ཡིན་ན་ཡང་།དུས་ད་ལྟ་འབྱམས་ཀླས་པའི་རྩྭ་ཐང་སྐྱ་ཐེར་ཐེར།དྭངས་གསལ་གྱི་ཆུ་བོ་ནག་རོག་གེ རྫུབ་སྟུག་པོའི་ནགས་ཀླུང་མགོ་རྗེན་ནེར་ང་ཚོའི་སྤྱན་ལམ་དུ་བཤམས་ཟིན་ལ།ཁོ་ཚོས་ད་དུང་སྲོག་སྐྱོབས་རོགས་ཞེས་པའི་ངུ་འབོད་སྒྲོག་པ་ནི་དམར་རྗེན་དུ་ལུས་པའི་ལོ་ཆུང་གི་བྱིས་པ་ཞིག་དང་ཀུན་ནས་མཚུངས་པས།དངོས་གནས་ཤ་གསེང་ནས་ཙག་ཤེད་རྒྱུག་ཅིང་མགྲིན་ལམ་ནས་མཆི་མ་བརྣང་བ་ཞིག་རེད།ཡིན་ནའང་།མི་མི་ཉུང་བ་ཞིག་གིས་ད་དུང་སྔར་བཞིན་ས་གཞི་ནི་ཡངས་ཤིང་ཆེ་ལ་རྫོགས་མཐའ་བྲལ་བ་ཞིག་ཏུ་འཁུམས་ནས་ཚང་ཚིང་སྔོ་ལྗང་གི་གོས་རྒྱན་དང་བག་ཡངས་སུ་རྒྱུ་བའི་རི་དྭགས་སྣ་ཚོགས་གང་འདོད་དུ་བསད་པས་ང་ཚོའི་ཉེ་འཁོར་ཀུན་མྱ་ངན་གྱི་ཐང་ཆེན་དུ་གྱུར་ཅིང་།ཁྲོམ་པ་བསྐམས་པར་གྱུར་པའི་ཚེ།།ཆུ་ཡི་རིན་ཐང་ད་གཟོད་ཤེས་ཟེར་བའི་དཔེ་ལྟར་གྱུར་ཏོ།།
དེ་ལྟར་ན་ཁྱོད་ལ་ལྷོག་ལྷོག་ཏུ་ལྡིང་བའི་སྙིང་ཆུང་གསོན་པོ་ཞིག་དང་།དྲོན་མོར་བཞུར་བའི་ཁྲག་རྒྱུན་ཞིག་ཡོད་ན།རང་བྱུང་ཁམས་ཀྱི་ཡོད་ཚད་ལ་བདག་སྐྱོང་ཡག་པོ་བྱས་ཏེ།དུག་རླངས་འཕྱུར་བའི་མཁའ་དབྱིངས་དྭངས་གསལ་དུ་བསྒྱུར་བ་དང་།འབྱུང་བཞིར་གཙེས་པའི་ནད་ཡམས་རྒྱང་རིང་དུ་སྐྲོད་པར་འབད་པ་བྱེད་རིགས་སོ།།
ཆུང་འབྲིང་སློབ་མའི་འགྲན་རྩོམ་གཅེས་བསྡུས་ཞེས་པ་ལས་བཏུས།
