ཞིག་སྐྱེ་ཡོང་། །

དཀར་དམར་མཚོན་མདངས་བཀྲ་བའི་དབྱར་གཞུང་གི་བདེན་པ། །

དྲི་ཟའི་གདུགས་སྤོས་སྦར་བའི་དུད་སྤྲིན་གྱི་རླབས་ཐག །

ནང་སེམས་ལྷ་ཁང་བཞེངས་པའི་སེམས་སྟེང་དུ་ཐིམ་པས། །

སེམས་ཀྱི་མཛའ་བ་གཏན་ནས་དོར་བ་རང་མ་བྱུང་། །

ཟུར་མཛེས་ལྷ་ཡི་སྒོ་མོ་ཕྱེ་བ་རང་མེད་ཀྱང་། །

བྱིན་རླབས་རང་འགྲུབ་བདུད་རྩིའི་བཟི་ཁ་ཞིག་ཡོང་བས། །

བདག་སེམས་དབང་ལ་འབྱོར་བའི་འཇིག་རྟེན་གྱི་བྱེད་པོས། །

བདེ་ཆེན་དག་པ་ཞིང་གི་གྲོགས་དན་དུ་མཛད་རོགས། །

མི་རྟག་བློ་གཏད་མེད་པ་དམ་ཆོས་ཀྱི་ཟབ་ལམ། །

མི་སྡུག་སྒོམ་པའི་རྣལ་འབྱོར་ཐར་ལམ་གྱི་གྲོགས་ལ། །

གཏན་བདེ་སྣང་བ་ནུབ་པའི་ཆགས་ཞེན་གྱི་ཟིལ་བ། །

འདི་ལ་ཟབ་སྟོང་སྒོམ་པའི་ཡང་སྙིང་ལ་སྒྲོན་ཡང་། །

འོན་ཀྱང་དྲན་འཛིན་རི་བོའི་གཞི་ཤག་གི་མགྲོན་པོ། །

རྣམ་རྟོག་ཟིལ་བ་སྟོང་གི་མཛའ་བོ་དུ་ལགས་པས། །

ཞེ་འདྲིས་སེམས་ཀྱི་གདུང་བའི་གཤོག་པ་ཞིག་ཐོགས་ཏེ། །

གནམ་ས་བར་གྱིས་གཅོད་པའི་རྒྱབ་རོལ་ཏུ་གཡུག་སོང་། །

ལས་ལ་མཐུན་པ་མེད་པའི་རྒྱང་རིང་གི་སྙིང་ཉེ། །

ཞལ་གསོལ་སྒྲོན་མེ་སྦར་བའི་ཉི་ནུབ་ཀྱི་མགྲོན་པོས། །

རྩ་གསུམ་རྒྱལ་བ་རྒྱ་མཚོའི་ནུས་མཐུས་ལ་རེ་ནས། །

བར་ཆད་དབྱིངས་སུ་ཞི་བའི་རེ་བཅོལ་ཞིག་ཞུས་ཡོད། །

སྣང་བ་འཆགས་ཀྱིས་གཡོག་པའི་རི་གྲོང་གི་འདབས་སུ། །

འཁོར་བའི་དབྱངས་ལ་དཀྲོལ་བའི་རྣམ་དག་གི་སེམས་པས། །

རིན་ཆེན་མུ་ཏིག་ཐོགས་པའི་སེམས་སོང་གི་མི་ལ། །

གཏན་བདེ་སྣང་བའི་ནུབ་པའི་ཡོན་ཆབ་ཅིག་གཤམས་སོ། །

དུངས་བའི་སྤྱན་ཆབ་གཏོང་བའི་མིག་ཟུང་དེར་གཡོ་ནས། །

ལས་ལ་ཕྱི་ལྡོག་མེད་པའི་མི་རྟག་གི་གྲང་ངར། །

ངེས་མེད་ཤུགས་ཀྱིས་ལྡང་བའི་སྒྱུ་མ་ཡི་བྲོ་གར། །

