༄༅། །བོད་ཡིག་གི་ཕུལ་བྱུང་སློབ་ཁྲིད་ཐོན་ཁུངས་ལས་སློབ་གསོའི་དོན་བརྗོད་ཀྱི་དཔྱད་རྩོམ།
ཚེ་བརྟན་དབང་མོ།
ནང་དོན་གནད་བསྡུས།སློབ་མ་ནི་དཔྱིད་དུས་ས་འོག་ནས་འབུས་མ་ཐག་པའི་ལྗང་བུ་དང་འདྲ་ལ། ལྗང་མདོག་གི་ཡལ་ག་དང་ལོ་མར་ཉིན་ལྟར་འགྱུར་ལྡོག་གསར་པ་བྱུང་དང་འབྱུང་གིན་ཡོད་སྟབས། མི་རིང་བར་ཁོ་ཚོར་མཛེས་སྡུག་ལྡན་པའི་མེ་ཏོག་བཞད་དེ་འབྲས་བུ་གཡུར་དུ་ཟ་བ་ཞིག་སྨིན་པ་ནི་ང་ལ་ཡིད་ཆེས་བརྟན་པོ་ཡོད། སྤྱིར་བདག་ཅག་དགེ་རྒན་ཚོས་བརྩེ་དུང་གི་ཉི་འོད་དང་སློབ་གསོ་ཡི་ཆར་ཟིམ་གྱིས་དེ་ཉིད་ཉིན་བཞིན་བསྐྱངས་ཏེ་མྱུ་གུ་ཡོད་ཚད་འབུས་ཤིང་མེ་ཏོག་བཞད་དུ་འཇུག་ལ། མེ་ཏོག་དག་ཀྱང་བཞད་དེ་འབྲས་བུ་སྨིན་དུ་འཇུག་པའང་དགེ་རྒན་ཞིག་གི་ཟློག་ཏུ་མེད་པའི་འགན་འཁྲི་ཡིན། དེས་ན་ང་ཚོས་ཇི་ལྟར་བྱས་ཏེ་སློབ་མ་སློབ་གྲྭར་འགྲོ་དུས་སྤྲོ་སྣང་ཆེ་བ་ཞིག་དང་། དགེ་རྒན་རིག་ན་དགའ་སྣང་ཡོད་པ། སློབ་ཁྲིད་ལ་ཉན་ཚེ་ཡིད་སེམས་གཏད་ཐུབ་པ་ཞིག་བྱ་དགོས་པའི་ཐད་ནས་ཕྲན་གྱིས་སློབ་གསོ་བྱ་བའི་དོན་བརྗོད་ལམ་ནས་ཅུང་ཟད་ཅིག་སྤྲོ་བ་བྱའོ། །
བརྡ་ཆད་གཙོ་བོ། བོད་ཡིག །ཕུལ་བྱུང་སློབ་ཁྲིད། སློབ་གསོའི་དོན་བརྗོད། ལྡུམ་ར་པ། སློབ་ཕྲུག་ཟླ་བ།
སློབ་གསོའི་བྱ་བར་འབྲས་བུ་ལེགས་པོ་ཞིག་སྨིན་དགོས་ན། ཐོག་མར་མེ་ཏོག་ལྟ་བུའི་སློབ་མའི་ལུས་ངག་ཡིད་གསུམ་གྱི་བྱ་གཞག་ཀུན་ལ་ལྷོད་གཡེང་མ་ཤོར་ན། ད་གཟོད་དེ་ལ་ལོ་མ་རྒྱས་ཤིང་འབྲས་བུ་སྨིན་པར་ངེས། སློབ་ཁྲིད་ནི་དཔེ་ཁྲིད་ཙམ་མ་ཡིན་པར་གཙོ་བོ་སློབ་མའི་རྒྱུད་ལ་བཟང་དགུ་ཡོན་ཏན་འཛོམས་པ་བྱ་རྒྱུ་དེའོ། །སློབ་གསོ་པས་དཔེ་ཁྲིད་མི་སྐྱོང་ཞེས་ལབ་པའང་དཔེ་ཁྲིད་ནི་སྔོན་འགྲོའི་ཆ་རྐྱེན་ཡིན་ལ་མི་སྐྱོང་ནི་མཐའ་འཇུག་གི་གྲུབ་འབྲས་དེ་ཡིན་སྟབས། མི་བཟང་པོ་ཞིག་སྐྱོང་བ་ནི་བྱ་བ་ཀུན་ལས་གཙོ་བོར་འཇོག་དགོས་པར་བསྟན།
སློབ་གྲྭའི་དགེ་རྒན་ཞིག་ཡིན་ཕྱིན་མེ་ཏོག་འདེབས་གསོ་བྱེད་པའི་ལྡུམ་ར་པ་ཞིག་དང་གཉིས་སུ་མེད། སློབ་མ་ནི་ས་འོག་ནས་འབུས་མ་ཐག་པའི་མྱུ་གུ་དེ་ཡིན་ལ། ལྗང་མདོག་གི་ལོ་མ་དང་ཕྲ་མཉེན་གྱི་ཡལ་གའང་ཡིན་པས། ཉིན་ལྟར་སྔ་མ་བཞིན་མི་གནས་པར་འགྱུར་བ་འགྲོ་བཞིན་ཡོད་སྟབས་རྣམ་ཀུན་ང་ཚོར་དགའ་འོས་པའི་ཚོར་སྣང་རེ་སྟེར་གྱིན་ཡོད།
སློབ་ཕྲུག་ཟླ་བ་ནི་ངས་ད་ལོར་གསར་དུ་ཁྲིད་པའི་སློབ་མ་ཞིག་ཡིན། ཁོ་ནི་བོད་ཀྱི་བྱིས་པ་ཕལ་མོ་ཆེར་དང་འདྲ་བར་མཁུར་ཚོས་དམར་ཞིང་མིག་ཟུང་སྒོར་ཞིང་ཁྲ། ཁོ་རང་སྤྱིར་བློ་རིག་བཀྲ་ཡང་རྣམ་ཀུན་རྩེད་མོའི་རིགས་ལ་གཡེང་དྲགས་པས་བསླབ་ཚན་ཡོངས་ཀྱི་སྦྱངས་འབྲས་ཞན་ཙམ་ཡིན། ཉིན་ཞིག་ལ་ངས་འཛིན་གྲྭར་བོད་ཡིག་སློབ་ཁྲིད་བྱེད་བཞིན་ཡོད། ཟླ་བ་ནི་སྔར་བཞིན་ཁ་རྩེད་ལག་རྩེད་ལ་གཡེང་འདུག །སྐབས་དེར་ང་རང་ཁོང་ཁྲོ་ཚད་མེད་ལངས་ནས་ཁོ་ལ་སྡིགས་མོ་བྱས། ཁོས་སྐབས་ཐོག་ཙམ་ལ་རྩེ་མཚམས་བཞག་རུང་། རིང་པོ་མ་འགོར་བར་ཡང་རྩེད་མོར་གཡེང་གིན་འདུག །རྒྱུན་པར་སློབ་ཁྲིད་མ་བྱས་པའི་ཡར་སྔོན་དུ་ངས་ཁོ་ལ་སློབ་ཐུན་ཁ་ནས་བློ་རིག་བསྒྲིམས་ཏེ་ཉན་དགོས་པའི་སློབ་གསོའི་ཁ་བརྡ་བྱེད་བཞིན་ཡོད་མོད། འོན་ཏེ་ངེད་གཉིས་ནི་དངོས་གནས་འགུལ་རིས་གྲགས་ཅན་བྱི་ལ་དང་བྱི་བ་ཞེས་པ་ནང་གི་ཐམ་མུ་དང་ཅེ་རས་ལྟར་དུ་གྱུར། མདོར་ན་ངའི་བསམ་ཚོད་ནང་བཞིན་སློབ་གྲོགས་ཟླ་བའི་སློབ་སྦྱོང་བྱེད་སྟངས་དང་། བསམ་བློ་འདུ་ཤེས་ཀྱི་ཕྱོགས་ལ་འགྱུར་བ་ཆེར་མ་ཐེབས། སློབ་ཁྲིད་གྲོལ་རྗེས་ངས་ཀྱང་ཁོ་རང་སྔར་བཞིན་དུ་གཞུང་ལས་ཁང་དུ་ཁྲིད་ནས་སློབ་སྦྱོང་གི་དཀའ་ངལ་ནི་གནས་སྐབས་ཙམ་གྱི་དཀའ་སྡུག་ཡིན་ཞིང་། སློབ་སྦྱོང་མ་བྱས་པའི་དཀའ་སྡུག་ནི་མི་ཚེ་གོང་པོའི་སྡུག་བསྔལ་ཡིན་པ་དང་། སྤྱིར་མི་ལ་ཤེས་རིག་དང་ལག་རྩལ་ཡོད་ན་མ་འོངས་པའི་དུས་སུ་རང་གི་མི་ཚེ་ལ་ཕན་བདེ་ལོངས་སྤྱོད་འཛོམས་པའི་གནས་ལུགས་དང་རྒྱུ་མཚན་ལ་རྡོ་སྒྲིག་སྒྲིག་དང་ཆུ་བཞུར་བཞུར་གྱིས་སློབ་གསོ་བཏང་།
ངས་ལོ་ངོ་དུ་མའི་སློབ་གསོ་སློབ་ཁྲིད་ཀྱི་བྱ་བའི་ཁྲོད་ནས་ཤེས་རྟོགས་ཤིག་བྱུང་ཡོང་བ་ནི། སློབ་གསོ་སློབ་ཁྲིད་ཀྱི་ཁྲོད་ནས་དགེ་སློབ་དུ་མ་ཞིག་ནི་སློབ་གྲོགས་ཟླ་བ་ངེད་གཉིས་དང་འདྲ་བར་ཕན་ཚུན་བར་དུ་འབྲེལ་ལམ་ཅུང་ཟད་རེ་ཡོད་ཀྱང་དགེ་སློབ་ཕན་ཚུན་ཕྱོགས་གཉིས་ཀ་ལ་ཆེ་ས་ནས་མི་ཚེའི་རིན་ཐང་དང་། འཚོ་བའི་དོན་སྙིང་སོགས་ཀྱི་ངོས་འཛིན་གནད་དུ་སྨིན་པ་ཞིག་བྱུང་མེད་ལ། ཆུང་ས་ནས་ཕྱོགས་གཉིས་ཀའི་ཉིན་རེའི་འགྲོ་འདུག་སྤྱོད་ལམ་སོགས་ཀྱི་ཐད་ནས་དགེ་སློབ་ཕན་ཚུན་ལ་གཅིག་ཕན་གཅིག་རོགས་དང་། གཅིག་ལ་གཅིག་བརྟེན་གྱི་འབྲེལ་ལམ་ཧ་ལས་པ་ཞིག་ད་དུང་ཆགས་མེད་པར་མཐོང་། དེང་སང་སློབ་མའི་རྒྱུད་ལ་བཟང་ཡོན་ཁྱད་པར་ཅན་ཞིག་འཛོམས་དགོས་ན་ཐོག་མར་སློབ་མ་དེ་ཉིད་སློབ་གྲྭར་གཏོང་ན་ལེགས་ཆ་ཆེ་བ་སྨོས་མ་དགོས། སློབ་གྲྭ་ལས་སློབ་མའི་རྒྱུད་ལ་ཁྱིམ་ཚང་དང་སྤྱི་ཚོགས་གཉིས་ལས་འབྱུང་ཐབས་མེད་པའི་ཤེས་ཡོན་མང་པོ་ཞིག་འབྱོར་གྱིན་ཡོད། དེའི་ཕྱིར་སློབ་མ་དེ་ཉིད་སློབ་གྲྭར་འགྲོ་བའི་དགའ་མོས་ཡོད་པར་བྱེད་དགོས། སློབ་གྲྭ་རུ་སློབ་བུ་རང་གི་སེམས་བསམ་པའི་གཏིང་རིམ་ན་ཡོད་པའི་དགའ་བའི་སློབ་གྲོགས་དང་། བརྩེ་བའི་དགེ་རྒན་སོགས་སྐྱེ་བོ་མང་པོ་ཞིག་ཡོད་པར་ངོས་ཟིན་ཐོག