སྟོང་ལོ་བསུ་བའི་དབྱངས་འགྲོས།

ཉེར་གཅིག་དུས་ཀྱི་སོ་ཁ་ལས།།

སྟོང་ལོ་སྟོང་གི་མེ་ཏོག་ཡང་།།
འཕྲོ་དང་འཕྲོ་ཡི་སྣང་བ་བཞིན།།
འཆར་བ་འདི་ཀོ་ངོ་མཚར་བ།།

རྨད་བྱུང་དུས་ཀྱི་སོ་ཚིགས་ལས།།
རྨད་བྱུང་དེང་རབས་གསར་བའི་རིས།།
རྨད་བྱུང་རྫོགས་ལྡན་ཨེ་མ་ཧོའི།།
རྨད་བྱུང་དུས་ལ་དགེ་ལེགས་ཀྱིས།།

ཉི་མའི་གདོང་དང་ཟླ་བའི་མདངས།།
འཛུམ་དཀར་འོད་ཀྱི་རི་མོ་ལས།།
ས་སྟེང་སྐྱེ་འགྲོའི་བསོད་ནམས་སྐལ།།
ཡང་ཡང་བབས་པ་དགེ་ལེགས་ཤིས།།

ལུགས་གཉིས་ངོ་མཚར་དགའ་སྟོན་ཀྱི།།
སྟོང་ལོ་གསར་བའི་དབྱངས་འགྲོས་ལ།།
ཉེ་དང་རིང་ནས་བཅར་བྱས་གཏམས།།
ཕུན་ཚོགས་གླིང་ལ་དགེ་ལེགས་འཕེལ།།

རྟ་མཆོག་ཅང་ཤེས་གཡུ་རྔོག་ལ།།
རྟེན་འབྲེལ་སྟོང་གི་སྒ་སྲབ་དང་།།
རེ་སྨོན་ཁྲི་ཡི་དར་ཚོན་གྱིས།།
རབ་བརྒྱན་སྟོང་ལོའི་སྐྱེས་སུ་འབུལ།།

འཛུམ་པ་གསར་བའི་འོད་རིས་ལ།།
སྙན་དབྱངས་སྟོང་གི་གླུ་ལེན་མའི།།
སྒེག་ཉམས་ཁྲི་ཡི་བྲོ་འཁྲབ་པའི།།
འཆི་མེད་བུ་མོའི་སྐྱེས་ཡང་མཚར།།

རྨི་ལམ་གསར་བའི་སྐྱ་རེངས་ཤིག།
རེ་འབྲས་སྟོང་གི་ཁ་བཏགས་ཤིག།
སྨོན་འདུན་ཁྲི་ཡི་ལེགས་སྐྱེས་ཤིག།
སྟོང་ལོ་གསར་བའི་དབུ་བྲིས་ཤིག།

འདས་སོང་འཚོ་བའི་ལྕེ་རྩེ་ལ།།
མངར་སྐྱུར་བྲོ་བའི་མྱོང་བ་ལ།།
སྔར་མེད་གསར་བའི་རི་མོ་ནི།།
སྟོང་ལོ་གསར་བའི་པ་ཏྲས་སོ།།

ད་ལོ་འཛུམ་བོར་སྡུག་བསྔལ་གྱི།།
སྣེ་མོ་རྡུལ་གྱིས་ཡང་ཡང་མནན།།
འཛམ་གླིང་བདེ་ཞིང་ཞི་བདེ་ཡི།།
སྟོང་ལོ་གསར་བ་དགེ་ལེགས་སོ།།

སྟོང་ལོ་ཉེར་བཞིའི་ཕུན་ཚོཊ་ཀྱི།།
ཀ་བ་མུ་མེད་མཁའ་ལ་གཟེངས།།
དགེ་ལེཊ་གསར་བའི་རེ་ཁ་ལས།།
དུད་པའི་ངོ་མཚར་ཨེ་མ་ལགས།།