དྲན་གདུང་རླུང་བའི་སྐུར་བའི་སྣང་བརྙན་དུ་བཞེངས་སོ། །

འཇམ་པའི་གོས་དང་མངར་བའི་རོ་བཅུད་ཀྱི་ལང་ཚོ། །

སྲོག་གི་བཙན་ས་ཟིན་པའི་གནས་མལ་དུ་སྙལ་ཡང་། །

ཆོས་ཉིད་བར་དོ་འགྲིམ་པའི་རྣམ་དག་གི་དབྱིངས་སུ། །

འདབ་དྲུག་སྣང་བས་བརྩེ་བའི་ས་གཡང་ལ་སྦར་འདུག །

སྣང་བ་འཆག་ལ་སྡོམ་པའི་དགུན་གཞུང་གི་ཁ་བས། །

རེ་ལྟོས་མིག་གི་འོད་ཟེར་ནམ་གཞུང་གི་སྤྲིན་ལ། །

སུན་སྣང་ལས་ལ་སྦྱོར་བའི་དྲན་པ་ཞིག་གཏོང་ནས། །

བར་དོའི་འཕྲང་རིང་འགྲིམ་པའི་གཤིན་པོ་ལ་སྦྱར་བ། །

འཁོར་བའི་ཕྱི་ནང་།

ཨང་གསུམ་པའི་གཉིས་པ།

རྩོམ་པ་པོ། རྒྱུ་མཐོང་མ། བྲག་འགོ

འདི་སྣང་འཇིག་རྟེན་བཀོད་པ་མཛེས་སྡུག་གམ། །

ཡང་ན་ལམ་གྱི་ཀྱག་ཀྱོག་རབ་ཏུ་རིང་། །

མི་རྟག་སྒྱུ་མར་སྣང་འདྲའི་སྲིད་པའི་ཀློང་། །

དལ་ཅིག་བཞུགས་སུ་གསོལ་ན་གཏམ་ཞིག་བཤད། །

གཏམ་ལ་སྙན་མོ་ཨེ་བྱུང་མ་གསུང་དང་། །

འཇིག་རྟེན་སྲིད་པ་རྒད་པོའི་ངག་ལས་ཕྱུངས། །

གཏམ་ལ་ཡག་པོ་བྱུང་ཞེས་མ་བསྟོད་དང་། །

སྣང་བའི་གླུ་ཆུང་འདི་གར་བླངས་པ་ཙམ། །

རི་དེ་གསེར་རི་དངུལ་རི་རྡོ་ཡི་རི། །

ས་དེ་གསེར་ས་དངུལ་ས་རྡུལ་གྱི་ས། །

རི་དེའི་རྩེ་རུ་ཉི་མ་ཟླ་བ་ཤར། །

ས་ཡི་ཁྱོན་དུ་ཆུ་དང་རྩི་ཤིང་བཀྲ། །

ཕྱི་ཡི་སྣོད་ལ་དགེ་བཅུའི་དཔལ་ཡོན་གྱིས། །

ནང་གི་བཅུད་ཀྱང་མི་ཁོམ་ལས་སུ་བྲེལ། །

མི་ནི་མཚམས་རེར་སྣང་བའི་རྒོད་པོ་དང་། །

ལན་རེར་བདེན་མཐའ་མེད་པའི་རྐང་ཐང་བ། །

རྐང་བས་ནོན་པའི་ས་གཞི་ཆེ་བའམ། །

སེམས་ཀྱིས་ཐེག་པའི་འཇིག་རྟེན་ཆུང་བས་ཡིན། །

འཇིག་རྟེན་འདི་ཡི་མཐའ་ལ་ཟད་མེད་བཞིན། །

སེམས་ཀྱི་རྣམ་རྟོག་དེ་དག་གང་དུ་ཟགས། །