ད་དུང་སློབ་ན་ལོབ་ཅིང་འབད་ན་འགྲུབ་པའི་ཤེས་ཡོན་དང་ལག་རྩལ་སོགས་ཡོད་པའི་ངོས་འཛིན་ཡང་གསལ་པོ་ཞིག་ཡོད་པར་བྱེད་དགོས། སློབ་མ་འགའ་ཞིག་སློབ་གྲྭར་འགྲོ་དུས་སྤྲོ་སྣང་མེད་པ་དང་། དགེ་རྒན་རིག་དུས་འཇིགས་སྐྲག་སྐྱེ་བ། སློབ་ཁྲིད་ཉན་དུས་གཡེང་བས་ཁྱེར་བ་ཞིག་ཡིན། དེ་འདྲའི་སློབ་མ་ལ་སློབ་སྦྱོང་གི་གྲུབ་འབྲས་ལེགས་པོ་ཞིག་འབྱུང་མི་སྲིད་པ་བྱ་བའི་ཆོས་ཉིད་ཀྱིས་སོ། །ཇི་སྐད་དུ། སློབ་སྦྱོང་དུས་ན་གཡེལ་བ་དེས། །མཁས་འདོད་རེ་བ་འབྲས་མེད་ཡིན། །མེ་ཏོག་སད་ཀྱིས་ཁྱེར་བ་ཡི། །ཤིང་ལ་འབྲས་བུའི་རེ་བ་མེད། །ཅེས་པ་ལྟ་བུའོ། ད་འོ་ན། སློབ་བུ་ཟླ་བ་ལྟ་བུའི་སློབ་གྲོགས་ཤིག་སློབ་སྦྱོང་ལ་མོས་པ་ཆེ་ཞིང་། སྦྱོང་འབྲས་ལ་དང་དོད་ཆེ་བ་ཞིག་ཇི་ལྟར་གསོ་སྐྱོང་བྱའམ་སྙམ་ན། ཐོག་མར་སློབ་མའི་སེམས་ཁོང་གི་དགའ་སྐྱོ་ཆགས་སྡང་དེ་ཇི་ལྟར་ཡིན་པ་དང་། སློབ་མའི་ཁྱིམ་ཚང་གི་གནས་ཚུལ་ལ་རྒྱུས་ལེན་ཡག་པོ་བྱེད་དགོས། དེ་ཚར་རྗེས་དགེ་རྒན་རང་ངོས་ནས་སློབ་མ་དེ་ཉིད་ཀྱི་གནས་ཚུལ་སྐྱོ་པོ་དེ་ལ་འགྱུར་བ་གཏོང་དགོས་ན་རང་ངོས་ནས་ཡུན་རིང་ལ་བྱ་བ་དེར་འབད་འཐབ་བྱེད་པའི་བསམ་བློ་འཆར་གཞི་བརྟན་པོ་ཞིག་འཇོག་དགོས། ངས་དེ་ལྟར་བསམས་ཤིང་བསམ་ལ་མཐར་སྦྱོར་བ་དངོས་ལ་གཏུག་པ་ཡིན། ཐོག་མར་ཞི་འཇམ་གྱི་ངང་ནས་ཁོ་དང་འབྲེལ་འདྲིས་བྱེད་ཅིང་ཁོ་ལ་རྒྱུས་ལོན་གཏིང་ཟབ་མོ་ཞིག་ཨེ་ཡོང་བལྟས། དེ་ནས་རིམ་བཞིན་དུ་ཁོ་ཚང་ལ་སོང་ནས་ཕ་མ་གཙོ་བྱས་པའི་ཁྱིམ་མི་ཡོངས་རྫོགས་ངོ་ཤེས་པར་བྱས་ཏེ་སློབ་བུ་ཟླ་བའི་སློབ་སྦྱོང་གི་གནས་ཚུལ་ཐད་ནས་བསམ་བློ་བརྗེ་རེས་བྱས། དེ་ལྟར་ངས་སློབ་བུ་ཟླ་བ་ལ་སློབ་མ་གཞན་དང་མ་འདྲ་བར་ལྷག་ཏུ་དོ་སྣང་བྱས་སྟབས། ཁོའི་སེམས་ཁམས་དང་རྣམ་འགྱུར་གཉིས་ཀའི་ཆ་ནས་འགྱུར་བ་ཅུང་ཟད་རེ་ཐོན་མགོ་ཚུགས། འོན་ཏེ་ཟླ་ཤས་ཀྱི་རིང་ལ་ཁོས་སྔར་བཞིན་སློབ་ཐུན་གྱི་ཁ་ནས་ཁ་གཡེང་མིག་གཡེང་དང་ཁ་རྩེད་ལག་རྩེད་བྱེད་ཀྱིན་འདུག སྤྱིར་རང་གཞན་གཉིས་ཀས་གོམས་གཤིས་ངན་པ་འདི་དག་འཕྲལ་མ་ཉིད་དུ་བཅོས་དགོས་ན་དཀའ་མོ་ཡིན་པ་ཤེས་སྟབས། ངས་ནི་ངང་རྒྱུད་རིང་པོས་ཉིན་རེའི་སློབ་ཐུན་ཁ་ནས་ཁོའི་སྐྱོན་དག་ཆུང་དུ་གཏོང་ཞིང་བཟང་ཆ་ལ་བསྟོད་བསྔགས་འབའ་ཞིག་བྱས། ཁོའི་དེ་ལྟར་ཉིན་ཞག་ཟླ་དུས་ཀྱི་འགྲོས་དང་བསྟུན་ནས་ཁོའི་བཟང་ཕྱོགས་སུ་འགྱུར་བའི་ཆ་དག་ལ་ངས་ཆེ་བཤད་གཉན་སྒྲོག་གིས་སློབ་མ་གཞན་དག་གིས་དེ་ལ་མིག་དཔེ་ཡར་ལྟ་དང་། སློབ་སྦྱོང་བྱེད་དགོས་པའི་སྐུལ་མ་ཡང་ཡང་བྱས་པས་ཁོ་ཡང་རིམ་བཞིན་དགེ་རྒན་ནི་ངའི་དྲན་པའི་དཀྱིལ་གྱི་ལམ་སྟོན་སྒྲོན་མེ་དང་། མི་ཚེའི་དགའ་ཡ་སྐྱོ་རོགས། དཀའ་སྡུག་ཡོད་ཚད་ལ་གདོང་ལེན་ཐུབ་པའི་མི་འཇིགས་པའི་དཔའ་བོ་ཞིག་ཡིན་པར་ངོས་འཛིན་བྱུང་། བགྲང་བྱ་གཅིག་མ་ལོན་ཙམ་གྱི་མཚམས་སུ་སློབ་བུ་ཟླ་བས་སློབ་ཐུན་ཁ་ནས་ལག་རྩེད་མི་རྩེ་བ་དང་། སེམས་པ་རྣམ་གཡེང་གི་དབང་དུ་མི་གཏོང་བའི་གཏམ་བཟང་དེ་ངེད་འཛིན་གྲྭའི་དགེ་རྒན་མཐའ་དག་གི་གླེང་གཞི་ཞིག་ཏུ་གྱུར། དང་ཐོག་ཁོ་ནི་ངོ་མ་དགེ་རྒན་ཕལ་མོ་ཆེར་མགོ་ན་བའི་བྱིས་པ་ཞིག་རེད། མཐར་དགེ་རྒན་རང་ངོས་ནས་སློབ་མར་ལྟ་བ་ཡང་དག་པ་ཞིག་ཇི་ལྟར་འཛུགས་དགོས་མིན་གྱི་ཐད་ནས་བསམ་གཞིགས་ཡང་ཡང་བྱས་མཐར། ངས་ སློབ་མ་ལ་བརྩི་འཇོག་དང་། སློབ་སྦྱོང་གཙོ་གྱུར་པའི་ཁོང་ཚོར་ལུས་སེམས་གཉིས་ཆ་ནས་སེམས་ཁུར་སེམས་ཚེགས་མང་ཙམ་བྱས་ན་འཇིགས་སྐུལ་དང་དྲག་རྡུང་བྱེད་པ་ལས་མཆོག་ཏུ་གྱུར་པ་ངོས་འཛིན་གསལ་པོ་བྱུང་། མདོར་ན། དགེ་རྒན་སོགས་ཀྱིས་སློབ་མར་སྡང་ཟུག་སྤྲད་ན་དེའི་མདུན་ལམ་བརླག་ཅིང་། བརྩི་འཇོག་ནུས་ན་དེའི་མི་ཚེར་མདུན་ལམ་སྤྲོད་པ་ཡིན་ནོ། །
སློབ་གསོ་པ་ཆེན་པོ་འགས། འཇིག་རྟེན་འདི་རུ་སློབ་ཁྲིད་ཀྱི་བྱ་བར་མི་མཁས་པའི་དགེ་རྒན་ཞིག་ལས་སློབ་སྦྱོང་གི་བྱ་བར་རྨོངས་པའི་སློབ་བུ་ཞིག་གཏན་ནས་མེད་ཅེས་སྡོམ་ཚིག་ཅིག་བྲིས་འདུག །སྐད་ཆ་ཐུང་ངུ་འདི་ལ་ང་རང་བློ་ཤིན་ཏུ་འཐད་པ་ཡིན། དགེ་རྒན་གྱིས་སློབ་ཁྲིད་བྱེད་ཚེ། གལ་ཏེ་སློབ་མའི་རྣམ་རིག་གཞན་ལ་གཡེང་ན་དགེ་རྒན་རང་ཉིད་ཀྱི་སློབ་ཁྲིད་བྱེད་སྟངས་ལ་སྐྱོན་ཡོད་པ་དང་། རང་ལ་སློབ་ཁྲིད་ཀྱི་ཐབས་ལམ་བཟང་པོ་ཞིག་མེད་པར་ངོས་འཛིན་དགོས་པ་ལས། མཐའ་གཅིག་ཏུ་སློབ་མ་ཁོ་ནའི་སྡུག་པ་ཉེས་པའམ་སྐྱོན་ཆ་ཡིན་པར་རློམ་མི་རུང་། དེ་ལས་བཟློག་སྟེ་སློབ་བུའི་སེམས་པ་གཡེང་བའི་སྣང་ཚུལ་བྱུང་ན་དེ་མ་ཐག་ཏུ་རང་གིས་སློབ་ཁྲིད་ཀྱི་ནང་དོན་དང་འབྲེལ་བའི་དགོད་གཏམ་མཚར་གཏམ་ལབ་ནས་སློབ་མའི་སེམས་ཁམས་རང་ཕྱོགས་སུ་བཀུག་དགོས། དགེ་རྒན་ནི་ནམ་ཡང་སློབ་མ་ལེགས་ཕྱོགས་སུ་ཁ་ལོ་བསྒྱུར་མཁན་གྱི་དེད་དཔོན་ཡིན་པས་སོ། །
རི་ཀླུང་ཀུན་ལ་ཆར་འཇམ་བབ་ཅིང་། མཁའ་དབུགས་ལའང་ཅུང་ཟད་རློན་ཆ་འདྲེས་པའི་ཞོགས་དུས་ཤིག་ལ། ང་རང་གོམས་ལོབ་བཞིན་དུ་སློབ་གྲྭའི་ཕྱོགས་སུ་གོམ་ཁ་བསྒྱུར། དེང་སང་རྫོང་མཁར་གྱི་སློབ་གྲྭ་ཆེ་འབྲིང་ཆུང་གསུམ་ཀས་སློབ་གྲྭའི་ཁོར་ཡུག་འཛུགས་སྐྲུན་ལ་དོ་སྣང་དང་། ལྗང་སྒྱུར་ཤིང་འཛུགས་ཀྱི་བྱ་བར་མཐོང་ཆེན་བྱས་སྟབས་ངེད་ཚང་གི་སློབ་གྲྭའི་ར་འཁོར་ཡང་ཡིད་འོང་ལྷ་ཡི་དགའ་ཚལ་ལྟ་བུ་ཞིག་ཡིན། གང་སར་ལྡུམ་ར་བསྐྲུན་ཅིང་མེ་ཏོག་དག་གི་བསུང་ཞིམ་དྲི་ངད་ཕྱོགས་བཞིར་འཐུལ་ཅིང་། ལྗོན་ཤིང་གི་གཡུ་ལོ་ཚང་ཚིང་དུ་འཁྲིགས་སྟབས་འདབ་ཆགས་མང་པོས་གཤོག་འགྱུར་ངོམ་ཞིང་སྐད་སྙན་སྒྲོག །ཁོར་ཡུག་མཛེས་པས་ཡིད་ལ་བདེ་བ་སྦྱིན། །སེམས་ཁམས་དྭངས་བས་ལས་ཀར་གྲུབ་འབྲས་ཐོན། །འདི་འདྲའི་སེམས་ཚོར་གྱི་ངང་ནས་ང་རང་གིས་རྐང་གཡུག་ལག་གཡུག་དང་བྱ་རྨྱང་གི་ངང་ནས་གཞུང་དོན་ཁང་དུ་འཛུལ་ནས་སློབ་དེབ་མཆན་དུ་བཅུག་ནས་སློབ་ཐུན་དང་པོར་ཞུགས། ཁྲིད་བྱའི་སློབ་ཚན་ནི་ཡིད་དུ་འོང་བའི་ཡར་འབྲོག་གཡུ་མཚོ་ཞེས་པ་དེ་ཡིན། ངས་རང་ཉིད་ཀྱི་གོམས་ལོབ་ལྟར་དུ་སློབ་ཚན་ཧྲིལ་པོ་འདོན་ཀློག་བྱས་ཏེ་ཐ་སྙད་གསར་པ་ཁྲིད་རྗེས་སློབ་བུ་དག་ལ་ངག་ཐོག་ནས་དྲི་བ་འགར་ལན་གདབ་དུ་བཅུག