ཚིག་གི་མཆོད་སྤྲིན།

སྙན་པའི་མགྲིན་པ་སྲིད་གསུམ་འདོད་ལྡན་དབང་མེད་བྱེད་པའི་ངག་སྙན་མ། །

མཁྱེན་བརྩེ་ནུས་པའི་བྱིན་རླབས་མྱུར་དྲག་ཕོ་རྒོད་སྐྱེས་བུས་མི་བཟོད་པ། །

སྲིད་གསུམ་ངག་སྙན་རྒྱུ་སྐར་བྱེ་བ་འབུམ་གྱི་ལས་བྱུང་ཟླ་བྲལ་མས། །

རྟེན་གསུམ་བྱིན་རླབས་ཐོག་ལས་མྱུར་དེ་བདག་ལ་སྙན་འགྱུར་བསྒྲུབ་པར་མཛོད། །

ཨེ་མ་གངས་རི་ལྗོངས་ཀྱི་སྙིགས་དུས་སུ། །

བསླབ་གསུམ་གཙང་མའི་འཁྲི་ཤིང་ཉག་གཅིག་པུ། །

མངོན་འཕགས་དུས་ཀྱི་བདག་པོའི་ངལ་གསོ་ནས། །

རྟེན་གསུམ་ཉི་མ་རང་ཤར་བདག་ལ་དགོངས། །

རམ་འབྱམས་རྒྱལ་པོའི་གསང་གསུམ་མ་ལུས་པ། །

ཕུན་ཚོགས་བསླབ་པ་གསུམ་ལ་འཛིན་སྐྱོང་སྤེལ། །

འཇི༵གས་མེ༵ད་འཕྲིན་ལས་མཛད་པའི་མངའ་བདག་བ། །

སྐུ་ཚེ་མི་འགྱུར་རྡོ༵་རྗེ༵་རྟག་བརྟན་ཤོག །

ཕུལ་བྱུང་སྟོན་པའི་བསྟན་པ་འཛིན་མཁས་པའི། །

བཤད་དང་སྒྲུབ་པའི་མཛད་པ་ཕྱོགས་བཞིར་ཁྱབ། །

རུས་མེད་བསྟན་པའི་དབང་ཕྱུག་འཇི༵གས་མེ༵ད་མཚན། །

སྐུ་ཚེ་མི་འགྱུར་རྡོ༵་རྗེ༵་རྟག་བརྟན་ཤོག །

ཀུན་མཁྱེ༵ན་རྒྱལ་པོའི་བསྟན་པའི་སྲོག་ཤིང་བ། །

བྱམས་བརྩེ༵ས་འགྲོ་ཀུན་སྐྱོང་བའི་འདྲེན་དཔོན་མཆོག །

མཛད་ནུ༵ས་སྟོང་ལྡན་འབུམ་ཀྱི་རྒྱལ་བུའི་སྲས། །

སྐུ་ཚེ་མི་འགྱུར་རྡོ་རྗེ་རྟག་བརྟན་ཤོག །

གནས་ཀྱི་བླ་མའི་མཚན་ཉིད་བཅུ་ལྡན་པའི། །

ཕར་ཕྱིན་དྲུག་གི་ཡང་སྙིང་ཕྱིན་ཟིན་པའི། །

བསྟན་འཛིན་སྐྱེས་བུ་རྟ་བདུན་དབང་པོ་ཁོང་། །

སྐུ་ཚེ་མི་འགྱུར་རྡོ་རྗེ་རྟག་བརྟན་ཤོག །

སྲིད་གསུམ་སྙིགས་དུས་མུན་ནག་གུར་ཁང་ན། །

ཁྱེད་ནི་འགྲོ་བའི་སྒྲོལ་མེ་གསལ་འགྱུར་ནས། །

སེམས་ཅན་ཀུན་ལ་ཁྱེད་ཀྱི་འོད་ཟེར་འཕྲོས། །

བདེ་བའི་ཐར་ལ་འགོད་པའི་འོད་དཔག་མེད། །

སྐུ༵་ནི་གངས་ལ་ཉི་མ་ཤར་བའི་སྐུ༵ །

སྐུ༵་ནི་ཆོས་གོས་རྣམས་གསུམ་གསོལ་པའི་སྐུ༵། །

སྐུ༵་ནི་རྒྱལ་བའི་སྲས་ཀྱི་སྤྲུལ་བའི་སྐུ༵། །

སྐུ༵་ལ་སྒོ་གསུམ་དད་པའི་མཆོག་པ་འབུལ། །

གསུ༵ང་ནི་མ་འགག་ཚངས་པའི་དབྱངས་ཀྱི་སྒྲ། །

གསུ༵ང་ནི་ཟབ་མོ་དམ་ཆོས་ཞི་བའི་གསུ༵ང་། །

གསུ༵ང་ནི་བསྟན་དགྲ་འཇོམས་པའི་དྲག་པོའི་གསུ༵ང་། །

གསུ༵ང་ལ་རྣམ་འབྱོར་ཚིག་གི་མཆོད་པ་འབུལ། །

ཐུ༵གས་ནི་རྣམ་པར་དག་པའི་བྱང་ཆུབ་ཐུ༵གས། །

ཐུ༵གས་ནི་ཞི་བ་ལྷོད་པའི་དམ་པའི་ཐུ༵གས། །

ཐུ༵གས་ནི་དྲག་པར་ལྡན་པའི་ཁྲོ་བོའི་ཐུ༵གས། །

ཐུ༵གས་ལ་སྤྱང་བྱ་སྡིག་པའི་སྒོ་དྲུག་འབུལ། །

ཁྱེད་སྐུ༵་མཛེས་པའི་བརྗིད་ཉམས་གངས་ཀྱི་རི། །

ཁྱེད་གསུ༵ང་ཟབ་ཀྱང་སྙན་པས་ཚངས་པའི་རྔ། །

ཁྱེད་ཐུ༵གས་བྱང་སེམས་འཕགས་པ་སྤྱན་རས་གཟིགས། །

ཐུབ་བསྟན་འཛིན་པའི་སྐུ་གསུང་ཐུགས་ལ་འདུད། །