སྟོན་གྱི་སྡོང་ལོ་ལམ་གྱི་འགྲམ་དུ་འཐོར། །

རླུང་བུས་བསྐྱོད་པའི་སྡོང་བོར་ཤག་སྒྲ་གྲགས། །

མི་རྣམས་འགྲོ་ཞོར་སེམས་པ་རླུང་གིས་སྒུལ། །

སྟོན་གྱི་དུས་འདི་སླེབས་པ་སྔ་དྲགས་འདུག །

རི་བོ་རྡུལ་གྱིས་བཟུང་ནས་ལྗང་མདོག་འདག །

ཆུ་མོ་འཁྱག་གིས་བསྡམས་ཏེ་བཞུར་སྒྲ་འཇགས། །

ཡིན་ཏེ་མི་རྣམས་བྲེལ་བའི་གོམ་གྱི་སྒྲ། །

སུ་ཡིས་ཚོར་རམ་ས་ཡི་ཁྱོན་དུ་ཁྱབ། །

ལ་ལ་དགའ་བཞིན་སེམས་པ་སྤྲོ་དགུས་བརྟས། །

འགའ་རེ་སྐྱོ་བས་ཡིད་སེམས་རབ་ཏུ་གདུང་། །

ཁ་ཁེར་ཁ་ཕྱོགས་མེད་པའི་སྡོང་ལོ་བཞིན། །

ལམ་གྱི་ཀྱག་ཀྱོག་བར་དུ་རླུང་གིས་སྤུད། །

ང་རང་ལམ་ནས་ཡོང་བའི་ལམ་འགྲོ་བ། །

ཕྱི་ཡི་སྨག་པ་རུམ་པའི་སྣང་བ་དེས། །

རྒྱང་གི་འོད་ཟེར་སྨོན་པའི་གཅེས་ཕྲུག་ཅེས། །

སྙན་པའི་མིང་ཞིག་བཏགས་པ་མཚར་བའི་རྒྱུ། །

སྒེའུ་ཁུང་ཕྱི་རུ་སྣ་ཚོགས་སྒྱུ་མའི་ཚུལ། །

སྒེའུ་ཁུང་ངོགས་སུ་ང་ཡི་གཟུགས་རིས་འཆར། །

སྒེའུ་ཁུང་ནང་དུ་མི་ཡི་འཁོར་བ་ཞིག །

སྒེའུ་ཁུང་དེ་ལས་ང་ཡིས་རང་ཉིད་བཙལ། །

ལྟ་ཚེ་གྲུ་བཞི་གྲུ་བཞིའི་ཚུགས་ཀ་ཅན། །

ལྟ་བཞིན་སྣ་ཚོགས་འཆར་ཀའི་མེ་ལོང་ཚུལ། །

བལྟས་རྗེས་སེམས་ཀྱི་རྣམ་རྟོག་རབ་གཡོ་བའི། །

སྒེའུ་ཁུང་དེ་རུ་འཁོར་བའི་རང་གཟུགས་ཤར། །

ང་ཡིས་ང་རང་གཟུགས་སུ་ཤར་དུ་བཅུག །

ང་ཡིས་རང་ལ་བལྟས་ནས་དགོད་ཅིང་ངུས། །

དེ་ཚེ་དྭངས་གསལ་ཤེལ་ལ་ཆག་གྲུམ་ཞིག །

རིམ་གྱིས་ཤོར་བ་དེ་ནི་ཅི་ཞིག་ཡིན། །

མེ་འཁོར་ནང་དུ་གཉིད་ཀྱི་ངལ་དུབ་ཅིག །

མེ་འཁོར་ནང་དུ་ངལ་གསོའི་སྣང་བ་ཞིག །

མེ་འཁོར་ནང་དུ་ཟས་ཀྱི་དྲི་མ་ཞིག །

མེ་འཁོར་ནང་དུ་མི་གཙང་དབུགས་དྲི་ཞིག །

འཁོར་བས་བྲིད་དེ་ལམ་དུ་ཆས་པ་ཡིན། །

འཁོར་བས་བསླུས་ཏེ་སེམས་པ་ངལ་བ་ཡིན། །