སྐབས་དེར་བསམ་ཡུལ་ལས་འདས་པ་ཞིག་ལ་དྲི་བ་གཉིས་གསུམ་ཞིག་ལ་སློབ་བུ་ཟླ་བས་ལག་པ་མཐོན་པོར་བསྒྲེངས་ནས་སློབ་བུ་གཞན་དང་ལན་འདེབས་པའི་གོ་སྐབས་ལ་འཕྲོག་རྩོད་བྱས་ཏེ་ལན་བཏབ་བྱུང་། ངས་ཀྱང་ཁོའི་ཧུར་བརྩོན་རང་བཞིན་ལ་སྐུལ་མ་བྱེད་པའི་དུས་ལ་བབས་པ་ཤེས་ནས་ཁོ་ལ་གོ་སྐབས་ཡང་ཡང་བྱིན། མཐར་ཁོས་ཡར་འབྲོག་གཡུ་མཚོ་ཞེས་པའི་སློབ་ཚན་འདི་ཉིད་དགེ་རྒན་གྱིས་མ་ཁྲིད་པའི་ཡར་སྔོན་ནས་སྔ་སྦྱོང་བྱས་པས་དྲི་བ་ཕལ་མོ་ཆེ་ལ་ལན་གནད་དུ་སྨིན་པ་ཞིག་བཏབ་བྱུང་། དོན་དེས་ངེད་དགེ་སློབ་ཚང་མ་ཁ་གདངས་མིག་ཅེར་དགོས་པ་བཟོས། ངས་མུ་མཐུད་དུ་ཁོ་ལ་རྟིང་སྐུལ་ཞིག་ཨེ་ཡོང་གི་བསམ་པས་སློབ་ཚན་ལས་རང་གྲུབ་ཚན་པ་གཉིས་གསུམ་ཞིག་ཁོ་ལ་འདོན་ཀློག་བྱེད་དུ་བཅུག་པ་ཡིན། དེ་ཡང་ཚིག་གི་དག་ཆ་དང་གཅོད་མཚམས། འདོན་སྟངས་སོགས་ཧ་ཅང་བཟང་། དེ་ལྟར་ཁོ་རང་ངེད་ཚང་གི་འཛིན་གྲྭའི་ནང་ནས་སྨྲ་མཁས་ནེ་ཙོ་ལྟ་བུ་ཞིག་ཏུ་གྱུར། བསླབ་ཚན་ཁག་གི་སྦྱངས་འབྲས་ཡང་མངོན་གསལ་གྱིས་ཇེ་དགར་སོང་།
སྔོན་ཆད་ངས་སློབ་བུ་ཟླ་བ་མཐོང་མ་ཐག་མགོ་ན་ཞིང་ཚིག་པ་ཟ་བཞིན་ཡོད། ཐ་ན་ངེད་ཚང་འཛིན་གྲྭ་ལ་སློབ་བུ་འདི་མེད་ན་ཅི་མ་རུང་སྙམ་པའང་བྱུང་། ད་ཐེངས་ཁོའི་ཁ་བློ་སྤྱོད་གསུམ་ལ་འགྱུར་བ་འདི་འདྲ་ཞིག་སོང་པ་ནས་བཟུང་ངས་སློབ་བུ་ཟླ་བ་ནི་ཧ་ཅང་གཤིས་འཇམ་ཞིང་རྒྱུད་བཟང་བ། བློ་རིག་བཀྲ་ཞིང་བརྩོན་འགྲུས་ལྡན་པའི་བུ་ཆུང་ཡིད་དུ་འོང་བ་ཞིག་ཏུ་མཐོང་བྱུང་། ཇི་སྐད་དུ། རང་སེམས་རྣམ་པར་དག་ན། །སྣང་སྲིད་ཆོས་སྐུར་འཆར་རོ། །ཞེས་པ་ཅིས་མི་བདེན། སློབ་བུ་ཚོས་སྐབས་རེར་སློབ་ཐུན་གྱི་ཁ་ནས་ཁ་རྩེད་ལག་རྩེད་དང་། ས་གཡེང་རྡོ་གཡེང་བྱེད་པ་ནི། གཅིག་བྱས་ན་རང་གཅུན་གྱི་ནུས་པ་ཞན་པས་ཡིན་ལ། ཕྱོགས་གཞན་ཞིག་ནས་འཛིན་གྲྭའི་དགེ་རྒན་གྱིས་རྟག་པར་སྦྱོང་འབྲས་བཟང་བའི་སློབ་མ་འབའ་ཞིག་ལ་ཁ་ཡ་བྱེད་པའམ་དོ་སྣང་བྱས་ཏེ། སློབ་བུ་ཟླ་བ་ལྟ་བུའི་སྦྱོང་འབྲས་ཞན་ཞིང་པྲ་ཆལ་ཆེ་བའི་སློབ་མའི་རིགས་ལ་སེམས་ཁུར་དེ་ཙམ་གནང་མི་ཐུབ་པའི་རྐྱེན་གྱིས་ཀྱང་ཡིན་སྲིད། དེའི་ཕྱིར་སློབ་བུ་འདི་རིགས་ཀྱིས་སློབ་གྲྭ་དང་འཛིན་གྲྭའི་དོ་དམ་སྒྲིག་ལམ་ལ་བརྩི་སྲུང་མི་བྱེད་པར་རང་གི་ཁ་བློ་སྤྱོད་གསུམ་རང་བསམ་ཅི་འདོད་ཀྱི་དབང་དུ་བཏང་བ་ཡིན། འདི་ལྟར་བགྱིས་ན་ད་གཟོད་དགེ་རྒན་གྱིས་ཁོང་ཚོའི་ཉིན་རེའི་སློབ་སྦྱོང་དང་། འཚོ་བ་རོལ་སྟངས། ལུས་སེམས་བདེ་ཐང་སོགས་ལ་ཐུགས་ཁུར་གནང་བའི་རེ་བ་བཅོལ་སྟངས་ཤིག་ཡིན་ནའང་ཐང་། གནས་ཚུལ་འདི་རིགས་བྱུང་དུས་རང་ཅག་དགེ་རྒན་རྣམས་ཀྱིས་དང་པོ་ཉིད་ནས་སློབ་བུ་དག་ལ་སྡིགས་མོའི་འབྲུག་གློག་ཐོག་ཆར་དང་། གཅར་རྡུང་གི་སེར་རྒོད་དྲག་ཏུ་མི་འབེབས་པར། རང་སེམས་ལྷོད་དུ་ཕབ་ནས་དགེ་སློབ་གཉིས་ཀྱི་མིག་སྔའི་འབྲེལ་ལམ་གནས་ཚུལ་ལ་དབྱེ་ཞིབ་གནད་དུ་སྨིན་པ་ཞིག་བྱ་རྒྱུ་ནི་ཤིན་ཏུ་ནས་གལ་ཆེའོ། །