འཁོར་བས་བསླངས་ཏེ་དགའ་སྐྱོའི་རི་མོ་འདི། །

འཁོར་བས་བྲིས་ཏེ་འཁོར་བར་འཁྱམས་པ་ཉིད། །

འདི་ནས་ཕར་ལ་ཆས་པའི་ལམ་ཁ་ནས། །

འདི་ལྟར་སེམས་པ་རྒྱ་ཡན་གཏོང་བཞིན་དུ། །

ཕར་ནས་གང་ལ་འགྲོ་བའི་འདྲི་ཚིག་གིས། །

ང་ཡིས་འཁོར་བ་ཞེས་པར་གཏན་གྲོགས་བསྒྲིགས། །

རྟོག་སྣང་སྤྲོས་པ།

ཨང་གསུམ་པའི་གསུམ་པ།

རྩོམ་པ་པོ། སྒ་ངག་ཆོས། སྐྱེ་རྒུ།

དབྱངས་ཀྱི་སིལ་མའི་མེ་ཏོག་ལ། །

བརྩེ་བའི་དམ་ཚིག་སྤྲིན་དཀར་འགྲོས། །

ཡིད་ལ་ལྷུང་བའི་ཞེ་འདང་འགྱུ། །

བུ་མོའི་དབང་ལ་སྟེར་བ་བྱ། །

མདུན་ཀྱི་མི་ཚེ་ཆུ་བོ་ཡང་། །

བུ་མོས་གར་ཁྲིད་རྐ་ལམ་ལ། །

ཞེ་འདང་འཇའ་ཡིས་བསླུས་ཀྱང་ནི། །

བརྩེ་བས་ཕྱིར་ན་སྤང་ལྗང་དུ། །

མེ་ཏོག་ཚོམ་བུར་འགོད་ནས་སུ། །

ཆུ་ཕྲན་ཀྱ་ཀྱུ་བཞུད་པའོ། །

སྙན་ངག་མུ་ཏིག་ཚོམ་བུ་རུ། །

བརྩེ་བའི་གཟི་རྒྱན་སྤྲད་ནས་ཀྱང་། །

དམ་ཚིག་གསེར་ཐག་དཀྲིས་པ་ནི། །

བུ་མོའི་ཞེ་འདང་འཚོལ་བ་ཡིན། །

དབྱངས་ཀྱི་དངོས་གྲུབ་ཞུ་བ་ཡིན། །

མི་གཞི་ཆོན་ཐག་འཐེན་པ་ཡིན། །

འཁོར་བའི་དགའ་སྐྱོ་འཁྲབ་པ་ཡིན། །

མི་གཤིས་བྱེ་མ་བརྡོལ་ལུགས་འདི། །

ཁྱོད་ལ་དུང་བའི་དཔྱིད་རླུང་གིས། །

གསར་འབྱེད་མེ་ཏོག་ཆུན་པོ་འོ། །

ལ་ཕྲན་ཐོ་ཡོ་མི་མངོན་ན། །

ཆུ་བོའི་འཕྲང་འགག་མི་དོག་ན། །

སྤྲིན་དཀར་འདབ་མ་ལྡེམ་པའི་འོག །

བརྩེ་འཕྲིན་གཞས་ལ་སྦྲན་པ་ཡི། །

ཚོར་བའི་འཇའ་གུར་ཕུག་ཞོར་དུ། །

ཉམས་དང་རྟོག་པས་རབ་ཟིན་པའི། །

མི་གཤིས་གཉུག་མ་ངོམ་པ་དང་། །

འཁོར་བའི་རྡོག་བྲོ་འཁྲབ་ན་ཨང་། །

ཚོར་བར་ཞིམ་མངར་སྦྲང་རྩི་ཐུལ། །

ཚིག་དག་སྙན་གདངས་ཁུ་བྱུག་དབྱངས། །

མི་ཚེ་རླབས་ཕྲན་གྱ་མ་གྱུར། །

བརྩེ་བའི་ཆར་ཆུས་སྦང་པ་ཡི། །

འཚོ་བ་སྟོན་མཚན་ཟླ་གཞོན་འདྲ། །

ཁྱིམ་ལ་ཉི་མའི་ཚ་དྲོད་དང་། །

སྒོ་ལ་གཡང་ནོར་མེ་ཏོག་བརྡལ། །

བུ་ཕྲུག་རྐང་དྲུག་གར་གྱིས་འབྱིན། །

ཆུང་མ་སྐར་རྒྱན་འོད་ཀྱིས་འཚེར། །

བཞིན་བཟང་འོད་མདང་དཀར་ཆེམ་ཆེམ། །

སྐུ་ལུས་སྨྱུག་མ་ཕྲ་ལྡེམ་ལྡེམ། །

སྐད་མདངས་སྙན་འཇེབས་གསལ་ལྷང་ལྷང་། །

གོམ་སྟབས་ལྡེམ་འགྲོས་ལྷོད་དེམ་མེར། །

རིང་ལ་ཕྲ་བའི་སྒེག་ལྡན་མ། །

ཡིད་ཀྱིས་ཐོོགས་ཤིང་ངག་གིས་བསྟོད། །

བརྩེ་བའི་གཏམ་གྱི་སྦྲང་ཆར་གཏོར། །

རེ་བའི་ལྗོན་པ་མ་ལུས་པས། །

གུས་མདུད་ཕྱིར་དུ་བརྩེ་བ་སྒུམ། །

མང་པོ་འཕུར་ཡང་མང་པོ་ལ། །

ཡིད་མི་འགྲོ་བའི་བརྩེ་བའི་འཁྲིལ། །

དམར་ཆུང་བྱུ་རུའི་མེ་ཏོག་ལ། །

ཞེ་འདང་ཚོན་ཁྲ་སྟེར་བ་ཡི། །

དུངས་ཚིག་མུ་ཏིག་བསྟར་བརྒྱུས་སོ། །

ཁྱོད་རང་ཡིན།

ཨང་གསུམ་པའི་བཞི་པ །

རྩོམ་པ་པོ། གསང་དོགས་སློང་། སྲིབ་མདའ།

སེམས་ཀྱི་ནམ་མཁའ་མཐའ་མེད་དོ། །

ཡིད་ཀྱི་དུང་བ་མཐའ་མེད་དོ། །

མཐའ་མེད་འཁོར་བའི་གྲོང་ཁྱེར་གྱི། །

མཐའ་ཡོད་གཅིག་དེ་ཁྱོད་རང་ཡིན། །

གླེང་བ་འདི་ལ་མཐའ་མེད་དོ། །

དྲན་པ་འདི་ཡང་མཐའ་མེད་དོ། །

དྲན་རྒྱུ་གླེང་རྒྱུ་གཅིག་ཆོག་མ། །

རོགས་ཀྱི་གཅེས་ལོ་ཁྱོད་རང་ཡིན། །

འཁོར་བ་དུག་ཚང་ཟེར་ཡང་ཆོག །

འཇིག་རྟེན་སྡུག་མཚོ་གླེང་ཡང་ཆོག །

གནམ་ས་གཉིས་ཀྱི་ཉིན་སྲིབ་ཏུ། །

བདག་གི་ཉི་ཟླ་ཁྱོད་རང་ཡིན། །

ལོ་ཡི་ཟླ་བ་སོང་ཡང་རུང་། །

ཞག་གི་ཉི་མ་རྫོགས་ཀྱང་རུང་། །

ལས་ལ་དབང་བའི་ཚེ་རབ་ཏུ། །

སྲོག་གི་ཏོག་སྟེ་ཁྱོད་རང་ཡིན། །

ཤ་ཡི་ཀོ་བ་མ་གཅིག་ཀྱང་། །

ཁྲག་དང་རུས་པ་མ་འདྲེས་ཀྱང་། །

ལས་ཀྱི་བསྐོས་པའི་མེ་ལོང་ནང་། །