གནའ་མིའི་དཔེ་རུ། མི་སྐྱོན་མེད་འཛམ་བུ་གླིང་ན་མེད། ཤིང་འཛེར་མེད་རྒྱ་རྫོང་ནགས་ན་མེད། ཅེས་པ་ལྟར་དུ། མི་ཞིག་ཡིན་ཕྱིན་སོ་སོའི་བསམ་སྦྱོར་གཉིས་ཀར་ནོར་འཁྲུལ་འཆུག་གསུམ་ཡོང་ངེས་རེད། བློ་རིག་ནར་མ་སོན་ལ་སྤྱི་ཚོགས་ཉམས་མྱོང་དབུལ་ཐོག །འཇིག་རྟེན་ཧྲིལ་པོ་ལ་མཚར་འཛིན་གྱི་བསམ་བློ་ཕུན་སུམ་ཚོགས་པའི་ན་ཆུང་སློབ་མ་རྣམས་ལ་དེ་བས་ཀྱང་སྨོས་མ་དགོས། དགེ་རྒན་རྣམས་ལ་ཁོག་ཡངས་བཟོད་སྒམ་དང་། ཡོན་ཏན་ལེགས་གནས། གཞུང་དྲང་ཚུགས་ཐུབ་ཀྱི་བཟང་ཡོན་ཞིག་མེད་ན་སློབ་བུ་བགྲང་ལས་འདས་པ་ཞིག་གི་མི་ཚེའི་རེ་བ་དང་། མ་འོངས་མདུན་ལམ་བརླག་པའི་ཉེན་ཁ་ཡོད་ལ། ཁོང་ཚོའི་ལང་ཚོ་དང་བློ་རིག་ཡང་ཁྱུར་མིད་དུ་གཏོང་བའི་ཉེན་ཁ་ཡོད། ངའི་དྲན་ཡུལ་ནས་ཤོར་དུ་མེད་པའི་དགེ་རྒན་ཞིག་གིས་ང་ལ་རྟག་ཏུ་འདི་ལྟར་སྨྲ་བཞིན་ཡོད། ཁྱོད་ཀྱི་འགྲམ་ལྕག་གཅིག་གིས་ཉིའུ་ཏུན་མེད་པར་བཟོ་སྲིད་ལ། ཁྱོད་ཀྱི་སྡང་མིག་གཅིག་གིས་ཨའེ་ཏི་ཧྲེང་ཚར་གཅོད་ངེས་རེད་ཅེས་པའོ། །དེས་ན་དགེ་རྒན་ཞིག་ཡིན་པའི་ངོས་ནས་བདག་གཞན་མཉམ་པའམ་བདག་གཞན་བརྗེ་བའི་བསམ་པ་རླབས་ཆེན་བྱང་ཆུབ་ཀྱི་སེམས་མཆོག་རིན་པོ་ཆེ་ལྟ་བུ་ཞིག་རང་རྒྱུད་ན་རྣམ་པ་ཀུན་ཏུ་གནས་སུ་མི་གཏུབ་ཀྱང་། རང་ཉིད་ཀྱང་ཆུང་ངུའི་དུས་ནས་སློབ་ཆུང་དང་། སློབ་འབྲིང་། སློབ་ཆེན་སོགས་བརྒྱུད་དེ་སློབ་གསོ་སློབ་ཁྲིད་ཀྱི་ལམ་དུ་ཞུགས་པ་ཡིན་སྟབས། སློབ་མའི་སེམས་ཁམས་དང་། ན་ཚོད། ཤེས་ཡོན་སོགས་ཀྱི་བར་དུ་གཅིག་ལ་གཅིག་རྟེན་གྱི་འབྲེལ་བ་ཅི་ཞིག་ཡོད་པ། ཇི་ལྟར་ཡོད་པ། གང་ལྟར་བྱུང་བ་སོགས་ཀྱི་ཐད་ནས་བློ་མ་རྨོངས་པར་ངོས་འཛིན་གསལ་པོ་ཞིག་ཡོང་ཐོག དེ་ལ་དེ་བསྟུན་གྱིས་ཐབས་མཁས་ལ་ཐུགས་རྗེ་ཆེ་བའི་ཚུལ་གྱིས་སློབ་བུའི་ལུས་སེམས་གཉིས་ལ་ཕན་ཞིང་དཔལ་བའི་སློབ་གསོ་སློབ་ཁྲིད་ཅི་ནས་ཀྱང་གནང་དགོས། སྤྱིར་སློབ་བུ་དག་ལ་ཟ་རྐྱང་འཐུང་རྐྱང་བྱེད་པའི་གནའ་བོའི་ཤེས་རིག་དང་གཞུང་ལུགས་ཀྱི་རྐང་ཚུགས་ཤིང་། དེང་རབས་ཤེས་རིག་ལ་བློ་རྒྱས་པའི་སློབ་གསོ་སློབ་ཁྲིད་ཀྱི་ཁོར་ཡུག་ཅིག་བསྐྲུན་ཐུབ་ན་དགའ་མོད། འོན་ཏེ་ཉེ་བའི་ལོ་ཤས་རིང་གི་འཛམ་གླིང་ཤར་ནུབ་གཉིས་ཀྱི་སློབ་གསོའི་གཞུང་ལུགས་ལྟ་བ་དང་། སློབ་ཁྲིད་ཀྱི་ཐབས་ཤེས་བཀོད་པ་སོགས་ཀྱི་ཐད་ནས་གཤིབ་བསྡུར་ཞིག་བྱས་ན། ན་ཆུང་སློབ་མ་དག་གི་སེམས་བསམ་པ་དང་། བློ་རིག་པ། ལུས་ལང་ཚོ་དང་བསྟུན་ནས། ཁོང་ཚོར་གང་ལ་གང་འཚམ་གྱིས་དཀའ་ངལ་ཅུང་ཟད་རེ་ལ་གདོང་ལེན་བྱེད་དུ་འཇུག་ཅིང་། རང་གི་བློ་རིག་དང་ལག་ཟུང་ལ་བརྟེན་ནས་བྱ་བ་ཆུང་ངུའི་རིགས་ཐག་གཅོད་བྱེད་པར་བསྐུལ་ན། ཁོང་ཚོ་ནར་སོན་རྗེས་སོ་སོའི་འཚོ་བ་རོལ་སྟངས་ལ་འགྱུར་བ་འགྲོ་ཞིང་། སོ་སོའི་མི་ཚེའི་ལྟ་བ་དང་། རིན་ཐང་གཞལ་ལུགས་སོགས་ལ་ཕན་པ་རྒྱ་ཆེར་ཡོད་པར་འདོད།