ནང་གི་མྱི་དེ་ཁྱོད་རང་ཡིན། །

མཛའ་གཞས་གྲོང་ཁྱེར་དེ་ཡི་ནང་། །

འཚོ་བྱེེད་གོས་དཀར་དེ་ཡི་ནང་། །

བྱམས་ལ་བརྩེ་བའི་སྙིང་རྗེ་མ། །

འོ་མའི་མེ་ཏོག་ཁྱོད་རང་ཡིན། །

བྱ་ཞིག་ཡིན་ན་ཁྱོད་ཕྱོགས་འཕུར། །

རླུང་ཞིག་ཡིན་ན་ཁྱོད་ཕྱོགས་སྤུར། །

བརྩེ་བ་བཞུགས་སའི་བྱམས་པ་ལ། །

འཕྲིན་གྱི་ཡི་གེ་ཁྱོད་རང་ཡིན། །

བརྩེ་བའི་བྱིན་རླབས་ཉོ་རྒྱུ་མེད། །

དུང་བའི་དངོས་གྲུབ་བཙོངས་རྒྱུ་མེད། །

དྲན་པ་སྙིང་ཁའི་ཞིང་ཁམས་སུ། །

གཅིག་པུར་ཞུགས་པ་ཁྱོད་རང་ཡིན། །

དཔྱིད་ཀྱི་ཟླ་བ་རྒས་དགོས་སོང་། །

དབྱར་གྱི་ཟླ་བ་ཚེས་དགོས་སོང་། །

འདབ་མ་བཞད་པའི་མེ་ཏོག་ལ། །

ཡིད་འོང་དྲི་ཞིམ་ཁྱོད་རང་ཡིན། །

ཕ་ཡུལ་ཕ་མ་བསྐྱུར་ནས་ཡོང་། །

དགའ་བའི་མི་དེ་དེད་ནས་ཡོང་། །

འཁོར་བ་འཁོར་ལོའི་རྩེ་མོ་རུ། །

འཁོར་བའི་བདག་མོ་ཁྱོད་རང་ཡིན། །

སྒེག་ལྡན་ལང་ཚོ་སོན་པ་ཡི། །

བཞིན་རས་དཀྱིལ་འཁོར་མཛེས་པ་ཡི། །

སྣང་ཡུལ་སེམས་ཀྱི་གདན་སྟེང་དུ། །

ལྷ་མོ་རང་བྱུང་ཁྱོད་རང་ཡིན། །

རང་གཤིས་ཞི་ཞིང་དུལ་བ་ཡིན། །

རང་གཟུགས་དྭངས་ཤིང་གཙང་མ་ཡིན། །

ཕྱི་ཡི་ལུས་དང་ནང་གི་སེམས། །

ལྷད་མེད་བུ་མོ་ཁྱོད་རང་ཡིན། །

གངས་ཆུ་བཏུང་བའི་གངས་མོ་ཁྱོད། །

བོད་ནས་སྐྱེས་པའི་བོད་མོ་ཁྱོད། །

རང་ལ་དབང་བའི་ཉིན་དེ་ནས། །

དམ་ཚིག་བླ་གཡུ་ཁྱོད་རང་ཡིན། །

གསང་བ་ཚིག་གི་མདུད་སྣེ་ཁྱོད། །

སྐྱིད་སྡུག་ལས་ཀྱི་ཁུར་བོ་ཁྱོད། །

ཚེ་འདིའི་སྐྱེ་བའི་འཇིག་རྟེན་དུ། །

བདག་གི་ཚོད་ཚད་ཁྱོད་རང་ཡིན། །

ཚིག་གི་ཐ་སྙད་ཁྱོད་ལ་མཆོད། །

དུངས་བའི་སྙན་ངག་ཁྱོད་ལ་འབུལ། །

ང་ཡི་སྣང་བའི་མཛོད་ཁང་དུ། །

ཁྱོད་ལས་ལྷག་པའི་སུ་ཞིག་ཡོད། །