གཞན་ད་དུང་། སློབ་གསོ་པ་གྲགས་ཅན་དག་གི་གསུང་དུ། དགེ་སློབ་བར་དུ་འབྲེལ་ལམ་བཟུང་ཚེ་ཆེ་བསྟོད་དང་སྨད་ར་དགོས་པའི་དུས་གང་མང་ལ་ཐུག་སྲིད། སློབ་བུ་དག་ལ་བསྟོད་བསྔགས་གནང་དུས་སློབ་བུ་སོ་སོའི་མིང་བོས་ན་དགེ་མཚན་ཆེ་ཞིང་། སྐྱོན་བརྗོད་དང་མཚང་འབྱིན་དགོས་པའི་དུས་སུ་སློབ་བུ་ག་གེ་མོ་ཞེས་པ་ཙམ་གྱིས་འགྲིག །ཅེས་པའི་སྐད་ཆ་འདི་ལའང་གོ་རྒྱུ་ཆེན་པོ་ཡོད། མདོར་ན་དགེ་རྒན་ནི་དངོས་གནས་ཐབས་མཁས་ལ་ཐུགས་རྗེ་ཆེ་བ་ཞིག་ཡིན་དགོས་པ་ནི་སྨོས་མེད་རེད།
སློབ་གྲྭས་བར་རྒྱུགས་བླངས་ཟིན་པའི་དབྱར་གཞུང་གི་ཕྱི་དྲོ་ཞིག་ལ། ང་རང་གཞུང་དོན་ཁང་དུ་གཉིད་ལྕོག་རྒྱག་ཞོར་དུ་སློབ་བུ་དག་གི་རྒྱུགས་ཤོག་ལ་བརྟག་བཤེར་བྱེད་བཞིན་པའི་སྐབས་ཤིག་ལ་སྒོ་གླེགས་ཡང་མོ་རྡུང་བའི་སྒྲ་ཞིག་ཐོས། ང་རང་ཡར་ལངས་ཏེ་སྒོ་ཕྱེས་ཚེ་དེ་ནི་སློབ་བུ་ཟླ་བས་རྩོམ་ཐུང་ཞིག་བྲིས་ཏེ་ང་ལ་ཞུ་དག་དང་བཟོ་བཅོས་གནང་རོགས་ཞེས་ཤོག་ཆག་ལྟེབ་མ་ཞིག་གཏད་དེ་ལག་གཡས་མས་མགོ་ལ་འཕུར་ཞོར་དུ་བུད་སོང་། རྩོམ་ཐུང་ནི་འདི་འདྲ་ཞིག་བྲིས་འདུག །
བདག་གི་དགེ་རྒན།
དགེ་རྒན་ལགས། མང་པོ་ཞིག་གི་མིག་ལམ་དུ་ང་ནི་སྤྱོད་ལམ་གཉིས་ཀ་ཞན་པའི་སློབ་བུ་ཞིག་ཡིན། དེའི་ཕྱིར་ང་རང་ཡུན་རིང་ཞིག་ལ་བརྩེ་བ་མེད་པའི་གྲུ་ག་ཞིག་ཏུ་ཁེར་རྐྱང་གི་འཚོ་བ་རོལ་བཞིན་བསྡད། སྐབས་ཤིག་ནས་བཟུང་ཨ་མ་དང་ཨ་ཕས་ང་ལ་སྙིང་ཐག་པ་ནས་དགའ་བ་ལས་གཞན་ད་དུང་དགེ་རྒན་ཁྱེད་ནི་ངའི་སེམས་ཁོང་ནས་ཆེས་སྙིང་ཉེ་བའི་མི་དེ་ཡིན། དགེ་རྒན་ལགས། ང་ནི་ཁྱེད་ལ་བརྩེ་ཞིང་གུས། ལྷག་པར་དུ་སློབ་ཁྲིད་ཀྱི་སྐབས་སུ་ཁྱེད་ཀྱི་བརྩེ་བའི་མིག་ཟུང་དེས་ང་ལ་རྟག་ཏུ་སྤོབས་པ་བསྩལ་གྱིན་འདུག །དགེ་རྒན་ལགས། ངའི་བླ་སྲོག་གི་གཏིང་རུམ་ན་འཚེར་བའི་མུ་ཏིག་རྡོག་པོ། ངའི་ཞེན་ཆགས་ཀྱི་འཁོར་བ་ན་འདུར་བའི་རྣམ་ཤེས་དྭངས་མ། ལོ་ཟླའི་འགྲོས་ལ་མྱུར་བུལ་ཇི་ལྟར་བྱུང་རུང་ངས་མི་ཚེ་འདིར་གློ་སྙིང་མཆིན་གསུམ་གྱི་བར་ནས་དགེ་རྒན་ཁྱེད་ཉིད་དྲན་ངེས་ཡིན། ཁྱེད་ནི་ནམ་ཡང་ངའི་སེམས་ཁོང་ན་མེ་ཏོག་ཁྲི་འབུམ་སྐྱེད་བསྲིང་གནང་བའི་རིས་མེད་ཀྱི་ལྡུམ་ར་པ་དེ་ཡིན། དགེ་རྒན་ལགས། ངེད་ཅག་བགྲོད་དགོས་པའི་བཤུལ་ལམ་ཇི་ལྟར་རིང་ཞིང་། འཕུར་དགོས་སའི་དབྱིངས་རིམ་ཇི་ལྟར་མཐོ་ན་ཡང་། ཁྱེད་ཀྱིས་སྔར་བདག་ཅག་ལ་གནང་བའི་བསླབ་བྱའི་གསེར་ཞུན་ཐིགས་པ་རེ་རེས། ང་ཚོ་རྟ་མཆོག་རྐྱང་རྒོད་དང་བྱ་རྒྱལ་རྒོད་པོ་ནང་བཞིན་ཡངས་པའི་འཇིག་རྟེན་འདིའི་མཛེས་ཆོས་དག་ལོངས་སུ་སྤྱོད་ཐུབ་པར་ཡིད་ཆེས་དང་སྤོབས་པ་ཡོད། ཁྱེད་ནི་ང་ཡི་སེམས་ཁོང་གི་ཉི་མ་སྟེ། བྱམས་བརྩེ་ཡི་འཛུམ་ཟེར་དྲོད་མོ་མི་ཡུལ་དུ་སྤྲོ་དུས། ངེད་ཅག་སློབ་བུ་ཁྲི་འབུམ་གྱི་མདུན་ལམ་ལ་འོད་ཀྱིས་འཁྱུད་ཅིང་། སེམས་རྒྱུད་དུ་ཤེས་རིག་གི་མྱུ་གུ་འབུས་ཏེ་ཡངས་པའི་རྒྱལ་ཁམས་འདི་རུ་སོ་སོའི་མེ་ཏོག་བཞད་ཅིང་ཟེའུ་འབྲུ་དགོད་ལ། མ་འོངས་པའི་བཀྲ་ཤིས་ཉིན་མོ་ཞིག་ལ་འབྲས་བུ་གཡུར་དུ་ཟ་བ་ཞིག་སྨིན་ནས་འཇིག་རྟེན་འདི་ལ་དགའ་བའི་འཛུམ་མདངས། དགོད་པའི་དྲི་བསུང་དེ་འབུལ་ངེས་ཡིན། ཞེས་སོ། །
རྩོམ་ཐུང་འདིས་ཚ་རྨུགས་ཆེ་བའི་ཕྱི་དྲོ་འདི་ལ་ངའི་སེམས་ཁོང་དུ་ཞི་བསིལ་གྱི་ཆར་འཇམ་ཕབ་ཅིང་། མཁུར་ཚོས་བརྒྱུད་དེ་དཀར་ཞིང་འཚེར་བའི་མུ་ཏིག་རྡོག་པ་འགའ་པང་དུ་བསྙིལ་བྱུང་།
ཡུས་ཧྲུའུ་གྲོང་ཁྱེར་མི་རིགས་སློབ་འབྲིང་གཉིས་པ་བོད་ཡིག་སློབ་དཔྱོད་ཁང་གི་ཚེ་བརྟན་དབང་མོ་ནས་སྤྱི་ལོ་༢༠༢༤ལོའི་སྤྱི་ཟླ་ལྔ་པའི་ནང་བྲིས།
ཚེ་བརྟན་དབང་མོའི་ངོ་སྤྲོད་མདོར་བསྡུས།
ཚེ་བརྟན་དབང་མོ། མོ། ༡༩༩༠ ལོར་རྫ་སྟོད་དུ་སྐྱེས། ཁོ་མོ་འགྲོ་ཤེས་པ་ནས་དཔེ་ཁུག་རྒྱབ་ལ་ཁུར་བར་དགའ་ཞིང་། ཁ་གྲགས་ཤེས་པ་ནས་ཀ་ཁའི་དབྱངས་རྟ་ངག་སྒོར་གྱེར་བར་དགའ། ཁོ་མོ་བགྲང་བྱ་བཞི་ལོན་པ་དང་མཉམ་དུ་ཁོ་མོའི་རེ་བ་ལྟར་ཡུལ་ཤུལ་ཁུལ་ཆ་ཚང་སློབ་ཆུང་གསུམ་པར་ཞུགས་ནས་ལོ་དྲུག་གི་རིང་དུ་དགེ་རྒན་བཟངཔོ་ལ་བསྟེན་ནས་སློབ་གཉེར་བྱས། ༢༠༠༠ ལོ་སློབ་ཆུང་ནས་སློབ་འབྲས་གཡུར་དུ་ཟ་བ་འཐོབ་ནས་མཐར་ཕྱིན་པ་དང་། ཡུལ་ཤུལ་རྫོང་མི་རིགས་སློབ་འབྲིང་གཉིས་པའི་དམའ་འབྲིང་དང་མཐོ་འབྲིང་ལ་རིམ་བཞིན་ཞུགས་ཏེ་རྒྱ་བོད་དབྱིན་གསུམ་གྱི་རིག་གནས་ཁག་ལ་རང་གི་ནུས་ཚོད་ཀྱིས་སྦྱངས་བརྩོན་བྱས། དེ་ནས་མཐོ་རྒྱུགས་ཀྱི་རྒྱུགས་འབྲས་ལེགས་པོ་ཐོབ་ནས་ནུབ་བྱང་མི་རིགས་སློབ་གྲྭ་ཆེན་མོར་རྒྱུགས་འཕྲོད་དེ། བགྲང་བྱ་བཞིའི་རིང་ལ་སློབ་སྦྱོང་ལ་ཤུགས་དྲགས་བརྩོན་པས་སློབ་མཐར་ལེགས་པར་ཕྱིན། དེ་ནས་རིམ་བཞིན་དུ་ཡུལ་ཤུལ་གྲོང་ཁྱེར་རོང་པོ་སློབ་ཆུང་དང་། ཡུལ་ཤུལ་གྲོང་ཁྱེར་མི་རིགས་སློབ་འབྲིང་གཉིས་པ་ནས་དགེ་རྒན་གྱི་བྱ་བར་གཉེར།
ཁོ་མོ་ཆུང་དུས་ནས་རིག་གནས་སྤྱི་ལ་མོས་ཤིང་སྦྱོང་པ་གང་འཚམ་ཞིག་བྱེད་པ་མ་ཚད། ལྷག་ཏུ་མི་རིགས་རང་གི་ལོ་རྒྱུས་དང་རིག་གནས་ལ་འབད་པ་བླ་ལྷག་ཞུས། ཁོམ་ལོང་རེ་ཡོད་ཚེ་རྒྱ་ཡིག་དང་བོད་ཡིག་གི་ལམ་ནས་རྩོམ་ཐུང་ཐར་ཐོར་རེའང་འབྲི་བར་དགའ་བས་བོད་ཁུལ་གྱི་རྩོམ་དེབ་ཆེ་མ་ཆུང་གསུམ་དུ་བརྩམས་ཆོས་ཁག་ཅིག་སྤེལ། ན་གཞོན་རྩོམ་པ་པོའི་རྩོམ་ཡིག་འགྲན་བསྡུར་ཁྲོད་ནས་ཀྱང་བྱ་དགའ་གང་འཚམས་ཤིག་ཐོབ་མྱངས།
